जिनवंसदीपं |ओ०.०००१|

नमो तस्स भगवतो अरहतो सम्मासम्बुद्धस्स

१. महादयो यो हदयो’दयो’दयो

हिताय दुक्खानुभवे भवे भवे,

अकासि सम्बोधिपदं पदं पदं

तमाभिवन्दामि जिनं जिनं जिनं; (यमकबन्धनं)

२. |ओ०.०००२|

पहाय यत्था’भिरतिं रतिं रतिं

रमन्ति धम्मेव मुनी मुनी मुनी,

विमुत्तिदं सब्बभवा भवा’भवा

तमाभिवन्दे महितं हितं हितं; (यमकबन्धनं)

३. |ओ०.०००४|

निपीतसद्धम्मरसा रसा’रसा

सुपुञ्ञखेत्तो’रसतं सतं सतं,

गता विधूता विनयेन येन ये

तमाभिवन्दे’सिगणङ्गण’ङ्गणं; (यमकबन्धनं)

४. |ओ०.०००५|

जिना’नतम्भोरुह हंसराजिनी

जिनोरसानं मुखपञ्जरा’लि नी,

सदत्थसारं सरसं विसूद नी

उपेतु मे मानसमेव वाणि नी;

५. कम्मावसेसा विचितो’पजात्या

गन्था’हिसङ्खारविबन्धका मे,

पणाम पुञ्ञातिसयेन’नेन

मा पाकदाना’वसरा भवन्तु;

६. सुवण्णवण्णस्स जिनस्स वण्णं

वण्णेय्य कप्पम्पि कजितो सुवण्णो,

कप्पस्सि’वोसान मनत्तताय

न पापुणे बुद्धगुणान मन्तं;

७. |ओ०.०००६|

निद्धन्त चामीकर चारु रूपं

सरस्सती भूसण भासनंच,

अनञ्ञ साधारण ञाणमस्स

अवाविया’चिन्तिय मपक्पमेय्यं;

८. कुहिं असाधारण रूप लीला

कुहिं असाधारण वाणि लीला,

कुहिं असाधारणञाण लीला

कुहिं नु मे मन्दमतिस्स लीला;

९. |ओ०.०००७|

विभाविमानी परवम्हिनो ये

इस्सा’भिमानेन विभञ्ञमाना,

गवेसयन्ती’ध परस्स रन्धं

तेसं पसंसागरहाहि किम्मे;

१०. पसत्थ सत्थागम पारदस्सी

ये साधवो साधु गुणप्पसन्ता,

गन्थस्स निम्माणपरिस्समं नो

जानन्ति तेयेव इधप्पमाणा;

११. आदिच्चवंसप्पभवस्स तस्स

जिनस्स सत्थागमकोविदेहि,

वुत्तोपि पुब्बाचरियेहि येसु

गन्थेसु सङ्खेपवसेन वंसो;

१२. न तेहि सक्का सुगतस्स वंसं

किञ्चापि विञ्ञातु मसेसयित्वा,

सम्पुण्णवंसस्स विभावनाय

तस्मा समुस्साहित मानसेन;

१३. |ओ०.०००८|

अभिप्पसन्नो रतनत्तयम्हि

पसत्थवंसप्पभवो पभुनं,

विभुसणो विस्सुतकित्तिघोसो

यो भाति लङ्काय मुळारभाग्यो;

१४. अमन्दचागा’भिरतस्स

पुनन्दु नामस्स दयाधनस्स,

बुद्धे पसादातिसयस्स तस्स

अज्झेसनञ्चापि पटिग्गहेत्वा;

१५. नस्साय पुब्बाचरियो’पदेसं

सोतून मत्थाय मया हिताय,

निरुत्तिया मागधिकाय सम्मा

विधीयते’दं जिनवंसदीपं;

१६. |ओ०.०००९|

सद्धासिनेहानुगताय पञ्ञा-

दसाय सोतूहि मनोविमाने,

पदीपितो’यं जिनवंसदीप-

दीपोहरेपापतमप्पबन्धं;

१७. पुरङ्गपुण्णा सिरिजम्बुदीपे

सम्पत्तिभारेन दिवा’वतिण्णा,

या देवराजस्स’मरावती’वा-

मरावतीनाम पुरी पुरे’सी;

