५. पठममित्तसुत्तं

३६. ‘‘सत्तहि, भिक्खवे, अङ्गेहि समन्नागतो मित्तो सेवितब्बो. कतमेहि सत्तहि? दुद्ददं ददाति, दुक्करं करोति, दुक्खमं खमति, गुय्हमस्स [गुय्हस्स (क.)] आवि करोति, गुय्हमस्स [गुय्हं अस्स (सी.), गुय्हस्स (क.)] परिगुहति [परिगूहति (सी. स्या.), परिगुय्हति (क.)], आपदासु न जहति, खीणेन [खीणे (क.)] नातिमञ्ञति. इमेहि खो, भिक्खवे, सत्तहि अङ्गेहि समन्नागतो मित्तो सेवितब्बो’’ति.

‘‘दुद्ददं ददाति मित्तो, दुक्करञ्चापि कुब्बति;

अथोपिस्स दुरुत्तानि, खमति दुक्खमानि च [दुक्खमानिपि (सी. स्या.)].

‘‘गुय्हञ्च तस्स [गुय्हमस्स च (स्या.)] अक्खाति, गुय्हस्स परिगूहति;

आपदासु न जहाति, खीणेन नातिमञ्ञति.

‘‘यम्हि एतानि ठानानि, संविज्जन्तीध [संविज्जन्ति च (क.)] पुग्गले;

सो मित्तो मित्तकामेन, भजितब्बो तथाविधो’’ति. पञ्चमं;