५. मलसुत्तं

१५. ‘‘अट्ठिमानि, भिक्खवे, मलानि. कतमानि अट्ठ? असज्झायमला, भिक्खवे, मन्ता; अनुट्ठानमला, भिक्खवे, घरा; मलं, भिक्खवे, वण्णस्स कोसज्जं; पमादो, भिक्खवे, रक्खतो मलं; मलं, भिक्खवे, इत्थिया दुच्चरितं; मच्छेरं, भिक्खवे, ददतो मलं; मला, भिक्खवे, पापका अकुसला धम्मा अस्मिं लोके परम्हि च; ततो [ततो च (स्या. पी.)], भिक्खवे, मला मलतरं अविज्जा परमं मलं. इमानि खो, भिक्खवे, अट्ठ मलानी’’ति.

‘‘असज्झायमला मन्ता, अनुट्ठानमला घरा;

मलं वण्णस्स कोसज्जं, पमादो रक्खतो मलं.

‘‘मलित्थिया दुच्चरितं, मच्छेरं ददतो मलं;

मला वे पापका धम्मा, अस्मिं लोके परम्हि च;

ततो मला मलतरं, अविज्जा परमं मल’’न्ति. पञ्चमं;