४९. क्यस्स स्से

क्यस्स वा लोपो होति स्से. सुखं तया अनुभविस्सति, अनुभविस्सन्ति. अनुभविस्ससि, अनुभविस्सथ. अनुभविस्सामि, अनुभविस्साम. अञ्ञत्र अनुभूयिस्सति, अनुभूयिस्सन्ति इच्चादि. एवं परच्छक्के. भावे-भूयिस्सति भूयिस्सते.

कत्तरि-पचिस्सति, पचिस्सन्ति इच्चादि. कम्मे-पचिस्सति ओदनो देवदत्तेन, पचीयिस्सति, पच्चिस्सति. पच्चिस्सन्ति ओदना पचीयिस्सन्ति, पचीयिस्सरे, पच्चिस्सरे, पच्चिस्सन्ति.

गमितो कत्तरि-सो गच्छिस्सति, ते गच्छिस्सन्ति. त्वं गच्छिस्ससि, तुम्हे गच्छिस्सथ. अहं गच्छिस्सामि, मयं गच्छिस्साम. गच्छिस्सते, गच्छिस्सन्ते. गच्छिस्ससे, गच्छिस्सव्हे. गच्छिस्सं, गच्छिस्साम्हे. सग्गं गमिस्सति, गमिस्सन्ति. गमिस्ससि, गमिस्सथ. गमिस्सामि, गमिस्साम इच्चादि. कम्मे-गच्छियिस्सति, गच्छियिस्सन्ति इच्चादि. क्यलोपे गमिस्सति, गमिस्सन्ति इच्चादि. तथा घम्मिस्सति घम्मीयिस्सति, घम्मिस्सन्ति, घम्मीयिस्सन्ति इच्चादि.