५. पठमअक्खन्तिसुत्तं

२१५. ‘‘पञ्चिमे, भिक्खवे, आदीनवा अक्खन्तिया. कतमे पञ्च? बहुनो जनस्स अप्पियो होति अमनापो, वेरबहुलो च होति, वज्जबहुलो च, सम्मूळ्हो कालं करोति, कायस्स भेदा परं मरणा अपायं दुग्गतिं विनिपातं निरयं उपपज्जति. इमे खो, भिक्खवे, पञ्च आदीनवा अक्खन्तिया.

‘‘पञ्चिमे, भिक्खवे, आनिसंसा खन्तिया. कतमे पञ्च? बहुनो जनस्स पियो होति मनापो, न वेरबहुलो होति, न वज्जबहुलो, असम्मूळ्हो कालं करोति, कायस्स भेदा परं मरणा सुगतिं सग्गं लोकं उपपज्जति. इमे खो, भिक्खवे, पञ्च आनिसंसा खन्तिया’’ति. पञ्चमं.