катхинабхедо

1. катхинааттхата̄ди

403. касса катхинам̣ [кат̣хинам̣ (сӣ. сйа̄.)] анаттхатам̣? касса катхинам̣ аттхатам̣? кинти катхинам̣ анаттхатам̣? кинти катхинам̣ аттхатам̣?

касса катхинам̣ анаттхатанти? двиннам̣ пуггала̄нам̣ анаттхатам̣ хоти катхинам̣ – анаттха̄ракасса ча ананумодакасса ча. имесам̣ двиннам̣ пуггала̄нам̣ анаттхатам̣ хоти катхинам̣.

касса катхинам̣ аттхатанти? двиннам̣ пуггала̄нам̣ аттхатам̣ хоти катхинам̣ – аттха̄ракасса ча анумодакасса ча. имесам̣ двиннам̣ пуггала̄нам̣ аттхатам̣ хоти катхинам̣.

кинти катхинам̣ анаттхатанти? чатувӣсатийа̄ а̄ка̄рехи анаттхатам̣ хоти катхинам̣, на улликхитаматтена аттхатам̣ хоти катхинам̣, на дхованаматтена аттхатам̣ хоти катхинам̣, на чӣваравича̄ран̣аматтена аттхатам̣ хоти катхинам̣, на чхеданаматтена аттхатам̣ хоти катхинам̣, на бандханаматтена аттхатам̣ хоти катхинам̣, на оват̣т̣ийакаран̣аматтена аттхатам̣ хоти катхинам̣, на кан̣д̣усакаран̣аматтена [на ган̣д̣усакаран̣аматтена (ка.)] аттхатам̣ хоти катхинам̣, на дал̣хӣкаммакаран̣аматтена аттхатам̣ хоти катхинам̣, на анува̄такаран̣аматтена аттхатам̣ хоти катхинам̣, на парибхан̣д̣акаран̣аматтена аттхатам̣ хоти катхинам̣, на оваддхеййакаран̣аматтена [на оват̣т̣еййакаран̣аматтена (сӣ. сйа̄.), на овадеййакаран̣аматтена (ка.)] аттхатам̣ хоти катхинам̣, на камбаламадданаматтена аттхатам̣ хоти катхинам̣, на нимиттакатена аттхатам̣ хоти катхинам̣, на парикатха̄катена аттхатам̣ хоти катхинам̣, на куккукатена аттхатам̣ хоти катхинам̣, на саннидхикатена аттхатам̣ хоти катхинам̣, на ниссаггийена аттхатам̣ хоти катхинам̣, на акаппакатена аттхатам̣ хоти катхинам̣, на ан̃н̃атра сан̇гха̄т̣ийа̄ аттхатам̣ хоти катхинам̣, на ан̃н̃атра уттара̄сан̇гена аттхатам̣ хоти катхинам̣, на ан̃н̃атра антарава̄сакена аттхатам̣ хоти катхинам̣, на ан̃н̃атра пан̃чакена ва̄ атирекапан̃чакена ва̄ тадахева сан̃чхиннена саман̣д̣алӣкатена аттхатам̣ хоти катхинам̣, на ан̃н̃атра пуггаласса аттха̄ра̄ аттхатам̣ хоти катхинам̣, самма̄ че аттхатам̣ хоти катхинам̣ там̣ че ниссӣмат̣т̣хо анумодати. евампи анаттхатам̣ хоти катхинам̣.

нимиттакаммам̣ на̄ма нимиттам̣ кароти – ‘‘имина̄ дуссена катхинам̣ аттхарисса̄мӣ’’ти. парикатха̄ на̄ма парикатхам̣ кароти – ‘‘има̄йа парикатха̄йа катхинадуссам̣ ниббаттесса̄мӣ’’ти. куккукатам̣ на̄ма ана̄дийада̄нам̣ вуччати. саннидхи на̄ма две саннидхийо – каран̣асаннидхи ва̄ ничайасаннидхи ва̄. ниссаггийам̣ на̄ма кайирама̄не арун̣ам̣ ут̣т̣хахати [удрийати (сӣ. сйа̄.)]. имехи чатувӣсатийа̄ а̄ка̄рехи анаттхатам̣ хоти катхинам̣.

