९. भोजनसुत्तं

३७. ‘‘भोजनं, भिक्खवे, ददमानो दायको पटिग्गाहकानं पञ्च ठानानि देति. कतमानि पञ्च? आयुं देति, वण्णं देति, सुखं देति, बलं देति, पटिभानं [पटिभाणं (सी.)] देति. आयुं खो पन दत्वा आयुस्स भागी होति दिब्बस्स वा मानुसस्स वा; वण्णं दत्वा वण्णस्स भागी होति दिब्बस्स वा मानुसस्स वा; सुखं दत्वा सुखस्स भागी होति दिब्बस्स वा मानुसस्स वा; बलं दत्वा बलस्स भागी होति दिब्बस्स वा मानुसस्स वा; पटिभानं दत्वा पटिभानस्स भागी होति दिब्बस्स वा मानुसस्स वा. भोजनं, भिक्खवे, ददमानो दायको पटिग्गाहकानं इमानि पञ्च ठानानि देती’’ति.

‘‘आयुदो बलदो धीरो, वण्णदो पटिभानदो;

सुखस्स दाता मेधावी, सुखं सो अधिगच्छति.

‘‘आयुं दत्वा बलं वण्णं, सुखञ्च पटिभानकं [पटिभाणकं (सी.), पटिभानदो (स्या. कं. पी. क.)];

दीघायु यसवा होति, यत्थ यत्थूपपज्जती’’ति. सत्तमं;