८. पतिलीनसुत्तं

३८. ‘‘पनुण्णपच्चेकसच्चो [पणुन्नपच्चेकसच्चो (?)], भिक्खवे, भिक्खु ‘समवयसट्ठेसनो पस्सद्धकायसङ्खारो पतिलीनो’ति वुच्चति. कथञ्च, भिक्खवे, भिक्खु पनुण्णपच्चेकसच्चो होति? इध, भिक्खवे, भिक्खुनो यानि तानि पुथुसमणब्राह्मणानं पुथुपच्चेकसच्चानि, सेय्यथिदं – सस्सतो लोकोति वा, असस्सतो लोकोति वा, अन्तवा लोकोति वा, अनन्तवा लोकोति वा, तं जीवं तं सरीरन्ति वा, अञ्ञं जीवं अञ्ञं सरीरन्ति वा, होति तथागतो परं मरणाति वा, न होति तथागतो परं मरणाति वा, होति च न च होति तथागतो परं मरणाति वा, नेव होति न न होति तथागतो परं मरणाति वा; सब्बानि तानि नुण्णानि होन्ति पनुण्णानि चत्तानि वन्तानि मुत्तानि पहीनानि पटिनिस्सट्ठानि. एवं खो, भिक्खवे, भिक्खु पनुण्णपच्चेकसच्चो होति.

‘‘कथञ्च, भिक्खवे, भिक्खु समवयसट्ठेसनो होति? इध, भिक्खवे, भिक्खुनो कामेसना पहीना होति, भवेसना पहीना होति, ब्रह्मचरियेसना पटिप्पस्सद्धा. एवं खो, भिक्खवे, भिक्खु समवयसट्ठेसनो होति.

‘‘कथञ्च, भिक्खवे, भिक्खु पस्सद्धकायसङ्खारो होति? इध, भिक्खवे, भिक्खु सुखस्स च पहाना दुक्खस्स च पहाना पुब्बेव सोमनस्सदोमनस्सानं अत्थङ्गमा अदुक्खमसुखं उपेक्खासतिपारिसुद्धिं चतुत्थं झानं उपसम्पज्ज विहरति. एवं खो, भिक्खवे, भिक्खु पस्सद्धकायसङ्खारो होति.

‘‘कथञ्च, भिक्खवे, भिक्खु पतिलीनो होति? इध, भिक्खवे, भिक्खुनो अस्मिमानो पहीनो होति उच्छिन्नमूलो तालावत्थुकतो अनभावंकतो आयतिं अनुप्पादधम्मो. एवं खो, भिक्खवे, भिक्खु पतिलीनो होति. पनुण्णपच्चेकसच्चो, भिक्खवे, भिक्खु ‘समवयसट्ठेसनो पस्सद्धकायसङ्खारो पतिलीनो’ति वुच्चती’’ति.

[इतिवु. ५५ इतिवुत्तकेपि] ‘‘कामेसना भवेसना, ब्रह्मचरियेसना सह;

इति सच्चपरामासो, दिट्ठिट्ठाना समुस्सया.

[इतिवु. ५५ इतिवुत्तकेपि] ‘‘सब्बरागविरत्तस्स, तण्हक्खयविमुत्तिनो;

एसना पटिनिस्सट्ठा, दिट्ठिट्ठाना समूहता.

‘‘स वे सन्तो सतो भिक्खु, पस्सद्धो अपराजितो;

मानाभिसमया बुद्धो, पतिलीनोति वुच्चती’’ति. अट्ठमं;