5. атта̄да̄навагго

436. [чӯл̣ава. 399; а. ни. 10.44] ‘‘чодакена, бханте, бхиккхуна̄ парам̣ чодетука̄мена кати дхамме аджджхаттам̣ паччавеккхитва̄ паро чодетаббо’’ти? ‘‘чодакенупа̄ли, бхиккхуна̄ парам̣ чодетука̄мена пан̃ча дхамме аджджхаттам̣ паччавеккхитва̄ паро чодетаббо. катаме пан̃ча? чодакенупа̄ли, бхиккхуна̄ парам̣ чодетука̄мена евам̣ паччавеккхитаббам̣ – парисуддхака̄йасама̄ча̄ро ну кхомхи, парисуддхенамхи ка̄йасама̄ча̄рена саманна̄гато аччхиддена аппат̣имам̣сена, сам̣виджджати ну кхо ме есо дхаммо уда̄ху но’’ти. но че, упа̄ли, бхиккху парисуддхака̄йасама̄ча̄ро хоти, парисуддхена ка̄йасама̄ча̄рена саманна̄гато аччхиддена аппат̣имам̣сена, тасса бхаванти ватта̄ро – ‘ин̇гха, та̄ва а̄йасма̄ ка̄йикам̣ сиккхассӯ’ти итисса бхаванти ватта̄ро.

‘‘пуна чапарам̣, упа̄ли, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘парисуддхавачӣсама̄ча̄ро ну кхомхи, парисуддхенамхи вачӣсама̄ча̄рена саманна̄гато аччхиддена аппат̣имам̣сена, сам̣виджджати ну кхо ме есо дхаммо уда̄ху но’ти. но че, упа̄ли, бхиккху парисуддхавачӣсама̄ча̄ро хоти, парисуддхена вачӣсама̄ча̄рена саманна̄гато аччхиддена аппат̣имам̣сена, тасса бхаванти ватта̄ро – ‘ин̇гха, та̄ва а̄йасма̄ ва̄часикам̣ сиккхассӯ’ти итисса бхаванти ватта̄ро.

‘‘пуна чапарам̣, упа̄ли, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘меттам̣ ну кхо ме читтам̣ паччупат̣т̣хитам̣ сабрахмача̄рӣсу ана̄гха̄там̣, сам̣виджджати ну кхо ме есо дхаммо уда̄ху но’ти. но че, упа̄ли, бхиккхуно меттам̣ читтам̣ паччупат̣т̣хитам̣ хоти сабрахмача̄рӣсу ана̄гха̄там̣, тасса бхаванти ватта̄ро – ‘ин̇гха, та̄ва а̄йасма̄ сабрахмача̄рӣсу меттам̣ читтам̣ упат̣т̣ха̄пехӣ’ти итисса бхаванти ватта̄ро.

‘‘пуна чапарам̣, упа̄ли, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘бахуссуто ну кхомхи сутадхаро сутасанничайо, йе те дхамма̄ а̄дикалйа̄н̣а̄ маджджхекалйа̄н̣а̄ парийоса̄накалйа̄н̣а̄ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ абхиваданти, татха̄рӯпа̄ ме дхамма̄ бахуссута̄ хонти дха̄та̄ вачаса̄ паричита̄ манаса̄нупеккхита̄ дит̣т̣хийа̄ суппат̣ивиддха̄, сам̣виджджати ну кхо ме есо дхаммо уда̄ху но’ти. но че, упа̄ли, бхиккху бахуссуто хоти сутадхаро сутасанничайо, йе те дхамма̄ а̄дикалйа̄н̣а̄ маджджхекалйа̄н̣а̄ парийоса̄накалйа̄н̣а̄ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ абхиваданти, татха̄рӯпасса дхамма̄ на бахуссута̄ хонти дха̄та̄ вачаса̄ паричита̄ манаса̄нупеккхита̄ дит̣т̣хийа̄ суппат̣ивиддха̄, тасса бхаванти ватта̄ро – ‘ин̇гха, та̄ва а̄йасма̄ а̄гамам̣ парийа̄пун̣ассӯ’ти итисса бхаванти ватта̄ро.

