4. катхина̄диджа̄нитаббавибха̄го

412. катхинам̣ джа̄нитаббам̣, катхинаттха̄ро джа̄нитаббо, катхинасса аттха̄рама̄со джа̄нитаббо, катхинасса аттха̄равипатти джа̄нитабба̄, катхинасса аттха̄расампатти джа̄нитабба̄, нимиттакаммам̣ джа̄нитаббам̣, парикатха̄ джа̄нитабба̄, куккукатам̣ джа̄нитаббам̣, саннидхи джа̄нитабба̄, ниссаггийам̣ джа̄нитаббам̣.

катхинам̣ джа̄нитаббанти тесан̃н̃ева дхамма̄нам̣ сан̇гахо самава̄йо на̄мам̣ на̄макаммам̣ на̄мадхеййам̣ нирутти бйан̃джанам̣ абхила̄по йадидам̣ катхинанти.

катхинасса аттха̄рама̄со джа̄нитабботи васса̄насса паччхимо ма̄со джа̄нитаббо.

катхинасса аттха̄равипатти джа̄нитабба̄ти чатувӣсатийа̄ а̄ка̄рехи катхинасса аттха̄равипатти джа̄нитабба̄.

катхинасса аттха̄расампатти джа̄нитабба̄ти саттарасахи а̄ка̄рехи катхинасса аттха̄расампатти джа̄нитабба̄.

нимиттакаммам̣ джа̄нитаббанти нимиттам̣ кароти имина̄ дуссена катхинам̣ аттхарисса̄мӣти.

парикатха̄ джа̄нитабба̄ти парикатхам̣ кароти има̄йа парикатха̄йа катхинадуссам̣ ниббаттесса̄мӣти.

куккукатам̣ джа̄нитаббанти ана̄дийада̄нам̣ джа̄нитаббам̣.

саннидхи джа̄нитабба̄ти две саннидхийо джа̄нитабба̄ – каран̣асаннидхи ва̄ ничайасаннидхи ва̄.

ниссаггийам̣ джа̄нитаббанти карийама̄не арун̣ам̣ ут̣т̣хахати.

катхинаттха̄ро джа̄нитабботи саче сан̇гхасса катхинадуссам̣ уппаннам̣ хоти, сан̇гхена катхам̣ пат̣ипаджджитаббам̣, аттха̄ракена катхам̣ пат̣ипаджджитаббам̣, анумодакена катхам̣ пат̣ипаджджитаббам̣.

413. сан̇гхена н̃аттидутийена каммена катхинаттха̄ракасса бхиккхуно да̄таббам̣, тена катхинаттха̄ракена бхиккхуна̄ тадахева дховитва̄ вимаджджитва̄ вича̄ретва̄ чхиндитва̄ сиббетва̄ раджитва̄ каппам̣ катва̄ катхинам̣ аттхаритаббам̣. саче сан̇гха̄т̣ийа̄ катхинам̣ аттхаритука̄мо хоти, пора̄н̣ика̄ сан̇гха̄т̣и паччуддхаритабба̄, нава̄ сан̇гха̄т̣и адхит̣т̣ха̄табба̄. има̄йа сан̇гха̄т̣ийа̄ катхинам̣ аттхара̄мӣти ва̄ча̄ бхиндитабба̄. саче уттара̄сан̇гена катхинам̣ аттхаритука̄мо хоти, пора̄н̣ако уттара̄сан̇го паччуддхаритаббо, наво уттара̄сан̇го адхит̣т̣ха̄таббо. имина̄ уттара̄сан̇гена катхинам̣ аттхара̄мӣти ва̄ча̄ бхиндитабба̄. саче антарава̄сакена катхинам̣ аттхаритука̄мо хоти, пора̄н̣ако антарава̄сако паччуддхаритаббо, наво антарава̄сако адхит̣т̣ха̄таббо. имина̄ антарава̄сакена катхинам̣ аттхара̄мӣти ва̄ча̄ бхиндитабба̄. тена катхинаттха̄ракена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, бханте, сан̇гхасса катхинам̣, дхаммико катхинаттха̄ро, анумодатха̄’’ти. техи анумодакехи бхиккхӯхи екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро, анумода̄ма̄’’ти. тена катхинаттха̄ракена бхиккхуна̄ самбахуле бхиккхӯ упасан̇камитва̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамассу вачанӣйа̄ – ‘‘аттхатам̣, бханте, сан̇гхасса катхинам̣, дхаммико катхинаттха̄ро, анумодатха̄’’ти. техи анумодакехи бхиккхӯхи екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро анумода̄ма̄’’ти. тена катхинаттха̄ракена бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро, анумода̄хӣ’’ти. тена анумодакена бхиккхуна̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро, анумода̄мӣ’’ти.