кинти катхинам̣ аттхатанти? саттарасахи а̄ка̄рехи аттхатам̣ хоти катхинам̣. ахатена аттхатам̣ хоти катхинам̣, ахатакаппена аттхатам̣ хоти катхинам̣, пилотика̄йа аттхатам̣ хоти катхинам̣, пам̣сукӯлена аттхатам̣ хоти катхинам̣, па̄пан̣икена аттхатам̣ хоти катхинам̣, анимиттакатена аттхатам̣ хоти катхинам̣, апарикатха̄катена аттхатам̣ хоти катхинам̣, акуккукатена аттхатам̣ хоти катхинам̣, асаннидхикатена аттхатам̣ хоти катхинам̣, аниссаггийена аттхатам̣ хоти катхинам̣, каппакатена аттхатам̣ хоти катхинам̣, сан̇гха̄т̣ийа̄ аттхатам̣ хоти катхинам̣, уттара̄сан̇гена аттхатам̣ хоти катхинам̣, антарава̄сакена аттхатам̣ хоти катхинам̣, пан̃чакена ва̄ атирекапан̃чакена ва̄ тадахева сан̃чхиннена саман̣д̣алӣкатена аттхатам̣ хоти катхинам̣, пуггаласса аттха̄ра̄ аттхатам̣ хоти катхинам̣, самма̄ че аттхатам̣ хоти катхинам̣, там̣ че сӣмат̣т̣хо анумодати, евампи аттхатам̣ хоти катхинам̣. имехи саттарасахи а̄ка̄рехи аттхатам̣ хоти катхинам̣.

саха катхинасса аттха̄ра̄ кати дхамма̄ джа̄йанти? саха катхинасса аттха̄ра̄ паннараса дхамма̄ джа̄йанти – ат̣т̣ха ма̄тика̄, две палибодха̄, пан̃ча̄нисам̣са̄. саха катхинасса аттха̄ра̄ име паннараса дхамма̄ джа̄йанти.

2. катхинаанантарапаччайа̄ди

404. пайогасса катаме дхамма̄ анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо, пуреджа̄тапаччайена паччайо, паччха̄джа̄тапаччайена паччайо, сахаджа̄тапаччайена паччайо? пуббакаран̣асса катаме дхамма̄ анантарапаччайена паччайо…пе… паччуддха̄расса катаме дхамма̄… адхит̣т̣ха̄насса катаме дхамма̄… аттха̄расса катаме дхамма̄… ма̄тика̄нан̃ча палибодха̄нан̃ча катаме дхамма̄… ваттхусса катаме дхамма̄ анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо, пуреджа̄тапаччайена паччайо, паччха̄джа̄тапаччайена паччайо, сахаджа̄тапаччайена паччайо?