‘‘пуна чапарам̣, упа̄ли, чодакена бхиккхуна̄ парам̣ чодетука̄мена евам̣ паччавеккхитаббам̣ – ‘убхайа̄ни кхо ме па̄тимоккха̄ни виттха̄рена сва̄гата̄ни хонти сувибхатта̄ни суппаваттӣни сувиниччхита̄ни суттасо анубйан̃джанасо, сам̣виджджати ну кхо ме есо дхаммо уда̄ху но’ти. но че, упа̄ли, бхиккхуно убхайа̄ни па̄тимоккха̄ни виттха̄рена сва̄гата̄ни хонти сувибхатта̄ни суппаваттӣни сувиниччхита̄ни суттасо анубйан̃джанасо, ‘идам̣ пана̄вусо каттха вуттам̣ бхагавата̄’ти ити пут̣т̣хо на сампа̄йати [на сампа̄дайати (ка.), на сампа̄дети (сйа̄.)], тасса бхаванти ватта̄ро – ‘ин̇гха, та̄ва а̄йасма̄ винайам̣ парийа̄пун̣ассӯ’ти итисса бхаванти ватта̄ро. чодакенупа̄ли, бхиккхуна̄ парам̣ чодетука̄мена име пан̃ча дхамме аджджхаттам̣ паччавеккхитва̄ паро чодетаббо’’ти.

437. ‘‘чодакена, бханте, бхиккхуна̄ парам̣ чодетука̄мена кати дхамме аджджхаттам̣ упат̣т̣ха̄петва̄ паро чодетаббо’’ти? ‘‘чодакенупа̄ли, бхиккхуна̄ парам̣ чодетука̄мена пан̃ча дхамме аджджхаттам̣ упат̣т̣ха̄петва̄ паро чодетаббо. катаме пан̃ча? ка̄лена ваккха̄ми но ака̄лена, бхӯтена ваккха̄ми но абхӯтена, сан̣хена ваккха̄ми но пхарусена, аттхасам̣хитена ваккха̄ми но анаттхасам̣хитена, метта̄читто ваккха̄ми но досантароти – чодакенупа̄ли, бхиккхуна̄ парам̣ чодетука̄мена име пан̃ча дхамме аджджхаттам̣ упат̣т̣ха̄петва̄ паро чодетаббо’’ти.

438. [чӯл̣ава. 400] ‘‘чодакена, бханте, бхиккхуна̄ парам̣ чодетука̄мена кати дхамме аджджхаттам̣ манаси каритва̄ паро чодетаббо’’ти? ‘‘чодакенупа̄ли, бхиккхуна̄ парам̣ чодетука̄мена пан̃ча дхамме аджджхаттам̣ манаси каритва̄ паро чодетаббо. катаме пан̃ча? ка̄рун̃н̃ата̄, хитесита̄, анукампата̄, а̄паттивут̣т̣ха̄ната̄, винайапуреккха̄рата̄ – чодакенупа̄ли, бхиккхуна̄ парам̣ чодетука̄мена име пан̃ча дхамме аджджхаттам̣ манаси каритва̄ паро чодетаббо’’ти.

439. ‘‘катихи ну кхо, бханте, ан̇гехи саманна̄гатасса бхиккхуно ока̄сакаммам̣ ка̄ра̄пентасса на̄лам̣ ока̄сакаммам̣ ка̄ту’’нти? ‘‘пан̃чахупа̄ли, ан̇гехи саманна̄гатасса бхиккхуно ока̄сакаммам̣ ка̄ра̄пентасса на̄лам̣ ока̄сакаммам̣ ка̄тум̣. катамехи пан̃чахи? апарисуддхака̄йасама̄ча̄ро хоти, апарисуддхавачӣсама̄ча̄ро хоти, апарисуддха̄джӣво хоти, ба̄ло хоти абйатто, на пат̣ибало ануйун̃джийама̄но ануйогам̣ да̄тум̣ – имехи кхо, упа̄ли, пан̃чахан̇гехи саманна̄гатасса бхиккхуно ока̄сакаммам̣ ка̄ра̄пентасса на̄лам̣ ока̄сакаммам̣ ка̄тум̣.

