१. पठमदीघचारिकसुत्तं

२२१. ‘‘पञ्चिमे, भिक्खवे, आदीनवा दीघचारिकं अनवत्थचारिकं अनुयुत्तस्स विहरतो. कतमे पञ्च? अस्सुतं न सुणाति, सुतं न परियोदापेति, सुतेनेकच्चेन अविसारदो होति, गाळ्हं [बाळ्हं (स्या.)] रोगातङ्कं फुसति, न च मित्तवा होति. इमे खो, भिक्खवे, पञ्च आदीनवा दीघचारिकं अनवत्थचारिकं अनुयुत्तस्स विहरतो.

‘‘पञ्चिमे, भिक्खवे, आनिसंसा समवत्थचारे. कतमे पञ्च? अस्सुतं सुणाति, सुतं परियोदापेति, सुतेनेकच्चेन विसारदो होति, न गाळ्हं रोगातङ्कं फुसति, मित्तवा च होति. इमे खो, भिक्खवे, पञ्च आनिसंसा समवत्थचारे’’ति. पठमं.