५. रूपसुत्तं

६५. ‘‘चत्तारोमे, भिक्खवे, पुग्गला सन्तो संविज्जमाना लोकस्मिं. कतमे चत्तारो? रूपप्पमाणो रूपप्पसन्नो, घोसप्पमाणो घोसप्पसन्नो, लूखप्पमाणो लूखप्पसन्नो, धम्मप्पमाणो धम्मप्पसन्नो – इमे खो, भिक्खवे, चत्तारो पुग्गला सन्तो संविज्जमाना लोकस्मि’’न्ति.

‘‘ये च रूपे पमाणिंसु [ये च रूपेन पामिंसु (सी. स्या. कं. पी.)], ये च घोसेन अन्वगू;

छन्दरागवसूपेता, नाभिजानन्ति ते जना [न ते जानन्ति तं जना (सी. स्या. कं. पी.)].

‘‘अज्झत्तञ्च न जानाति, बहिद्धा च न पस्सति;

समन्तावरणो बालो, स वे घोसेन वुय्हति.

‘‘अज्झत्तञ्च न जानाति, बहिद्धा च विपस्सति;

बहिद्धा फलदस्सावी, सोपि घोसेन वुय्हति.

‘‘अज्झत्तञ्च पजानाति, बहिद्धा च विपस्सति;

विनीवरणदस्सावी, न सो घोसेन वुय्हती’’ति. पञ्चमं;