‘‘пан̃чахупа̄ли, ан̇гехи саманна̄гатасса бхиккхуно ока̄сакаммам̣ ка̄ра̄пентасса алам̣ ока̄сакаммам̣ ка̄тум̣. катамехи пан̃чахи? парисуддхака̄йасама̄ча̄ро хоти, парисуддхавачӣсама̄ча̄ро хоти, парисуддха̄джӣво хоти, пан̣д̣ито хоти бйатто пат̣ибало ануйун̃джийама̄но ануйогам̣ да̄тум̣ – имехи кхо, упа̄ли, пан̃чахан̇гехи саманна̄гатасса бхиккхуно ока̄сакаммам̣ ка̄ра̄пентасса алам̣ ока̄сакаммам̣ ка̄ту’’нти.

440. [чӯл̣ава. 398] ‘‘атта̄да̄нам̣ а̄да̄тука̄мена, бханте, бхиккхуна̄ катихан̇гехи саманна̄гатам̣ атта̄да̄нам̣ а̄да̄табба’’нти? ‘‘атта̄да̄нам̣ а̄да̄тука̄менупа̄ли, бхиккхуна̄ пан̃чан̇гасаманна̄гатам̣ [пан̃чахан̇гехи саманна̄гатам̣ (сӣ. сйа̄.)] атта̄да̄нам̣ а̄да̄таббам̣. катаме пан̃ча [катамехи пан̃чахи (сйа̄.)]? атта̄да̄нам̣ а̄да̄тука̄мена, упа̄ли, бхиккхуна̄ евам̣ паччавеккхитаббам̣ – ‘йам̣ кхо ахам̣ имам̣ атта̄да̄нам̣ а̄да̄тука̄мо, ка̄ло ну кхо имам̣ атта̄да̄нам̣ а̄да̄тум̣ уда̄ху но’ти. саче, упа̄ли, бхиккху паччавеккхама̄но евам̣ джа̄на̄ти – ‘ака̄ло имам̣ атта̄да̄нам̣ а̄да̄тум̣ но ка̄ло’ти, на там̣, упа̄ли, атта̄да̄нам̣ а̄да̄таббам̣.

‘‘саче панупа̄ли, бхиккху паччавеккхама̄но евам̣ джа̄на̄ти – ‘ка̄ло имам̣ атта̄да̄нам̣ а̄да̄тум̣ но ака̄ло’ти, тенупа̄ли бхиккхуна̄ уттари паччавеккхитаббам̣ – ‘йам̣ кхо ахам̣ имам̣ атта̄да̄нам̣ а̄да̄тука̄мо бхӯтам̣ ну кхо идам̣ атта̄да̄нам̣ уда̄ху но’ти. саче, упа̄ли, бхиккху паччавеккхама̄но евам̣ джа̄на̄ти – ‘абхӯтам̣ идам̣ атта̄да̄нам̣ но бхӯта’нти, на там̣, упа̄ли, атта̄да̄нам̣ а̄да̄таббам̣.

‘‘саче панупа̄ли бхиккху паччавеккхама̄но евам̣ джа̄на̄ти – ‘бхӯтам̣ идам̣ атта̄да̄нам̣ но абхӯта’нти, тенупа̄ли бхиккхуна̄ уттари паччавеккхитаббам̣ – ‘йам̣ кхо ахам̣ имам̣ атта̄да̄нам̣ а̄да̄тука̄мо, аттхасам̣хитам̣ ну кхо идам̣ атта̄да̄нам̣ уда̄ху но’ти. саче, упа̄ли, бхиккху паччавеккхама̄но евам̣ джа̄на̄ти –’ анаттхасам̣хитам̣ идам̣ атта̄да̄нам̣ но аттхасам̣хита’нти, на там̣, упа̄ли, атта̄да̄нам̣ а̄да̄таббам̣.