пуббакаран̣ам̣ пайогасса анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо. пайого пуббакаран̣асса пуреджа̄тапаччайена паччайо. пуббакаран̣ам̣ пайогасса паччха̄джа̄тапаччайена паччайо. паннараса дхамма̄ сахаджа̄тапаччайена паччайо. паччуддха̄ро пуббакаран̣асса анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо. пуббакаран̣ам̣ паччуддха̄расса пуреджа̄тапаччайена паччайо. паччуддха̄ро пуббакаран̣асса паччха̄джа̄тапаччайена паччайо. паннараса дхамма̄ сахаджа̄тапаччайена паччайо. адхит̣т̣ха̄нам̣ паччуддха̄расса анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо. паччуддха̄ро адхит̣т̣ха̄насса пуреджа̄тапаччайена паччайо. адхит̣т̣ха̄нам̣ паччуддха̄расса паччха̄джа̄тапаччайена паччайо. паннараса дхамма̄ сахаджа̄тапаччайена паччайо. аттха̄ро адхит̣т̣ха̄насса анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо. адхит̣т̣ха̄нам̣ аттха̄расса пуреджа̄тапаччайена паччайо. аттха̄ро адхит̣т̣ха̄насса паччха̄джа̄тапаччайена паччайо. паннараса дхамма̄ сахаджа̄тапаччайена паччайо. ма̄тика̄ ча палибодха̄ ча аттха̄расса анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо. аттха̄ро ма̄тика̄нан̃ча палибодха̄нан̃ча пуреджа̄тапаччайена паччайо. ма̄тика̄ ча палибодха̄ ча аттха̄расса паччха̄джа̄тапаччайена паччайо. паннараса дхамма̄ сахаджа̄тапаччайена паччайо. а̄са̄ ча ана̄са̄ ча ваттхусса анантарапаччайена паччайо, саманантарапаччайена паччайо, ниссайапаччайена паччайо, упаниссайапаччайена паччайо. ваттху а̄са̄нан̃ча ана̄са̄нан̃ча пуреджа̄тапаччайена паччайо. а̄са̄ ча ана̄са̄ ча ваттхусса паччха̄джа̄тапаччайена паччайо. паннараса дхамма̄ сахаджа̄тапаччайена паччайо.

3. пуббакаран̣анида̄на̄дивибха̄го

405. пуббакаран̣ам̣ ким̣нида̄нам̣, ким̣самудайам̣, ким̣джа̄тикам̣, ким̣пабхавам̣, ким̣самбха̄рам̣, ким̣самут̣т̣ха̄нам̣? паччуддха̄ро ким̣нида̄но, ким̣самудайо, ким̣джа̄тико, ким̣пабхаво, ким̣самбха̄ро, ким̣самут̣т̣ха̄но? адхит̣т̣ха̄нам̣ ким̣нида̄нам̣, ким̣самудайам̣, ким̣джа̄тикам̣, ким̣пабхавам̣, ким̣самбха̄рам̣, ким̣самут̣т̣ха̄нам̣? аттха̄ро ким̣нида̄но, ким̣самудайо, ким̣джа̄тико, ким̣пабхаво, ким̣самбха̄ро, ким̣самут̣т̣ха̄но? ма̄тика̄ ча палибодха̄ ча ким̣нида̄на̄, ким̣самудайа̄, ким̣джа̄тика̄, ким̣пабхава̄, ким̣самбха̄ра̄ ким̣самут̣т̣ха̄на̄? а̄са̄ ча ана̄са̄ ча ким̣нида̄на̄, ким̣самудайа̄, ким̣джа̄тика̄, ким̣пабхава̄, ким̣самбха̄ра̄, ким̣самут̣т̣ха̄на̄?

пуббакаран̣ам̣ пайоганида̄нам̣, пайогасамудайам̣, пайогаджа̄тикам̣, пайогапабхавам̣, пайогасамбха̄рам̣, пайогасамут̣т̣ха̄нам̣. паччуддха̄ро пуббакаран̣анида̄но, пуббакаран̣асамудайо, пуббакаран̣аджа̄тико, пуббакаран̣апабхаво, пуббакаран̣асамбха̄ро, пуббакаран̣асамут̣т̣ха̄но. адхит̣т̣ха̄нам̣ паччуддха̄ранида̄нам̣, паччуддха̄расамудайам̣, паччуддха̄раджа̄тикам̣, паччуддха̄рапабхавам̣, паччуддха̄расамбха̄рам̣, паччуддха̄расамут̣т̣ха̄нам̣. аттха̄ро адхит̣т̣ха̄нанида̄но, адхит̣т̣ха̄насамудайо, адхит̣т̣ха̄наджа̄тико, адхит̣т̣ха̄напабхаво, адхит̣т̣ха̄насамбха̄ро, адхит̣т̣ха̄насамут̣т̣ха̄но. ма̄тика̄ ча палибодха̄ ча аттха̄ранида̄на̄, аттха̄расамудайа̄, аттха̄раджа̄тика̄, аттха̄рапабхава̄, аттха̄расамбха̄ра̄, аттха̄расамут̣т̣ха̄на̄. а̄са̄ ча ана̄са̄ ча ваттхунида̄на̄, ваттхусамудайа̄, ваттхуджа̄тика̄, ваттхупабхава̄, ваттхусамбха̄ра̄, ваттхусамут̣т̣ха̄на̄.

