७८. जायाय जयं पतिम्हि

पतिम्हि परे जायाय जयं होति. जाया च पति च जयम्पतयो. जानिपतीति पकतन्तरेन सिद्धं, जानि च पति च जानिपति. एवं जम्पति दम्पतीति.

क्वचि अप्पसरं पुब्बं निपतति, यथा-चन्दो च सूरियो च चन्दसूरिया, निगमा च जनपदा च निगमजनपदा. एवं सुरासुरगरुडमनुजभुजगगन्धब्बा.

क्वचि इवण्णु+वण्णन्तानं पुब्बनिपातो, यथा-अग्गिधुमा, गतिबुद्धिभुजपठहरकरसया, धातुलिङ्गानि.

क्वचि सरादिअकारन्तं पुब्बं निपतति, यथा-अत्थधम्मा, अत्थसद्दा, सद्दत्था वा.

अञ्ञमञ्ञसापेक्खानमेव तिरोहितावयवभेदो समुदायपधानो समाहारो, यथा-छत्तञ्च उपाहना च छत्तुपाहनं.