1. уккот̣анабхеда̄ди
340. [чӯл̣ава. 215; пари. 275] чатта̄ри адхикаран̣а̄ни. вива̄да̄дхикаран̣ам̣, анува̄да̄дхикаран̣ам̣, а̄патта̄дхикаран̣ам̣, кичча̄дхикаран̣ам̣ – има̄ни чатта̄ри адхикаран̣а̄ни.
имесам̣ чатуннам̣ адхикаран̣а̄нам̣ кати уккот̣а̄? имесам̣ чатуннам̣ адхикаран̣а̄нам̣ даса уккот̣а̄. вива̄да̄дхикаран̣асса две уккот̣а̄, анува̄да̄дхикаран̣асса чатта̄ро уккот̣а̄, а̄патта̄дхикаран̣асса тайо уккот̣а̄, кичча̄дхикаран̣асса еко уккот̣о – имесам̣ чатуннам̣ адхикаран̣а̄нам̣ име даса уккот̣а̄.
вива̄да̄дхикаран̣ам̣ уккот̣енто кати саматхе уккот̣ети? анува̄да̄дхикаран̣ам̣ уккот̣енто кати саматхе уккот̣ети? а̄патта̄дхикаран̣ам̣ уккот̣енто кати саматхе уккот̣ети? кичча̄дхикаран̣ам̣ уккот̣енто кати саматхе уккот̣ети?
вива̄да̄дхикаран̣ам̣ уккот̣енто две саматхе уккот̣ети. анува̄да̄дхикаран̣ам̣ уккот̣енто чатта̄ро саматхе уккот̣ети. а̄патта̄дхикаран̣ам̣ уккот̣енто тайо саматхе уккот̣ети. кичча̄дхикаран̣ам̣ уккот̣енто екам̣ саматхам̣ уккот̣ети.
341. кати уккот̣а̄? катиха̄ка̄рехи уккот̣анам̣ пасавати? катихан̇гехи саманна̄гато пуггало адхикаран̣ам̣ уккот̣ети? кати пуггала̄ адхикаран̣ам̣ уккот̣ента̄ а̄паттим̣ а̄паджджанти?
два̄даса уккот̣а̄. дасаха̄ка̄рехи уккот̣анам̣ пасавати. чатӯхан̇гехи саманна̄гато пуггало адхикаран̣ам̣ уккот̣ети. чатта̄ро пуггала̄ адхикаран̣ам̣ уккот̣ента̄ а̄паттим̣ а̄паджджанти?
катаме два̄даса уккот̣а̄? акатам̣ каммам̣, дуккат̣ам̣ каммам̣, пуна ка̄таббам̣ каммам̣, анихатам̣, дуннихатам̣, пуна ниханитаббам̣, авиниччхитам̣, дувиниччхитам̣, пуна виниччхитаббам̣, авӯпасантам̣, дувӯпасантам̣, пуна вӯпасаметаббанти – име два̄даса уккот̣а̄.
катамехи дасаха̄ка̄рехи уккот̣анам̣ пасавати? таттха джа̄такам̣ адхикаран̣ам̣ уккот̣ети, таттха джа̄такам̣ вӯпасантам̣ адхикаран̣ам̣ уккот̣ети, антара̄магге адхикаран̣ам̣ уккот̣ети, антара̄магге вӯпасантам̣ адхикаран̣ам̣ уккот̣ети, таттха гатам̣ адхикаран̣ам̣ уккот̣ети, таттха гатам̣ вӯпасантам̣ адхикаран̣ам̣ уккот̣ети, сативинайам̣ уккот̣ети, амӯл̣хавинайам̣ уккот̣ети, тассапа̄пийасикам̣ уккот̣ети, тин̣аваттха̄ракам̣ уккот̣ети – имехи дасаха̄ка̄рехи уккот̣анам̣ пасавати.
катамехи чатӯхан̇гехи саманна̄гато пуггало адхикаран̣ам̣ уккот̣ети? чханда̄гатим̣ гаччханто адхикаран̣ам̣ уккот̣ети, доса̄гатим̣ гаччханто адхикаран̣ам̣ уккот̣ети, моха̄гатим̣ гаччханто адхикаран̣ам̣ уккот̣ети, бхайа̄гатим̣ гаччханто адхикаран̣ам̣ уккот̣ети – имехи чатӯхан̇гехи саманна̄гато пуггало адхикаран̣ам̣ уккот̣ети.
катаме чатта̄ро пуггала̄ адхикаран̣ам̣ уккот̣ента̄ а̄паттим̣ а̄паджджанти? тадахупасампанно уккот̣ети уккот̣анакам̣ па̄читтийам̣, а̄гантуко уккот̣ети уккот̣анакам̣ па̄читтийам̣, ка̄рако уккот̣ети уккот̣анакам̣ па̄читтийам̣, чхандада̄йако уккот̣ети уккот̣анакам̣ па̄читтийам̣ – име чатта̄ро пуггала̄ адхикаран̣ам̣ уккот̣ента̄ а̄паттим̣ а̄паджджанти.