३८. निग्गहीतं

निग्गहीतागमो होति वा क्वचि. सामत्थियेना+गमोव, स च रस्ससरस्सेव होति… तस्स रस्ससरानुगतत्ता. ठानीन+मालिङ्घिय गच्छति पवत्ततीति आगमो. चक्खुं उदपादि, अक्खिं रुजति, पुरिमं जाति, अणुं थूलानि, कत्तब्बं कुसलं बहुं, तंसम्पयुत्ता, तंतंसभावतो. वाग्गहणेन चक्खु उदपादि इच्चादि. अवंसिरो, यावञ्चिदंतिआदि निच्चं… ववत्थितविभासत्ता वाधिकारस्स, ववत्थितस्स लक्खणस्सा+नुरोधेन लक्खणे पवत्तिता विभासा ववत्थितविभासा. वासद्दो हि अत्थद्वये वत्तते कत्थचि विकप्पे, कत्थचि यथाववत्थितरूपपरिग्गहेति. यदा पच्छिमे, तदा निच्च+मनिच्च+मसन्तञ्च विधिं दीपेति. एत्थ पन क्वचिसद्दस्सा+नुवत्तना तेनेवा+सन्तविधि सिद्धोति वासद्देनि+तरद्वयं. क्वचि त्वेव, न हि एतेहि, इध चेव.

सं रम्भो, सं रत्तो, सं रागो, तासं अहं सन्तिके, एवं अयं, पुं लिङ्गं, किं अहं, तस्स अदासिं अहं इती+ध ‘‘निग्गहीता’’धिकारो आ ‘‘मयदा सरे’’ति.