७. भोगसुत्तं

२२७. ‘‘पञ्चिमे, भिक्खवे, आदीनवा भोगेसु. कतमे पञ्च? अग्गिसाधारणा भोगा, उदकसाधारणा भोगा, राजसाधारणा भोगा, चोरसाधारणा भोगा, अप्पियेहि दायादेहि साधारणा भोगा. इमे खो, भिक्खवे, पञ्च आदीनवा भोगेसु.

‘‘पञ्चिमे, भिक्खवे, आनिसंसा भोगेसु. कतमे पञ्च? भोगे निस्साय अत्तानं सुखेति पीणेति सम्मा सुखं परिहरति, मातापितरो सुखेति पीणेति सम्मा सुखं परिहरति, पुत्तदारदासकम्मकरपोरिसे सुखेति पीणेति सम्मा सुखं परिहरति, मित्तामच्चे सुखेति पीणेति सम्मा सुखं परिहरति, समणब्राह्मणेसु उद्धग्गिकं दक्खिणं पतिट्ठापेति सोवग्गिकं सुखविपाकं सग्गसंवत्तनिकं. इमे खो, भिक्खवे, पञ्च आनिसंसा भोगेसू’’ति. सत्तमं.