‘‘саче панупа̄ли бхиккху паччавеккхама̄но евам̣ джа̄на̄ти – ‘аттхасам̣хитам̣ идам̣ атта̄да̄нам̣ но анаттхасам̣хита’нти, тенупа̄ли бхиккхуна̄ уттари паччавеккхитаббам̣ – ‘имам̣ кхо ахам̣ атта̄да̄нам̣ а̄дийама̄но лабхисса̄ми сандит̣т̣хе самбхатте бхиккхӯ дхаммато винайато паккхе уда̄ху но’ти. саче, упа̄ли, бхиккху паччавеккхама̄но евам̣ джа̄на̄ти – ‘имам̣ кхо ахам̣ атта̄да̄нам̣ а̄дийама̄но на лабхисса̄ми сандит̣т̣хе самбхатте бхиккхӯ дхаммато винайато паккхе’ти, на там̣, упа̄ли, атта̄да̄нам̣ а̄да̄таббам̣.

‘‘саче панупа̄ли бхиккху паччавеккхама̄но евам̣ джа̄на̄ти – ‘идам̣ кхо ахам̣ атта̄да̄нам̣ а̄дийама̄но лабхисса̄ми сандит̣т̣хе самбхатте бхиккхӯ дхаммато винайато паккхе’ти, тенупа̄ли бхиккхуна̄ уттари паччавеккхитаббам̣ – ‘имам̣ кхо ме атта̄да̄нам̣ а̄дийато бхависсати сан̇гхасса татонида̄нам̣ бхан̣д̣анам̣ калахо виггахо вива̄до сан̇гхабхедо сан̇гхара̄джи сан̇гхававаттха̄нам̣ сан̇гхана̄на̄каран̣ам̣ уда̄ху но’ти. саче, упа̄ли, бхиккху паччавеккхама̄но евам̣ джа̄на̄ти – ‘имам̣ кхо ме атта̄да̄нам̣ а̄дийато бхависсати сан̇гхасса татонида̄нам̣ бхан̣д̣анам̣ калахо виггахо вива̄до сан̇гхабхедо сан̇гхара̄джи сан̇гхававаттха̄нам̣ сан̇гхана̄на̄каран̣а’нти, на там̣, упа̄ли, атта̄да̄нам̣ а̄да̄таббам̣.

‘‘саче панупа̄ли бхиккху паччавеккхама̄но евам̣ джа̄на̄ти – ‘имам̣ кхо ме атта̄да̄нам̣ а̄дийато на бхависсати сан̇гхасса татонида̄нам̣ бхан̣д̣анам̣ калахо виггахо вива̄до сан̇гхабхедо сан̇гхара̄джи сан̇гхававаттха̄нам̣ сан̇гхана̄на̄каран̣а’нти, там̣ а̄да̄таббам̣, упа̄ли, атта̄да̄нам̣. евам̣ пан̃чан̇гасаманна̄гатам̣ кхо, упа̄ли, атта̄да̄нам̣ а̄диннам̣ паччха̄пи авиппат̣иса̄ракарам̣ бхависсатӣ’’ти.

