1. вохарантена джа̄нитабба̄ди

368. сан̇га̄ма̄вачаре бхиккхуна̄ сан̇гхе вохарантена ваттху джа̄нитаббам̣, випатти джа̄нитабба̄, а̄патти джа̄нитабба̄, нида̄нам̣ джа̄нитаббам̣, а̄ка̄ро джа̄нитаббо, пубба̄парам̣ джа̄нитаббам̣, ката̄катам̣ джа̄нитаббам̣, каммам̣ джа̄нитаббам̣, адхикаран̣ам̣ джа̄нитаббам̣, саматхо джа̄нитаббо, на чханда̄гати гантабба̄, на доса̄гати гантабба̄, на моха̄гати гантабба̄, на бхайа̄гати гантабба̄, сан̃н̃а̄панӣйе т̣ха̄не сан̃н̃а̄петаббам̣, ниджджха̄панӣйе т̣ха̄не ниджджха̄петаббам̣, пеккханӣйе т̣ха̄не пеккхитаббам̣, паса̄данӣйе т̣ха̄не паса̄детаббам̣, ладдхапаккхомхӣти парапаккхо на̄ваджа̄нитаббо, бахуссутомхӣти аппассуто на̄ваджа̄нитаббо, тхератаромхӣти навакатаро на̄ваджа̄нитаббо, асампаттам̣ на бйа̄ха̄таббам̣, сампаттам̣ дхаммато винайато на париха̄петаббам̣, йена дхаммена йена винайена йена саттхуса̄санена там̣ адхикаран̣ам̣ вӯпасаммати, татха̄ там̣ адхикаран̣ам̣ вӯпасаметаббам̣.

369. ваттху джа̄нитаббанти ат̣т̣хапа̄ра̄джика̄нам̣ [ат̣т̣ханнам̣ па̄ра̄джика̄нам̣ (сӣ. ка.)] ваттху джа̄нитаббам̣, тевӣсасан̇гха̄дисеса̄нам̣ ваттху джа̄нитаббам̣, двеанийата̄нам̣ ваттху джа̄нитаббам̣, двечатта̄рӣсаниссаггийа̄нам̣ ваттху джа̄нитаббам̣, ат̣т̣ха̄сӣтисатапа̄читтийа̄нам̣ ваттху джа̄нитаббам̣, два̄дасапа̄т̣идесанӣйа̄нам̣ ваттху джа̄нитаббам̣, дуккат̣а̄нам̣ ваттху джа̄нитаббам̣, дуббха̄сита̄нам̣ ваттху джа̄нитаббам̣.

370. випатти джа̄нитабба̄ти сӣлавипатти джа̄нитабба̄, а̄ча̄равипатти джа̄нитабба̄, дит̣т̣хивипатти джа̄нитабба̄, а̄джӣвавипатти джа̄нитабба̄.

371. а̄патти джа̄нитабба̄ти па̄ра̄джика̄патти джа̄нитабба̄, сан̇гха̄дисеса̄патти джа̄нитабба̄, тхуллаччайа̄патти джа̄нитабба̄, па̄читтийа̄патти джа̄нитабба̄, па̄т̣идесанӣйа̄патти джа̄нитабба̄, дуккат̣а̄патти джа̄нитабба̄, дуббха̄сита̄патти джа̄нитабба̄.

372. нида̄нам̣ джа̄нитаббанти ат̣т̣хапа̄ра̄джика̄нам̣ нида̄нам̣ джа̄нитаббам̣, тевӣсасан̇гха̄дисеса̄нам̣ нида̄нам̣ джа̄нитаббам̣, двеанийата̄нам̣ нида̄нам̣ джа̄нитаббам̣, двечатта̄рӣсаниссаггийа̄нам̣ нида̄нам̣ джа̄нитаббам̣, ат̣т̣ха̄сӣтисатапа̄читтийа̄нам̣ нида̄нам̣ джа̄нитаббам̣, два̄дасапа̄т̣идесанӣйа̄нам̣ нида̄нам̣ джа̄нитаббам̣, дуккат̣а̄нам̣ нида̄нам̣ джа̄нитаббам̣, дуббха̄сита̄нам̣ нида̄нам̣ джа̄нитаббам̣.