406. пайого ким̣нида̄но, ким̣самудайо, ким̣джа̄тико, ким̣пабхаво, ким̣самбха̄ро, ким̣самут̣т̣ха̄но, пуббакаран̣ам̣…пе… паччуддха̄ро… адхит̣т̣ха̄нам̣… аттха̄ро… ма̄тика̄ ча палибодха̄ ча… ваттху… а̄са̄ ча ана̄са̄ ча ким̣нида̄на̄, ким̣самудайа̄, ким̣джа̄тика̄, ким̣пабхава̄, ким̣самбха̄ра̄, ким̣самут̣т̣ха̄на̄?

пайого хетунида̄но, хетусамудайо, хетуджа̄тико, хетупабхаво, хетусамбха̄ро, хетусамут̣т̣ха̄но. пуббакаран̣ам̣…пе… паччуддха̄ро… адхит̣т̣ха̄нам̣… аттха̄ро … ма̄тика̄ ча палибодха̄ ча… ваттху… а̄са̄ ча ана̄са̄ ча хетунида̄на̄, хетусамудайа̄, хетуджа̄тика̄, хетупабхава̄, хетусамбха̄ра̄, хетусамут̣т̣ха̄на̄.

407. пайого ким̣нида̄но, ким̣самудайо, ким̣джа̄тико, ким̣пабхаво, ким̣самбха̄ро, ким̣самут̣т̣ха̄но? пуббакаран̣ам̣…пе… паччуддха̄ро… адхит̣т̣ха̄нам̣… аттха̄ро… ма̄тика̄ ча палибодха̄ ча… ваттху… а̄са̄ ча ана̄са̄ ча ким̣нида̄на̄, ким̣самудайа̄, ким̣джа̄тика̄, ким̣пабхава̄, ким̣самбха̄ра̄, ким̣самут̣т̣ха̄на̄?

пайого паччайанида̄но, паччайасамудайо, паччайаджа̄тико, паччайапабхаво, паччайасамбха̄ро, паччайасамут̣т̣ха̄но. пуббакаран̣ам̣…пе… паччуддха̄ро… адхит̣т̣ха̄нам̣… аттха̄ро… ма̄тика̄ ча палибодха̄ ча… ваттху… а̄са̄ ча ана̄са̄ ча паччайанида̄на̄, паччайасамудайа̄, паччайаджа̄тика̄, паччайапабхава̄, паччайасамбха̄ра̄, паччайасамут̣т̣ха̄на̄.

408. пуббакаран̣ам̣ катихи дхаммехи сан̇гахитам̣? пуббакаран̣ам̣ саттахи дхаммехи сан̇гахитам̣. дхованена, вича̄ран̣ена, чхеданена, бандханена, сиббанена, раджанена, каппакаран̣ена – пуббакаран̣ам̣ имехи саттахи дхаммехи сан̇гахитам̣.

паччуддха̄ро катихи дхаммехи сан̇гахито? паччуддха̄ро тӣхи дхаммехи сан̇гахито – сан̇гха̄т̣ийа̄, уттара̄сан̇гена, антарава̄сакена.

адхит̣т̣ха̄нам̣ катихи дхаммехи сан̇гахитам̣? адхит̣т̣ха̄нам̣ тӣхи дхаммехи сан̇гахитам̣ – сан̇гха̄т̣ийа̄, уттара̄сан̇гена, антарава̄сакена.