१८. विज्जाधरानञ्च विहङ्गमानं

विबन्ध वेहासगतिं बहास,

यस्मिं पुरस्मिं जितवेरि चक्कं

पाकारचक्कं विय चक्कवाळं;

१९. |ओ०.००१०|

सञ्चुम्बितम्होज रजो पबन्ध-

सुपिञ्जरापा परिखाहिरामा,

पुरित्थि पाकार नितम्बभागे

समुब्बही कञ्चन मेखला’भं;

२०. रत्तिन्दिवा रत्तमणि’न्दनील-

मणिप्पभारञ्जित राजधानि,

बबन्ध या’मन्दसुरिन्दचाप-

समुज्जलाकासतलब्बिलासं;

२१. यहिंवधूनं वदनम्बुजेहि

कतावमानं हरिणङ्कबिम्बं,

पभाहि नीलोपलतोरणातं

सोकाभीभूतंच विवण्णमाप;

२२. |ओ०.००११|

सरोरुह’न्ती मणिमन्दिराभा-

सञ्चुम्बितं पुण्णससङ्कबिम्बं;

सङ्काय रामाजनता’भिरामा

करे पसारेसि पुरम्हि यस्मिं;

२३. यत्थ’ङ्गनानं पटिबिम्बितानि

आदासभित्तीसु मुखम्बुजानि,

आसुं विघाताय मधुब्बतानं

विलोचनालीन मनुग्गहाय;

२४. सम्मत्त मातङ्ग धराधरेहि

यस्मिं अभिस्सन्द मदस्सवन्ति,

तुरङ्ग रङ्गेही तरङ्ग माला

समाकुलेवा’सि विधूत धूली;

२५. |ओ०.००१२|

निक्खित्तवीणा मणिनुपुरानं

विलासिनीनं मुदुपाणि पादे,

मत्तालिमाला कलनादिनी किं

नालङ्करुं यत्थ कतावकासा;

२६. धवत्थिनीनं कुचसारसेहि

नेत्तालिभारा’नननीरजेहि,

या हासवीचीहि पुरी रजन्या

रराज समफुल्लसरोजिनी’व;

२७. चन्दप्पभा चुम्बित चन्दकन्त

पासाणधारा मणिचन्दिकासू,

चन्दाननानं यहि मङ्गनाहं

परिस्समस्सो’पसमाय’हेसुं;

२८. |ओ०.००१३|

यस्मिं पूरे उद्धमधो विनद्ध-

जुतिप्पबन्धो मणिमन्दिरानं,

समुब्बही गेरुक पङ्क दिद्ध-

वितान पच्चत्थरणब्बिलासं

२९. सुवण्ण मुत्ता मणि वंसवण्णा-

पवाळ रूपी वजिरेहिञ्चा’पि,

या सत्तधञ्ञेहि धनेहि फीता

अहू पुरि धञ्ञवती’व नारी; (सिलेसबन्धनं)

३०. पसारिता’नेकदिसामुखेसु

विचित्तवत्था’भरणादिपूरा,

यत्था’पणा निज्जितकप्परुक्खा

करिंसु लोकाभिमतत्थसिद्धिं;

३१. |ओ०.००१४|

परागरत्ता मधुपातिमत्ता

सम्हिन्नवेला घननीलवाला,

हंसासया पञ्चसराभिरामा

यस्मिं तळाका विय कामभोगी; (सिलेसबन्धनं)

३२. पुरन्तरस्मिं रतनग्घिकानं

रंसिप्पबन्धेहि हतन्धकारे,

कुन्दारविन्दब्भुदयेनयस्मिं

रत्तिन्दिवाभेद मवेदि लोको;

३३. |ओ०.००१५|

मातङ्गजीमूतघटाय घण्टा-

टङ्कारगम्भीररवाय यस्मिं,

पलम्भीता मत्तसिखण्डिमाला

अका विकालेपि अखण्डकीळं;

३४. पुरम्हि यस्मिं चरणम्बुजेहि

वधूजतो बन्धितनूपुरेहि,

विकास कोकासन सीस बद्ध