373. а̄ка̄ро джа̄нитабботи сан̇гхо а̄ка̄рато джа̄нитаббо, ган̣о а̄ка̄рато джа̄нитаббо, пуггало а̄ка̄рато джа̄нитаббо, чодако а̄ка̄рато джа̄нитаббо, чудитако а̄ка̄рато джа̄нитаббо. сан̇гхо а̄ка̄рато джа̄нитабботи пат̣ибало ну кхо айам̣ сан̇гхо имам̣ адхикаран̣ам̣ вӯпасаметум̣ дхаммена винайена саттхуса̄санена уда̄ху ноти, евам̣ сан̇гхо а̄ка̄рато джа̄нитаббо. ган̣о а̄ка̄рато джа̄нитабботи пат̣ибало ну кхо айам̣ ган̣о имам̣ адхикаран̣ам̣ вӯпасаметум̣ дхаммена винайена саттхуса̄санена уда̄ху ноти, евам̣ ган̣о а̄ка̄рато джа̄нитаббо. пуггало а̄ка̄рато джа̄нитабботи пат̣ибало ну кхо айам̣ пуггало имам̣ адхикаран̣ам̣ вӯпасаметум̣ дхаммена винайена саттхуса̄санена уда̄ху ноти, евам̣ пуггало а̄ка̄рато джа̄нитаббо. чодако а̄ка̄рато джа̄нитабботи каччи ну кхо айама̄йасма̄ пан̃часу дхаммесу патит̣т̣ха̄йа парам̣ чодети уда̄ху ноти, евам̣ чодако а̄ка̄рато джа̄нитаббо. чудитако а̄ка̄рато джа̄нитабботи каччи ну кхо айама̄йасма̄ двӣсу дхаммесу патит̣т̣хито сачче ча акуппе ча уда̄ху ноти, евам̣ чудитако а̄ка̄рато джа̄нитаббо.

374. пубба̄парам̣ джа̄нитаббанти каччи ну кхо айама̄йасма̄ ваттхуто ва̄ ваттхум̣ сан̇камати, випаттито ва̄ випаттим̣ сан̇камати, а̄паттито ва̄ а̄паттим̣ сан̇камати, аваджа̄нитва̄ ва̄ пат̣иджа̄на̄ти, пат̣иджа̄нитва̄ ва̄ аваджа̄на̄ти, ан̃н̃ена ва̄ ан̃н̃ам̣ пат̣ичарати, уда̄ху ноти, евам̣ пубба̄парам̣ джа̄нитаббам̣.

375. ката̄катам̣ джа̄нитаббанти метхунадхаммо джа̄нитаббо, метхунадхаммасса ануломам̣ джа̄нитаббам̣, метхунадхаммасса пуббабха̄го джа̄нитаббо. метхунадхаммо джа̄нитабботи двайам̣двайасама̄патти джа̄нитабба̄. метхунадхаммасса ануломам̣ джа̄нитаббанти бхиккху аттано мукхена парасса ан̇гаджа̄там̣ ган̣ха̄ти. метхунадхаммасса пуббабха̄го джа̄нитабботи ван̣н̣а̄ван̣н̣о [ван̣н̣о аван̣н̣о (сйа̄.)], ка̄йасам̣сагго, дут̣т̣хуллава̄ча̄, аттака̄мапа̄ричарийа̄, вачанамануппада̄нам̣ [дханамануппада̄нам̣ (ка.)].

376. каммам̣ джа̄нитаббанти сол̣асакамма̄ни джа̄нитабба̄ни – чатта̄ри апалоканакамма̄ни джа̄нитабба̄ни, чатта̄ри н̃аттикамма̄ни джа̄нитабба̄ни, чатта̄ри н̃аттидутийакамма̄ни джа̄нитабба̄ни, чатта̄ри н̃аттичатуттхакамма̄ни джа̄нитабба̄ни.

377. адхикаран̣ам̣ джа̄нитаббанти чатта̄ри адхикаран̣а̄ни джа̄нитабба̄ни – вива̄да̄дхикаран̣ам̣ джа̄нитаббам̣, анува̄да̄дхикаран̣ам̣ джа̄нитаббам̣, а̄патта̄дхикаран̣ам̣ джа̄нитаббам̣, кичча̄дхикаран̣ам̣ джа̄нитаббам̣.

378. саматхо джа̄нитабботи сатта саматха̄ джа̄нитабба̄ – саммукха̄винайо джа̄нитаббо, сативинайо джа̄нитаббо, амӯл̣хавинайо джа̄нитаббо, пат̣ин̃н̃а̄такаран̣ам̣ джа̄нитаббам̣, йебхуййасика̄ джа̄нитабба̄, тассапа̄пийасика̄ джа̄нитабба̄, тин̣аваттха̄рако джа̄нитаббо.