1. каммавагго

482. чатта̄ри камма̄ни. апалоканакаммам̣, н̃аттикаммам̣, н̃аттидутийакаммам̣, н̃аттичатуттхакаммам̣ – има̄ни чатта̄ри камма̄ни. катиха̄ка̄рехи випаджджанти? има̄ни чатта̄ри камма̄ни пан̃чаха̄ка̄рехи випаджджанти – ваттхуто ва̄ н̃аттито ва̄ анусса̄ванато ва̄ сӣмато ва̄ парисато ва̄.

483. катхам̣ ваттхуто камма̄ни випаджджанти? саммукха̄каран̣ӣйам̣ каммам̣ асаммукха̄ кароти, ваттхувипаннам̣ адхаммакаммам̣; пат̣ипуччха̄каран̣ӣйам̣ каммам̣ апат̣ипуччха̄ кароти, ваттхувипаннам̣ адхаммакаммам̣; пат̣ин̃н̃а̄йа каран̣ӣйам̣ каммам̣ апат̣ин̃н̃а̄йа кароти, ваттхувипаннам̣ адхаммакаммам̣; сативинайа̄рахасса амӯл̣хавинайам̣ дети, ваттхувипаннам̣ адхаммакаммам̣; амӯл̣хавинайа̄рахасса тассапа̄пийасика̄каммам̣ кароти, ваттхувипаннам̣ адхаммакаммам̣; тассапа̄пийасика̄камма̄рахасса таджджанӣйакаммам̣ кароти, ваттхувипаннам̣ адхаммакаммам̣; таджджанӣйакамма̄рахасса нийассакаммам̣ кароти, ваттхувипаннам̣ адхаммакаммам̣; нийассакамма̄рахасса пабба̄джанӣйакаммам̣ кароти, ваттхувипаннам̣ адхаммакаммам̣; пабба̄джанӣйакамма̄рахасса пат̣иса̄ран̣ӣйакаммам̣ кароти, ваттхувипаннам̣ адхаммакаммам̣; пат̣иса̄ран̣ӣйакамма̄рахасса уккхепанӣйакаммам̣ кароти, ваттхувипаннам̣ адхаммакаммам̣; уккхепанӣйакамма̄рахасса парива̄сам̣ дети, ваттхувипаннам̣ адхаммакаммам̣; парива̄са̄рахам̣ мӯла̄йа пат̣икассати, ваттхувипаннам̣ адхаммакаммам̣; мӯла̄йапат̣икассана̄рахасса ма̄наттам̣ дети, ваттхувипаннам̣ адхаммакаммам̣; ма̄натта̄рахам̣ аббхети, ваттхувипаннам̣ адхаммакаммам̣; аббха̄на̄рахам̣ упасампа̄дети, ваттхувипаннам̣ адхаммакаммам̣; анупосатхе упосатхам̣ кароти, ваттхувипаннам̣ адхаммакаммам̣; апава̄ран̣а̄йа пава̄рети, ваттхувипаннам̣ адхаммакаммам̣. евам̣ ваттхуто камма̄ни випаджджанти.

484. катхам̣ н̃аттито камма̄ни випаджджанти? пан̃чаха̄ка̄рехи н̃аттито камма̄ни випаджджанти – ваттхум̣ на пара̄масати, сан̇гхам̣ на пара̄масати, пуггалам̣ на пара̄масати, н̃аттим̣ на пара̄масати, паччха̄ ва̄ н̃аттим̣ т̣хапети – имехи пан̃чаха̄ка̄рехи н̃аттито камма̄ни випаджджанти.

485. катхам̣ анусса̄ванато камма̄ни випаджджанти? пан̃чаха̄ка̄рехи анусса̄ванато камма̄ни випаджджанти – ваттхум̣ на пара̄масати, сан̇гхам̣ на пара̄масати, пуггалам̣ на пара̄масати, са̄ванам̣ ха̄пети, ака̄ле ва̄ са̄вети – имехи пан̃чаха̄ка̄рехи анусса̄ванато камма̄ни випаджджанти.

486. катхам̣ сӣмато камма̄ни випаджджанти? ека̄дасахи а̄ка̄рехи сӣмато камма̄ни випаджджанти – атикхуддакам̣ сӣмам̣ самманнати, атимахатим̣ сӣмам̣ самманнати, кхан̣д̣анимиттам̣ сӣмам̣ самманнати, чха̄йа̄нимиттам̣ сӣмам̣ самманнати, анимиттам̣ сӣмам̣ самманнати, бахисӣме т̣хито сӣмам̣ самманнати, надийа̄ сӣмам̣ самманнати, самудде сӣмам̣ самманнати, джа̄тассаре сӣмам̣ самманнати, сӣма̄йа сӣмам̣ самбхиндати, сӣма̄йа сӣмам̣ аджджхоттхарати – имехи ека̄дасахи а̄ка̄рехи сӣмато камма̄ни випаджджанти.