аттха̄ро катихи дхаммехи сан̇гахито? аттха̄ро екена дхаммена сан̇гахито – вачӣбхедена.

катхинасса кати мӯла̄ни, кати ваттхӯни, кати бхӯмийо? катхинасса екам̣ мӯлам̣ – сан̇гхо; тӣн̣и ваттхӯни – сан̇гха̄т̣и, уттара̄сан̇го, антарава̄сако, чха бхӯмийо – кхомам̣, каппа̄сикам̣, косеййам̣, камбалам̣, са̄н̣ам̣, бхан̇гам̣.

катхинасса ко а̄ди, ким̣ маджджхе, ким̣ парийоса̄нам̣? катхинасса пуббакаран̣ам̣ а̄ди, крийа̄ маджджхе, аттха̄ро парийоса̄нам̣.

409. катихан̇гехи саманна̄гато пуггало абхаббо катхинам̣ аттхаритум̣? катихан̇гехи саманна̄гато пуггало бхаббо катхинам̣ аттхаритум̣? ат̣т̣хахан̇гехи саманна̄гато пуггало абхаббо катхинам̣ аттхаритум̣. ат̣т̣хахан̇гехи саманна̄гато пуггало бхаббо катхинам̣ аттхаритум̣. катамехи ат̣т̣хахан̇гехи саманна̄гато пуггало абхаббо катхинам̣ аттхаритум̣? пуббакаран̣ам̣ на джа̄на̄ти, паччуддха̄рам̣ на джа̄на̄ти, адхит̣т̣ха̄нам̣ на джа̄на̄ти, аттха̄рам̣ на джа̄на̄ти, ма̄тикам̣ на джа̄на̄ти, палибодхам̣ на джа̄на̄ти, уддха̄рам̣ на джа̄на̄ти, а̄нисам̣сам̣ на джа̄на̄ти – имехи ат̣т̣хахан̇гехи саманна̄гато пуггало абхаббо катхинам̣ аттхаритум̣. катамехи ат̣т̣хахан̇гехи саманна̄гато пуггало бхаббо катхинам̣ аттхаритум̣? пуббакаран̣ам̣ джа̄на̄ти, паччуддха̄рам̣ джа̄на̄ти, адхит̣т̣ха̄нам̣ джа̄на̄ти, аттха̄рам̣ джа̄на̄ти, ма̄тикам̣ джа̄на̄ти, палибодхам̣ джа̄на̄ти, уддха̄рам̣ джа̄на̄ти, а̄нисам̣сам̣ джа̄на̄ти – имехи ат̣т̣хахан̇гехи саманна̄гато пуггало бхаббо катхинам̣ аттхаритум̣.

410. катинам̣ пуггала̄нам̣ катхинаттха̄ра̄ на руханти? катинам̣ пуггала̄нам̣ катхинаттха̄ра̄ руханти? тин̣н̣ам̣ пуггала̄нам̣ катхинаттха̄ра̄ на руханти. тин̣н̣ам̣ пуггала̄нам̣ катхинаттха̄ра̄ руханти. катамесам̣ тин̣н̣ам̣ пуггала̄нам̣ катхинаттха̄ра̄ на руханти? ниссӣмат̣т̣хо анумодати, анумоденто на ва̄чам̣ бхиндати, ва̄чам̣ бхинданто на парам̣ вин̃н̃а̄пети – имесам̣ тин̣н̣ам̣ пуггала̄нам̣ катхинаттха̄ра̄ на руханти. катамесам̣ тин̣н̣ам̣ пуггала̄нам̣ катхинаттха̄ра̄ руханти? сӣмат̣т̣хо анумодати, анумоденто ва̄чам̣ бхиндати, ва̄чам̣ бхинданто парам̣ вин̃н̃а̄пети – имесам̣ тин̣н̣ам̣ пуггала̄нам̣ катхинаттха̄ра̄ руханти.