441. ‘‘катихи ну кхо, бханте, ан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хотӣ’’ти? ‘‘пан̃чахупа̄ли, ан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хоти. катамехи пан̃чахи? сӣлава̄ хоти, па̄тимоккхасам̣варасам̣вуто вихарати а̄ча̄рагочарасампанно ан̣уматтесу ваджджесу бхайадасса̄вӣ, сама̄да̄йа сиккхати сиккха̄падесу; бахуссуто хоти сутадхаро сутасанничайо; йе те дхамма̄ а̄дикалйа̄н̣а̄ маджджхекалйа̄н̣а̄ парийоса̄накалйа̄н̣а̄ са̄ттхам̣ сабйан̃джанам̣ кевалапарипун̣н̣ам̣ парисуддхам̣ брахмачарийам̣ абхиваданти татха̄рӯпасса дхамма̄ бахуссута̄ хонти дха̄та̄ вачаса̄ паричита̄ манаса̄нупеккхита̄ дит̣т̣хийа̄ суппат̣ивиддха̄, убхайа̄ни кхо панасса па̄тимоккха̄ни виттха̄рена сва̄гата̄ни хонти сувибхатта̄ни суппаваттӣни сувиниччхита̄ни суттасо анубйан̃джанасо; винайе кхо пана т̣хито хоти асам̣хӣро; пат̣ибало хоти убхо аттхапаччаттхике асса̄сетум̣ сан̃н̃а̄петум̣ ниджджха̄петум̣ пеккхетум̣ паса̄детум̣ – имехи кхо, упа̄ли, пан̃чахан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хоти.

‘‘апарехипи, упа̄ли, пан̃чахан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хоти. катамехи пан̃чахи? парисуддхака̄йасама̄ча̄ро хоти, парисуддхавачӣсама̄ча̄ро хоти, парисуддха̄джӣво хоти, пан̣д̣ито хоти бйатто, пат̣ибало ануйун̃джийама̄но ануйогам̣ да̄тум̣ – имехи кхо, упа̄ли, пан̃чахан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хоти.

‘‘апарехипи, упа̄ли, пан̃чахан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хоти. катамехи пан̃чахи? ваттхум̣ джа̄на̄ти, нида̄нам̣ джа̄на̄ти, пан̃н̃аттим̣ джа̄на̄ти, падапачча̄бхат̣т̣хам̣ джа̄на̄ти, анусандхивачанапатхам̣ джа̄на̄ти – имехи кхо, упа̄ли, пан̃чахан̇гехи саманна̄гато бхиккху адхикаран̣аджа̄та̄нам̣ бхиккхӯнам̣ бахӯпака̄ро хотӣ’’ти.

442. ‘‘катихи ну кхо, бханте, ан̇гехи саманна̄гатена бхиккхуна̄ на̄нуйун̃джитабба’’нти? ‘‘пан̃чахупа̄ли, ан̇гехи саманна̄гатена бхиккхуна̄ на̄нуйун̃джитаббам̣. катамехи пан̃чахи? суттам̣ на джа̄на̄ти, сутта̄нуломам̣ на джа̄на̄ти, винайам̣ на джа̄на̄ти, винайа̄нуломам̣ на джа̄на̄ти, на ча т̣ха̄на̄т̣ха̄накусало хоти – имехи кхо, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣.

‘‘пан̃чахупа̄ли, ан̇гехи саманна̄гатена бхиккхуна̄ ануйун̃джитаббам̣. катамехи пан̃чахи? суттам̣ джа̄на̄ти, сутта̄нуломам̣ джа̄на̄ти, винайам̣ джа̄на̄ти, винайа̄нуломам̣ джа̄на̄ти, т̣ха̄на̄т̣ха̄накусало ча хоти – имехи кхо, упа̄ли, пан̃чахан̇гехи саманна̄гатена бхиккхуна̄ ануйун̃джитаббам̣.

‘‘апарехипи, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣. катамехи пан̃чахи? дхаммам̣ на джа̄на̄ти, дхамма̄нуломам̣ на джа̄на̄ти, винайам̣ на джа̄на̄ти, винайа̄нуломам̣ на джа̄на̄ти, на ча пубба̄паракусало хоти – имехи кхо, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣.

‘‘пан̃чахупа̄ли, ан̇гехи саманна̄гатена бхиккхуна̄ ануйун̃джитаббам̣. катамехи пан̃чахи? дхаммам̣ джа̄на̄ти, дхамма̄нуломам̣ джа̄на̄ти, винайам̣ джа̄на̄ти, винайа̄нуломам̣ джа̄на̄ти, пубба̄паракусало ча хоти – имехи кхо, упа̄ли, пан̃чахан̇гехи саманна̄гатена бхиккхуна̄ ануйун̃джитаббам̣.