487. катхам̣ парисато камма̄ни випаджджанти? два̄дасахи а̄ка̄рехи парисато камма̄ни випаджджанти – чатуваггакаран̣е камме йа̄ватика̄ бхиккхӯ каммапатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти, чатуваггакаран̣е камме йа̄ватика̄ бхиккхӯ каммапатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти, чатуваггакаран̣е камме йа̄ватика̄ бхиккхӯ каммапатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ пат̣иккосанти. пан̃чаваггакаран̣е камме…пе… дасаваггакаран̣е камме…пе… вӣсативаггакаран̣е камме йа̄ватика̄ бхиккхӯ каммапатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти, вӣсативаггакаран̣е камме йа̄ватика̄ бхиккхӯ каммапатта̄, те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти, вӣсативаггакаран̣е камме йа̄ватика̄ бхиккхӯ каммапатта̄, те а̄гата̄ хонти, чханда̄раха̄нам̣ чхандо а̄хат̣о хоти саммукхӣбхӯта̄ пат̣иккосанти – имехи два̄дасахи а̄ка̄рехи парисато камма̄ни випаджджанти.

488. чатуваггакаран̣е камме чатта̄ро бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо. пан̃чаваггакаран̣е камме пан̃ча бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо. дасаваггакаран̣е камме даса бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо. вӣсативаггакаран̣е камме вӣсати бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо.

489. чатта̄ри камма̄ни – апалоканакаммам̣, н̃аттикаммам̣, н̃аттидутийакаммам̣, н̃аттичатуттхакаммам̣. има̄ни чатта̄ри камма̄ни катиха̄ка̄рехи випаджджанти? има̄ни чатта̄ри камма̄ни пан̃чаха̄ка̄рехи випаджджанти – ваттхуто ва̄ н̃аттито ва̄ анусса̄ванато ва̄ сӣмато ва̄ парисато ва̄.

490. катхам̣ ваттхуто камма̄ни випаджджанти? пан̣д̣акам̣ упасампа̄дети, ваттхувипаннам̣ адхаммакаммам̣. тхеййасам̣ва̄сакам̣ упасампа̄дети, ваттхувипаннам̣ адхаммакаммам̣. титтхийапаккантакам̣ упасампа̄дети, ваттхувипаннам̣ адхаммакаммам̣. тираччха̄нагатам̣ упасампа̄дети, ваттхувипаннам̣ адхаммакаммам̣. ма̄тугха̄такам̣ упасампа̄дети, ваттхувипаннам̣ адхаммакаммам̣. питугха̄такам̣ упасампа̄дети, ваттхувипаннам̣ адхаммакаммам̣. арахантагха̄такам̣ упасампа̄дети, ваттхувипаннам̣ адхаммакаммам̣. бхиккхунидӯсакам̣ упасампа̄дети, ваттхувипаннам̣ адхаммакаммам̣. сан̇гхабхедакам̣ упасампа̄дети, ваттхувипаннам̣ адхаммакаммам̣. лохитуппа̄дакам̣ упасампа̄дети, ваттхувипаннам̣ адхаммакаммам̣. убхатобйан̃джанам̣ упасампа̄дети, ваттхувипаннам̣ адхаммакаммам̣. ӯнавӣсативассам̣ пуггалам̣ упасампа̄дети, ваттхувипаннам̣ адхаммакаммам̣. евам̣ ваттхуто камма̄ни випаджджанти.

491. катхам̣ н̃аттито камма̄ни випаджджанти? пан̃чаха̄ка̄рехи н̃аттито камма̄ни випаджджанти. ваттхум̣ на пара̄масати, сан̇гхам̣ на пара̄масати, пуггалам̣ на пара̄масати, н̃аттим̣ на пара̄масати, паччха̄ ва̄ н̃аттим̣ т̣хапети – имехи пан̃чаха̄ка̄рехи н̃аттито камма̄ни випаджджанти.

492. катхам̣ анусса̄ванато камма̄ни випаджджанти? пан̃чаха̄ка̄рехи анусса̄ванато камма̄ни випаджджанти – ваттхум̣ на пара̄масати, сан̇гхам̣ на пара̄масати, пуггалам̣ на пара̄масати, са̄ванам̣ ха̄пети, ака̄ле ва̄ са̄вети – имехи пан̃чаха̄ка̄рехи анусса̄ванато камма̄ни випаджджанти.

493. катхам̣ сӣмато камма̄ни випаджджанти? ека̄дасахи а̄ка̄рехи сӣмато камма̄ни випаджджанти. атикхуддакам̣ сӣмам̣ самманнати, атимахатим̣ сӣмам̣ самманнати, кхан̣д̣анимиттам̣ сӣмам̣ самманнати, чха̄йа̄нимиттам̣ сӣмам̣ самманнати, анимиттам̣ сӣмам̣ самманнати, бахисӣме т̣хито сӣмам̣ самманнати, надийа̄ сӣмам̣ самманнати, самудде сӣмам̣ самманнати, джа̄тассаре сӣмам̣ самманнати, сӣма̄йа сӣмам̣ самбхиндати, сӣма̄йа сӣмам̣ аджджхоттхарати – имехи ека̄дасахи а̄ка̄рехи сӣмато камма̄ни випаджджанти.

