२. सङ्गहसुत्तं

३२. ‘‘चत्तारिमानि, भिक्खवे, सङ्गहवत्थूनि. कतमानि चत्तारि? दानं, पेय्यवज्जं, अत्थचरिया, समानत्तता – इमानि खो, भिक्खवे, चत्तारि सङ्गहवत्थूनी’’ति.

‘‘दानञ्च पेय्यवज्जञ्च [सङ्गहे (अट्ठकथायं पाठन्तरं) दी. नि. ३.२७३ पस्सितब्बं], अत्थचरिया च या इध;

समानत्तता च धम्मेसु, तत्थ तत्थ यथारहं;

एते खो सङ्गहा लोके, रथस्साणीव यायतो.

‘‘एते च सङ्गहा नास्सु, न माता पुत्तकारणा;

लभेथ मानं पूजं वा, पिता वा पुत्तकारणा.

‘‘यस्मा च सङ्गहा [सङ्गहे (अट्ठकथायं पाठन्तरं) दी. नि. ३.२७३ पस्सितब्बं] एते, समवेक्खन्ति पण्डिता;

तस्मा महत्तं पप्पोन्ति, पासंसा च भवन्ति ते’’ति. दुतियं;