३. यथा न तुल्ये

यथासद्दो तुल्यत्थे वत्तमानो स्याद्यन्तेन सहे+कत्थो न भवति. यथा देवदत्तो, तथा यञ्ञदत्तो. एत्थ उपमानभूतो यथासद्दो ‘तथा यञ्ञदत्तो’ति उपमेय्य+मपेक्खति, तस्मा ‘‘सापेक्ख+मसमत्थं भवती’’ति ञाया असमासे ‘‘न तुल्ये’’ति पटिसेधो किमत्थ+मिति चे. यस्मा ‘‘यथा देवदत्तो’’ति समुदायमेव उपमानं भवति, न विसुं यथासद्दो, तस्मा समुदायस्सेव उपमेय्यसापेक्खत्ते न असामत्थियता न विसुं यथासद्दस्स, तस्मा सादिस्से पत्तसमासस्स पटिसेधत्थ+मिदं. तुल्यत्थेति वत्तब्बे तुल्यं विना तुल्यता नत्थीति तुल्यत्थेति अवत्वा तुल्येति वुत्तं.

यथाकथञ्चि सादिस्सं, ञायते यत्थ सम्भवं;

उपमा नाम सा तस्सा, पपञ्चो बहुधा भवे.