494. катхам̣ парисато камма̄ни випаджджанти? два̄дасахи а̄ка̄рехи парисато камма̄ни випаджджанти – чатуваггакаран̣е камме йа̄ватика̄ бхиккхӯ каммапатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти, чатуваггакаран̣е камме йа̄ватика̄ бхиккхӯ каммапатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти. чатуваггакаран̣е камме йа̄ватика̄ бхиккхӯ каммапатта̄ те а̄гата̄ хонти, чханда̄раха̄нам̣ чхандо а̄хат̣о хоти саммукхӣбхӯта̄ пат̣иккосанти. пан̃чаваггакаран̣е камме…пе… дасаваггакаран̣е камме…пе… вӣсативаггакаран̣е камме йа̄ватика̄ бхиккхӯ каммапатта̄ те ана̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти. вӣсативаггакаран̣е камме йа̄ватика̄ бхиккхӯ каммапатта̄ те а̄гата̄ хонти, чханда̄раха̄нам̣ чхандо ана̄хат̣о хоти, саммукхӣбхӯта̄ пат̣иккосанти. вӣсативаггакаран̣е камме йа̄ватика̄ бхиккхӯ каммапатта̄ те а̄гата̄ хонти, чханда̄раха̄нам̣ чхандо а̄хат̣о хоти, саммукхӣбхӯта̄ пат̣иккосанти – имехи два̄дасахи а̄ка̄рехи парисато камма̄ни випаджджанти.

495. апалоканакаммам̣ кати т̣ха̄на̄ни гаччхати? н̃аттикаммам̣ кати т̣ха̄на̄ни гаччхати? н̃аттидутийакаммам̣ кати т̣ха̄на̄ни гаччхати? н̃аттичатуттхакаммам̣ кати т̣ха̄на̄ни гаччхати? апалоканакаммам̣ пан̃ча т̣ха̄на̄ни гаччхати. н̃аттикаммам̣ нава т̣ха̄на̄ни гаччхати. н̃аттидутийакаммам̣ сатта т̣ха̄на̄ни гаччхати. н̃аттичатуттхакаммам̣ сатта т̣ха̄на̄ни гаччхати.

496. апалоканакаммам̣ катама̄ни пан̃ча т̣ха̄на̄ни гаччхати? оса̄ран̣ам̣, нисса̄ран̣ам̣, бхан̣д̣укаммам̣, брахмадан̣д̣ам̣, каммалаккхан̣ан̃н̃ева пан̃чамам̣ – апалоканакаммам̣ има̄ни пан̃ча т̣ха̄на̄ни гаччхати. н̃аттикаммам̣ катама̄ни нава т̣ха̄на̄ни гаччхати? оса̄ран̣ам̣, нисса̄ран̣ам̣, упосатхам̣, пава̄ран̣ам̣, саммутим̣, да̄нам̣, пат̣иггахам̣, паччуккад̣д̣ханам̣, каммалаккхан̣ан̃н̃ева навамам̣ – н̃аттикаммам̣ има̄ни нава т̣ха̄на̄ни гаччхати. н̃аттидутийакаммам̣ катама̄ни сатта т̣ха̄на̄ни гаччхати? оса̄ран̣ам̣, нисса̄ран̣ам̣, саммутим̣, да̄нам̣, уддхаран̣ам̣, десанам̣, каммалаккхан̣ан̃н̃ева саттамам̣ – н̃аттидутийакаммам̣ има̄ни сатта т̣ха̄на̄ни гаччхати. н̃аттичатуттхакаммам̣ катама̄ни сатта т̣ха̄на̄ни гаччхати? оса̄ран̣ам̣, нисса̄ран̣ам̣, саммутим̣, да̄нам̣, ниггахам̣, саманубха̄санам̣, каммалаккхан̣ан̃н̃ева саттамам̣ – н̃аттичатуттхакаммам̣ има̄ни сатта т̣ха̄на̄ни гаччхати.

497. чатуваггакаран̣е камме чатта̄ро бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо. пан̃чаваггакаран̣е камме пан̃ча бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо. дасаваггакаран̣е камме даса бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо. вӣсативаггакаран̣е камме вӣсати бхиккхӯ пакататта̄ каммапатта̄, авасеса̄ пакататта̄ чханда̄раха̄. йасса сан̇гхо каммам̣ кароти со нева каммапатто на̄пи чханда̄рахо, апи ча камма̄рахо.

каммавагго нит̣т̣хито пат̣хамо.