411. кати катхинаттха̄ра̄ на руханти? кати катхинаттха̄ра̄ руханти? тайо катхинаттха̄ра̄ на руханти. тайо катхинаттха̄ра̄ руханти. катаме тайо катхинаттха̄ра̄ на руханти? ваттхувипаннан̃чева хоти, ка̄лавипаннан̃ча, каран̣авипаннан̃ча – име тайо катхинаттха̄ра̄ на руханти. катаме тайо катхинаттха̄ра̄ руханти? ваттхусампаннан̃чева хоти, ка̄ласампаннан̃ча, каран̣асампаннан̃ча – име тайо катхинаттха̄ра̄ руханти.

4. катхина̄диджа̄нитаббавибха̄го

412. катхинам̣ джа̄нитаббам̣, катхинаттха̄ро джа̄нитаббо, катхинасса аттха̄рама̄со джа̄нитаббо, катхинасса аттха̄равипатти джа̄нитабба̄, катхинасса аттха̄расампатти джа̄нитабба̄, нимиттакаммам̣ джа̄нитаббам̣, парикатха̄ джа̄нитабба̄, куккукатам̣ джа̄нитаббам̣, саннидхи джа̄нитабба̄, ниссаггийам̣ джа̄нитаббам̣.

катхинам̣ джа̄нитаббанти тесан̃н̃ева дхамма̄нам̣ сан̇гахо самава̄йо на̄мам̣ на̄макаммам̣ на̄мадхеййам̣ нирутти бйан̃джанам̣ абхила̄по йадидам̣ катхинанти.

катхинасса аттха̄рама̄со джа̄нитабботи васса̄насса паччхимо ма̄со джа̄нитаббо.

катхинасса аттха̄равипатти джа̄нитабба̄ти чатувӣсатийа̄ а̄ка̄рехи катхинасса аттха̄равипатти джа̄нитабба̄.

катхинасса аттха̄расампатти джа̄нитабба̄ти саттарасахи а̄ка̄рехи катхинасса аттха̄расампатти джа̄нитабба̄.

нимиттакаммам̣ джа̄нитаббанти нимиттам̣ кароти имина̄ дуссена катхинам̣ аттхарисса̄мӣти.

парикатха̄ джа̄нитабба̄ти парикатхам̣ кароти има̄йа парикатха̄йа катхинадуссам̣ ниббаттесса̄мӣти.

куккукатам̣ джа̄нитаббанти ана̄дийада̄нам̣ джа̄нитаббам̣.

саннидхи джа̄нитабба̄ти две саннидхийо джа̄нитабба̄ – каран̣асаннидхи ва̄ ничайасаннидхи ва̄.

ниссаггийам̣ джа̄нитаббанти карийама̄не арун̣ам̣ ут̣т̣хахати.

катхинаттха̄ро джа̄нитабботи саче сан̇гхасса катхинадуссам̣ уппаннам̣ хоти, сан̇гхена катхам̣ пат̣ипаджджитаббам̣, аттха̄ракена катхам̣ пат̣ипаджджитаббам̣, анумодакена катхам̣ пат̣ипаджджитаббам̣.

