१. चक्कसुत्तं

३१. ‘‘चत्तारिमानि, भिक्खवे, चक्कानि, येहि समन्नागतानं देवमनुस्सानं चतुचक्कं वत्तति, येहि समन्नागता देवमनुस्सा नचिरस्सेव महन्तत्तं वेपुल्लत्तं पापुणन्ति भोगेसु. कतमानि चत्तारि? पतिरूपदेसवासो, सप्पुरिसावस्सयो [सप्पुरिसूपस्सयो (सी. स्या. कं. पी.)], अत्तसम्मापणिधि, पुब्बे च कतपुञ्ञता – इमानि खो, भिक्खवे, चत्तारि चक्कानि, येहि समन्नागतानं देवमनुस्सानं चतुचक्कं वत्तति, येहि समन्नागता देवमनुस्सा नचिरस्सेव महन्तत्तं वेपुल्लत्तं पापुणन्ति भोगेसू’’ति.

‘‘पतिरूपे वसे देसे, अरियमित्तकरो सिया;

सम्मापणिधिसम्पन्नो, पुब्बे पुञ्ञकतो नरो;

धञ्ञं धनं यसो कित्ति, सुखञ्चेतंधिवत्तती’’ति. पठमं;