३. सीहसुत्तं

३३. ‘‘सीहो, भिक्खवे, मिगराजा सायन्हसमयं आसया निक्खमति. आसया निक्खमित्वा विजम्भति. विजम्भित्वा समन्ता चतुद्दिसा अनुविलोकेति. समन्ता चतुद्दिसा अनुविलोकेत्वा तिक्खत्तुं सीहनादं नदति. तिक्खत्तुं सीहनादं नदित्वा गोचराय पक्कमति. ये खो पन ते, भिक्खवे, तिरच्छानगता पाणा सीहस्स मिगरञ्ञो नदतो सद्दं सुणन्ति, ते येभुय्येन भयं संवेगं सन्तासं आपज्जन्ति. बिलं बिलासया पविसन्ति, दकं दकासया [उदकं उदकासया (क.) सं. नि. ३.७८; पटि. म. अट्ठ. १.१.३७ पस्सितब्बं] पविसन्ति, वनं वनासया पविसन्ति, आकासं पक्खिनो भजन्ति. येपि ते, भिक्खवे, रञ्ञो नागा गामनिगमराजधानीसु दळ्हेहि वरत्तेहि बन्धनेहि बद्धा, तेपि तानि बन्धनानि सञ्छिन्दित्वा सम्पदालेत्वा भीता मुत्तकरीसं चजमाना येन वा तेन वा पलायन्ति. एवं महिद्धिको खो, भिक्खवे, सीहो मिगराजा तिरच्छानगतानं पाणानं, एवं महेसक्खो एवं महानुभावो.

‘‘एवमेवं खो, भिक्खवे, यदा तथागतो लोके उप्पज्जति अरहं सम्मासम्बुद्धो विज्जाचरणसम्पन्नो सुगतो लोकविदू अनुत्तरो पुरिसदम्मसारथि सत्था देवमनुस्सानं बुद्धो भगवा, सो धम्मं देसेति – ‘इति सक्कायो, इति सक्कायसमुदयो, इति सक्कायनिरोधो [सक्कायस्स अत्थङ्गमो (अट्ठ., सं. नि. ३.७८) ‘‘सक्कायनिरोधगामिनी’’ति पच्छिमपदं पन पस्सितब्बं], इति सक्कायनिरोधगामिनी पटिपदा’ति. येपि ते, भिक्खवे, देवा दीघायुका वण्णवन्तो सुखबहुला उच्चेसु विमानेसु चिरट्ठितिका, तेपि तथागतस्स धम्मदेसनं सुत्वा येभुय्येन भयं संवेगं सन्तासं आपज्जन्ति – ‘अनिच्चा वत किर, भो, मयं समाना निच्चम्हाति अमञ्ञिम्ह; अद्धुवा वत किर, भो, मयं समाना धुवम्हाति अमञ्ञिम्ह; असस्सता वत किर, भो, मयं समाना सस्सतम्हाति अमञ्ञिम्ह. मयं किर, भो, अनिच्चा अद्धुवा असस्सता सक्कायपरियापन्ना’ति. एवं महिद्धिको खो, भिक्खवे, तथागतो सदेवकस्स लोकस्स, एवं महेसक्खो एवं महानुभावो’’ति.

‘‘यदा बुद्धो अभिञ्ञाय, धम्मचक्कं पवत्तयी;

सदेवकस्स लोकस्स, सत्था अप्पटिपुग्गलो.

‘‘सक्कायञ्च निरोधञ्च, सक्कायस्स च सम्भवं;

अरियञ्चट्ठङ्गिकं मग्गं, दुक्खूपसमगामिनं.

‘‘येपि दीघायुका देवा, वण्णवन्तो यसस्सिनो;

भीता सन्तासमापादुं, सीहस्सेवि’तरेमिगा.

‘‘अवीतिवत्ता सक्कायं, अनिच्चा किर भो मयं;

सुत्वा अरहतो वाक्यं, विप्पमुत्तस्स तादिनो’’ति [सं. नि. ३.७८]. ततियं;