५. राजन्तेपुरप्पवेसनसुत्तं

४५. [पाचि. ४९७] ‘‘दसयिमे, भिक्खवे, आदीनवा राजन्तेपुरप्पवेसने. कतमे दस? इध, भिक्खवे, राजा महेसिया सद्धिं निसिन्नो होति. तत्र भिक्खु पविसति. महेसी वा भिक्खुं दिस्वा सितं पातुकरोति, भिक्खु वा महेसिं दिस्वा सितं पातुकरोति. तत्थ रञ्ञो एवं होति – ‘अद्धा इमेसं कतं वा करिस्सन्ति वा’ति! अयं, भिक्खवे, पठमो आदीनवो राजन्तेपुरप्पवेसने.

‘‘पुन चपरं, भिक्खवे, राजा बहुकिच्चो बहुकरणीयो अञ्ञतरं इत्थिं गन्त्वा न सरति – ‘सा तेन गब्भं गण्हाति’. तत्थ रञ्ञो एवं होति – ‘न खो इध अञ्ञो कोचि पविसति, अञ्ञत्र पब्बजितेन. सिया नु खो पब्बजितस्स कम्म’न्ति. अयं, भिक्खवे, दुतियो आदीनवो राजन्तेपुरप्पवेसने.

‘‘पुन चपरं, भिक्खवे, रञ्ञो अन्तेपुरे अञ्ञतरं रतनं नस्सति. तत्थ रञ्ञो एवं होति – ‘न खो इध अञ्ञो कोचि पविसति, अञ्ञत्र पब्बजितेन. सिया नु खो पब्बजितस्स कम्म’न्ति. अयं, भिक्खवे, ततियो आदीनवो राजन्तेपुरप्पवेसने.

‘‘पुन चपरं, भिक्खवे, रञ्ञो अन्तेपुरे अब्भन्तरा गुय्हमन्ता बहिद्धा सम्भेदं गच्छन्ति. तत्थ रञ्ञो एवं होति – ‘न खो इध अञ्ञो कोचि पविसति, अञ्ञत्र पब्बजितेन. सिया नु खो पब्बजितस्स कम्म’न्ति. अयं, भिक्खवे, चतुत्थो आदीनवो राजन्तेपुरप्पवेसने.

‘‘पुन चपरं, भिक्खवे, रञ्ञो अन्तेपुरे पिता वा पुत्तं पत्थेति पुत्तो वा पितरं पत्थेति. तेसं एवं होति – ‘न खो इध अञ्ञो कोचि पविसति, अञ्ञत्र पब्बजितेन. सिया नु खो पब्बजितस्स कम्म’न्ति. अयं, भिक्खवे, पञ्चमो आदीनवो राजन्तेपुरप्पवेसने.

‘‘पुन चपरं, भिक्खवे, राजा नीचट्ठानियं उच्चे ठाने ठपेति. येसं तं अमनापं तेसं एवं होति – ‘राजा खो पब्बजितेन संसट्ठो. सिया नु खो पब्बजितस्स कम्म’न्ति. अयं, भिक्खवे, छट्ठो आदीनवो राजन्तेपुरप्पवेसने.

‘‘पुन चपरं, भिक्खवे, राजा उच्चट्ठानियं नीचे ठाने ठपेति. येसं तं अमनापं तेसं एवं होति – ‘राजा खो पब्बजितेन संसट्ठो. सिया नु खो पब्बजितस्स कम्म’न्ति. अयं, भिक्खवे, सत्तमो आदीनवो राजन्तेपुरप्पवेसने.

‘‘पुन चपरं, भिक्खवे, राजा अकाले सेनं उय्योजेति. येसं तं अमनापं तेसं एवं होति – ‘राजा खो पब्बजितेन संसट्ठो. सिया नु खो पब्बजितस्स कम्म’न्ति. अयं, भिक्खवे, अट्ठमो आदीनवो राजन्तेपुरप्पवेसने.

‘‘पुन चपरं, भिक्खवे, राजा काले सेनं उय्योजेत्वा अन्तरामग्गतो निवत्तापेति. येसं तं अमनापं तेसं एवं होति – ‘राजा खो पब्बजितेन संसट्ठो. सिया नु खो पब्बजितस्स कम्म’न्ति. अयं, भिक्खवे, नवमो आदीनवो राजन्तेपुरप्पवेसने.

‘‘पुन चपरं, भिक्खवे, रञ्ञो अन्तेपुरं हत्थिसम्मद्दं अस्ससम्मद्दं रथसम्मद्दं रजनीयानि रूपसद्दगन्धरसफोट्ठब्बानि, यानि न पब्बजितस्स सारुप्पानि. अयं, भिक्खवे, दसमो आदीनवो राजन्तेपुरप्पवेसने. इमे खो, भिक्खवे, दस आदीनवा राजन्तेपुरप्पवेसने’’ति. पञ्चमं.