5. па̄ра̄джика̄диа̄патти

339. ‘па̄ра̄джика’нти йам̣ вуттам̣, там̣ сун̣охи йатха̄татхам̣;

чуто параддхо бхат̣т̣хо ча, саддхамма̄ хи ниран̇като;

сам̣ва̄сопи тахим̣ наттхи, тенетам̣ ити вуччати.

‘сан̇гха̄дисесо’ти йам̣ вуттам̣, там̣ сун̣охи йатха̄татхам̣;

сан̇гхова дети парива̄сам̣, мӯла̄йа пат̣икассати;

ма̄наттам̣ дети аббхети, тенетам̣ ити вуччати.

‘анийато’ти йам̣ вуттам̣, там̣ сун̣охи йатха̄татхам̣;

анийато на нийато, анекам̣сикатам̣ падам̣;

тин̣н̣аман̃н̃атарам̣ т̣ха̄нам̣, ‘анийато’ти павуччати.

‘тхуллаччайа’нти йам̣ вуттам̣, там̣ сун̣охи йатха̄татхам̣;

екасса мӯле йо десети, йо ча там̣ пат̣иган̣хати;

аччайо тена само наттхи, тенетам̣ ити вуччати.

‘ниссаггийа’нти йам̣ вуттам̣, там̣ сун̣охи йатха̄татхам̣;

сан̇гхамаджджхе ган̣амаджджхе, екассева ча екато;

ниссаджджитва̄на десети, тенетам̣ ити вуччати.

‘па̄читтийа’нти йам̣ вуттам̣, там̣ сун̣охи йатха̄татхам̣;

па̄тети кусалам̣ дхаммам̣, арийамаггам̣ апараджджхати;

читтасам̣моханат̣т̣ха̄нам̣, тенетам̣ ити вуччати.

‘па̄т̣идесанӣйа’нти йам̣ вуттам̣, там̣ сун̣охи йатха̄татхам̣;

бхиккху ан̃н̃а̄тако санто, киччха̄ ладдха̄йа бходжанам̣;

са̄мам̣ гахетва̄ бхун̃джеййа, ‘га̄райха’нти павуччати.

нимантана̄су бхун̃джанта̄ чханда̄йа, воса̄сати таттха бхиккхуним̣;

анива̄ретва̄ тахим̣ бхун̃дже, га̄райханти павуччати.

саддха̄читтам̣ кулам̣ гантва̄, аппабхогам̣ ана̄л̣ийам̣ [ана̄л̣хийам̣ (сӣ. сйа̄.)];

агила̄но тахим̣ бхун̃дже, га̄райханти павуччати.

йо че аран̃н̃е вихаранто, са̄сан̇ке сабхайа̄наке;

авидитам̣ тахим̣ бхун̃дже, га̄райханти павуччати.

бхиккхунӣ ан̃н̃а̄тика̄ санта̄, йам̣ паресам̣ мама̄йитам̣;

саппи телам̣ мадхум̣ пха̄н̣итам̣, маччхамам̣сам̣ атхо кхӣрам̣;

дадхим̣ сайам̣ вин̃н̃а̄пеййа бхиккхунӣ, га̄райхапатта̄ сугатасса са̄сане.

‘дуккат̣а’нти йам̣ вуттам̣, там̣ сун̣охи йатха̄татхам̣;

апараддхам̣ вираддхан̃ча, кхалитам̣ йан̃ча дуккат̣ам̣.

йам̣ мануссо каре па̄пам̣, а̄ви ва̄ йади ва̄ рахо;

‘дуккат̣а’нти паведенти, тенетам̣ ити вуччати.

‘дуббха̄сита’нти йам̣ вуттам̣, там̣ сун̣охи йатха̄татхам̣;

дуббха̄ситам̣ дура̄бхат̣т̣хам̣, сам̣килит̣т̣хан̃ча йам̣ падам̣;

йан̃ча вин̃н̃ӯ гараханти, тенетам̣ ити вуччати.

‘секхийа’нти йам̣ вуттам̣, там̣ сун̣охи йатха̄татхам̣;

секкхасса сиккхама̄насса, уджумагга̄нуса̄рино.

а̄ди четам̣ чаран̣ан̃ча, мукхам̣ сан̃н̃амасам̣варо;

сиккха̄ ета̄дисӣ наттхи, тенетам̣ ити вуччати.

[уда̄. 45 уда̄непи] чханнамативассати, виват̣ам̣ на̄тивассати;

тасма̄ чханнам̣ виваретха, евам̣ там̣ на̄тивассати.

гати мига̄нам̣ паванам̣, а̄ка̄со паккхинам̣ гати;

вибхаво гати дхамма̄нам̣, нибба̄нам̣ арахато гатӣти.

га̄тха̄сан̇ган̣икам̣.

тассудда̄нам̣ –

саттанагаресу пан̃н̃атта̄, випатти чатуропи ча;

бхиккхӯнам̣ бхиккхунӣнан̃ча, са̄дха̄ран̣а̄ аса̄дха̄ран̣а̄;

са̄санам̣ ануггаха̄йа, га̄тха̄сан̇ган̣икам̣ иданти.

га̄тха̄сан̇ган̣икам̣ нит̣т̣хитам̣.