४. दुतियसंवाससुत्तं

५४. ‘‘चत्तारोमे, भिक्खवे, संवासा. कतमे चत्तारो? छवो छवाय सद्धिं संवसति, छवो देविया सद्धिं संवसति, देवो छवाय सद्धिं संवसति, देवो देविया सद्धिं संवसति.

‘‘कथञ्च, भिक्खवे, छवो छवाय सद्धिं संवसति. इध, भिक्खवे, सामिको होति पाणातिपाती अदिन्नादायी कामेसुमिच्छाचारी मुसावादी पिसुणवाचो फरुसवाचो सम्फप्पलापी अभिज्झालु ब्यापन्नचित्तो मिच्छादिट्ठिको दुस्सीलो पापधम्मो मच्छेरमलपरियुट्ठितेन चेतसा अगारं अज्झावसति अक्कोसकपरिभासको समणब्राह्मणानं; भरियापिस्स होति पाणातिपातिनी अदिन्नादायिनी कामेसुमिच्छाचारिनी मुसावादिनी पिसुणवाचा फरुसवाचा सम्फप्पलापिनी अभिज्झालुनी ब्यापन्नचित्ता मिच्छादिट्ठिका दुस्सीला पापधम्मा मच्छेरमलपरियुट्ठितेन चेतसा अगारं अज्झावसति अक्कोसिकपरिभासिका समणब्राह्मणानं. एवं खो, भिक्खवे, छवो छवाय सद्धिं संवसति.

‘‘कथञ्च, भिक्खवे, छवो देविया सद्धिं संवसति? इध, भिक्खवे, सामिको होति पाणातिपाती…पे… मिच्छादिट्ठिको दुस्सीलो पापधम्मो मच्छेरमलपरियुट्ठितेन चेतसा अगारं अज्झावसति अक्कोसकपरिभासको समणब्राह्मणानं; भरिया ख्वस्स होति पाणातिपाता पटिविरता अदिन्नादाना पटिविरता कामेसुमिच्छाचारा पटिविरता मुसावादा पटिविरता पिसुणाय वाचाय पटिविरता फरुसाय वाचाय पटिविरता सम्फप्पलापा पटिविरता अनभिज्झालुनी अब्यापन्नचित्ता सम्मादिट्ठिका सीलवती कल्याणधम्मा विगतमलमच्छेरेन चेतसा अगारं अज्झावसति अनक्कोसिकपरिभासिका समणब्राह्मणानं. एवं खो, भिक्खवे, छवो देविया सद्धिं संवसति.

‘‘कथञ्च, भिक्खवे, देवो छवाय सद्धिं संवसति? इध, भिक्खवे, सामिको होति पाणातिपाता पटिविरतो अदिन्नादाना पटिविरतो कामेसुमिच्छाचारा पटिविरतो मुसावादा पटिविरतो पिसुणाय वाचाय पटिविरतो फरुसाय वाचाय पटिविरतो सम्फप्पलापा पटिविरतो अनभिज्झालु अब्यापन्नचित्तो सम्मादिट्ठिको सीलवा कल्याणधम्मो विगतमलमच्छेरेन चेतसा अगारं अज्झावसति अनक्कोसकपरिभासको समणब्राह्मणानं; भरिया ख्वस्स होति पाणातिपातिनी…पे… मिच्छादिट्ठिका दुस्सीला पापधम्मा मच्छेरमलपरियुट्ठितेन चेतसा अगारं अज्झावसति अक्कोसिकपरिभासिका समणब्राह्मणानं. एवं खो, भिक्खवे, देवो छवाय सद्धिं संवसति.

‘‘कथञ्च, भिक्खवे, देवो देविया सद्धिं संवसति? इध, भिक्खवे, सामिको होति पाणातिपाता पटिविरतो…पे… सम्मादिट्ठिको सीलवा कल्याणधम्मो विगतमलमच्छेरेन चेतसा अगारं अज्झावसति अनक्कोसकपरिभासको समणब्राह्मणानं; भरियापिस्स होति पाणातिपाता पटिविरता…पे… सम्मादिट्ठिका सीलवती कल्याणधम्मा विगतमलमच्छेरेन चेतसा अगारं अज्झावसति अनक्कोसिकपरिभासिका समणब्राह्मणानं. एवं खो, भिक्खवे, देवो देविया सद्धिं संवसति. इमे खो, भिक्खवे, चत्तारो संवासा’’ति.

‘‘उभो च होन्ति दुस्सीला, कदरिया परिभासका;

ते होन्ति जानिपतयो, छवा संवासमागता.

‘‘सामिको होति दुस्सीलो, कदरियो परिभासको;

भरिया सीलवती होति, वदञ्ञू वीतमच्छरा;

सापि देवी संवसति, छवेन पतिना सह.

‘‘सामिको सीलवा होति, वदञ्ञू वीतमच्छरो;

भरिया होति दुस्सीला, कदरिया परिभासिका;

सापि छवा संवसति, देवेन पतिना सह.

‘‘उभो सद्धा वदञ्ञू च, सञ्ञता धम्मजीविनो;

ते होन्ति जानिपतयो, अञ्ञमञ्ञं पियंवदा.

‘‘अत्थासं पचुरा होन्ति, फासुकं उपजायति;

अमित्ता दुम्मना होन्ति, उभिन्नं समसीलिनं.

‘‘इध धम्मं चरित्वान, समसीलब्बता उभो;

नन्दिनो देवलोकस्मिं, मोदन्ति कामकामिनो’’ति. चतुत्थं;