४. मच्छरीसुत्तं

२२४. ‘‘पञ्चिमे, भिक्खवे, आदीनवा अतिनिवासे. कतमे पञ्च? आवासमच्छरी होति, कुलमच्छरी होति, लाभमच्छरी होति, वण्णमच्छरी होति, धम्ममच्छरी होति. इमे खो, भिक्खवे, पञ्च आदीनवा अतिनिवासे.

‘‘पञ्चिमे, भिक्खवे, आनिसंसा समवत्थवासे. कतमे पञ्च? न आवासमच्छरी होति, न कुलमच्छरी होति, न लाभमच्छरी होति, न वण्णमच्छरी होति, न धम्ममच्छरी होति. इमे खो, भिक्खवे, पञ्च आनिसंसा समवत्थवासे’’ति. चतुत्थं.