४. दुतियखतसुत्तं

४. ‘‘चतूसु, भिक्खवे, मिच्छा पटिपज्जमानो बालो अब्यत्तो असप्पुरिसो खतं उपहतं अत्तानं परिहरति सावज्जो च होति सानुवज्जो च विञ्ञूनं, बहुञ्च अपुञ्ञं पसवति. कतमेसु चतूसु? मातरि, भिक्खवे, मिच्छा पटिपज्जमानो बालो अब्यत्तो असप्पुरिसो खतं उपहतं अत्तानं परिहरति, सावज्जो च होति सानुवज्जो च विञ्ञूनं, बहुञ्च अपुञ्ञं पसवति. पितरि, भिक्खवे, मिच्छा पटिपज्जमानो…पे… तथागते, भिक्खवे, मिच्छा पटिपज्जमानो…पे… तथागतसावके, भिक्खवे, मिच्छा पटिपज्जमानो बालो अब्यत्तो असप्पुरिसो खतं उपहतं अत्तानं परिहरति, सावज्जो च होति सानुवज्जो च विञ्ञूनं, बहुञ्च अपुञ्ञं पसवति. इमेसु खो, भिक्खवे, चतूसु मिच्छा पटिपज्जमानो बालो अब्यत्तो असप्पुरिसो खतं उपहतं अत्तानं परिहरति, सावज्जो च होति सानुवज्जो च विञ्ञूनं, बहुञ्च अपुञ्ञं पसवति.

‘‘चतूसु, भिक्खवे, सम्मा पटिपज्जमानो पण्डितो वियत्तो सप्पुरिसो अक्खतं अनुपहतं अत्तानं परिहरति, अनवज्जो च होति अननुवज्जो च विञ्ञूनं, बहुञ्च पुञ्ञं पसवति. कतमेसु चतूसु? मातरि, भिक्खवे, सम्मा पटिपज्जमानो पण्डितो वियत्तो सप्पुरिसो अक्खतं अनुपहतं अत्तानं परिहरति, अनवज्जो च होति अननुवज्जो च विञ्ञूनं, बहुञ्च पुञ्ञं पसवति. पितरि, भिक्खवे, सम्मा पटिपज्जमानो…पे… तथागते, भिक्खवे, सम्मा पटिपज्जमानो…पे… तथागतसावके, भिक्खवे, सम्मा पटिपज्जमानो पण्डितो वियत्तो सप्पुरिसो अक्खतं अनुपहतं अत्तानं परिहरति, अनवज्जो च होति अननुवज्जो च विञ्ञूनं, बहुञ्च पुञ्ञं पसवति. इमेसु खो, भिक्खवे, चतूसु सम्मा पटिपज्जमानो पण्डितो वियत्तो सप्पुरिसो अक्खतं अनुपहतं अत्तानं परिहरति, अनवज्जो च होति अननुवज्जो च विञ्ञूनं, बहुञ्च पुञ्ञं पसवती’’ति.

‘‘मातरि पितरि चापि, यो मिच्छा पटिपज्जति;

तथागते वा सम्बुद्धे, अथ वा तस्स सावके;

बहुञ्च सो पसवति, अपुञ्ञं तादिसो नरो.

‘‘ताय नं अधम्मचरियाय [ताय अधम्मचरियाय (सी. स्या. कं. पी.)], मातापितूसु पण्डिता;

इधेव नं गरहन्ति, पेच्चापायञ्च गच्छति.

‘‘मातरि पितरि चापि, यो सम्मा पटिपज्जति;

तथागते वा सम्बुद्धे, अथ वा तस्स सावके;

बहुञ्च सो पसवति, पुञ्ञं एतादिसो [पुञ्ञम्पि तादिसो (सी. स्या. कं.)] नरो.

‘‘ताय नं धम्मचरियाय, मातापितूसु पण्डिता;

इधेव [इध चेव (सी.)] नं पसंसन्ति, पेच्च सग्गे पमोदती’’ति [सग्गे च मोदतीति (सी.)]. चतुत्थं;