413. сан̇гхена н̃аттидутийена каммена катхинаттха̄ракасса бхиккхуно да̄таббам̣, тена катхинаттха̄ракена бхиккхуна̄ тадахева дховитва̄ вимаджджитва̄ вича̄ретва̄ чхиндитва̄ сиббетва̄ раджитва̄ каппам̣ катва̄ катхинам̣ аттхаритаббам̣. саче сан̇гха̄т̣ийа̄ катхинам̣ аттхаритука̄мо хоти, пора̄н̣ика̄ сан̇гха̄т̣и паччуддхаритабба̄, нава̄ сан̇гха̄т̣и адхит̣т̣ха̄табба̄. има̄йа сан̇гха̄т̣ийа̄ катхинам̣ аттхара̄мӣти ва̄ча̄ бхиндитабба̄. саче уттара̄сан̇гена катхинам̣ аттхаритука̄мо хоти, пора̄н̣ако уттара̄сан̇го паччуддхаритаббо, наво уттара̄сан̇го адхит̣т̣ха̄таббо. имина̄ уттара̄сан̇гена катхинам̣ аттхара̄мӣти ва̄ча̄ бхиндитабба̄. саче антарава̄сакена катхинам̣ аттхаритука̄мо хоти, пора̄н̣ако антарава̄сако паччуддхаритаббо, наво антарава̄сако адхит̣т̣ха̄таббо. имина̄ антарава̄сакена катхинам̣ аттхара̄мӣти ва̄ча̄ бхиндитабба̄. тена катхинаттха̄ракена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, бханте, сан̇гхасса катхинам̣, дхаммико катхинаттха̄ро, анумодатха̄’’ти. техи анумодакехи бхиккхӯхи екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро, анумода̄ма̄’’ти. тена катхинаттха̄ракена бхиккхуна̄ самбахуле бхиккхӯ упасан̇камитва̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамассу вачанӣйа̄ – ‘‘аттхатам̣, бханте, сан̇гхасса катхинам̣, дхаммико катхинаттха̄ро, анумодатха̄’’ти. техи анумодакехи бхиккхӯхи екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро анумода̄ма̄’’ти. тена катхинаттха̄ракена бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро, анумода̄хӣ’’ти. тена анумодакена бхиккхуна̄ екам̣сам̣ уттара̄сан̇гам̣ каритва̄ ан̃джалим̣ паггахетва̄ евамасса вачанӣйо – ‘‘аттхатам̣, а̄вусо, сан̇гхасса катхинам̣, дхаммико катхинаттха̄ро, анумода̄мӣ’’ти.

5. пуггалассевакатхинаттха̄ро

414. сан̇гхо катхинам̣ аттхарати, ган̣о катхинам̣ аттхарати, пуггало катхинам̣ аттхаратӣти. на сан̇гхо катхинам̣ аттхарати, на ган̣о катхинам̣ аттхарати, пуггало катхинам̣ аттхаратӣти. хан̃чи на сан̇гхо катхинам̣ аттхарати, на ган̣о катхинам̣ аттхарати, пуггало катхинам̣ аттхарати. сан̇гхасса анаттхатам̣ хоти катхинам̣, ган̣асса анаттхатам̣ хоти катхинам̣, пуггаласса аттхатам̣ хоти катхинам̣. сан̇гхо па̄тимоккхам̣ уддисати ган̣о па̄тимоккхам̣ уддисати пуггало па̄тимоккхам̣ уддисатӣти на сан̇гхо па̄тимоккхам̣ уддисати, на ган̣о па̄тимоккхам̣ уддисати, пуггало па̄тимоккхам̣ уддисатӣти. хан̃чи на сан̇гхо па̄тимоккхам̣ уддисати, на ган̣о па̄тимоккхам̣ уддисати, пуггало па̄тимоккхам̣ уддисати. сан̇гхасса ануддит̣т̣хам̣ хоти па̄тимоккхам̣, ган̣асса ануддит̣т̣хам̣ хоти па̄тимоккхам̣, пуггаласса уддит̣т̣хам̣ хоти па̄тимоккхам̣. сан̇гхасса са̄маггийа̄ ган̣асса са̄маггийа̄ пуггаласса уддеса̄ сан̇гхасса уддит̣т̣хам̣ хоти па̄тимоккхам̣, ган̣асса уддит̣т̣хам̣ хоти па̄тимоккхам̣, пуггаласса уддит̣т̣хам̣ хоти па̄тимоккхам̣. евамева на сан̇гхо катхинам̣ аттхарати, на ган̣о катхинам̣ аттхарати, пуггало катхинам̣ аттхарати. сан̇гхасса анумодана̄йа ган̣асса анумодана̄йа пуггаласса аттха̄ра̄ сан̇гхасса аттхатам̣ хоти катхинам̣, ган̣асса аттхатам̣ хоти катхинам̣, пуггаласса аттхатам̣ хоти катхинанти.