‘‘апарехипи, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣. катамехи пан̃чахи? ваттхум̣ на джа̄на̄ти, нида̄нам̣ на джа̄на̄ти, пан̃н̃аттим̣ на джа̄на̄ти, падапачча̄бхат̣т̣хам̣ на джа̄на̄ти, анусандхивачанапатхам̣ на джа̄на̄ти – имехи кхо, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣.

‘‘пан̃чахупа̄ли, ан̇гехи саманна̄гатена бхиккхуна̄ ануйун̃джитаббам̣. катамехи пан̃чахи? ваттхум̣ джа̄на̄ти, нида̄нам̣ джа̄на̄ти, пан̃н̃аттим̣ джа̄на̄ти, падапачча̄бхат̣т̣хам̣ джа̄на̄ти, анусандхивачанапатхам̣ джа̄на̄ти – имехи кхо, упа̄ли, пан̃чахан̇гехи саманна̄гатена бхиккхуна̄ ануйун̃джитаббам̣.

‘‘апарехипи, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣. катамехи пан̃чахи? а̄паттим̣ на джа̄на̄ти, а̄паттисамут̣т̣ха̄нам̣ на джа̄на̄ти, а̄паттийа̄ пайогам̣ на джа̄на̄ти, а̄паттийа̄ вӯпасамам̣ на джа̄на̄ти, а̄паттийа̄ на виниччхайакусало хоти – имехи кхо, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣.

‘‘пан̃чахупа̄ли, ан̇гехи саманна̄гатена бхиккхуна̄ ануйун̃джитаббам̣. катамехи пан̃чахи? а̄паттим̣ джа̄на̄ти, а̄паттисамут̣т̣ха̄нам̣ джа̄на̄ти, а̄паттийа̄ пайогам̣ джа̄на̄ти, а̄паттийа̄ вӯпасамам̣ джа̄на̄ти, а̄паттийа̄ виниччхайакусало хоти – имехи кхо, упа̄ли, пан̃чахан̇гехи саманна̄гатена бхиккхуна̄ ануйун̃джитаббам̣.

‘‘апарехипи, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣. катамехи пан̃чахи? адхикаран̣ам̣ на джа̄на̄ти, адхикаран̣асамут̣т̣ха̄нам̣ на джа̄на̄ти, адхикаран̣асса пайогам̣ на джа̄на̄ти, адхикаран̣асса вӯпасамам̣ на джа̄на̄ти, адхикаран̣асса на виниччхайакусало хоти – имехи кхо, упа̄ли, пан̃чахан̇гехи саманна̄гатена бхиккхуна̄ на̄нуйун̃джитаббам̣.

‘‘пан̃чахупа̄ли, ан̇гехи саманна̄гатена бхиккхуна̄ ануйун̃джитаббам̣. катамехи пан̃чахи? адхикаран̣ам̣ джа̄на̄ти, адхикаран̣асамут̣т̣ха̄нам̣ джа̄на̄ти, адхикаран̣асса пайогам̣ джа̄на̄ти, адхикаран̣асса вӯпасамам̣ джа̄на̄ти, адхикаран̣асса виниччхайакусало хоти – имехи кхо, упа̄ли, пан̃чахан̇гехи саманна̄гатена бхиккхуна̄ ануйун̃джитабба’’нти.

атта̄да̄навагго нит̣т̣хито пан̃чамо.

тассудда̄нам̣ –

парисуддхан̃ча ка̄лена, ка̄рун̃н̃ам̣ ока̄сена ча;

атта̄да̄нам̣ адхикаран̣ам̣, апарехипи ваттхун̃ча;

суттам̣ дхаммам̣ пуна ваттхун̃ча, а̄патти адхикаран̣ена ча̄ти.