3. татийакатхинасиккха̄падам̣

497. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена ан̃н̃атарасса бхиккхуно ака̄лачӣварам̣ уппаннам̣ хоти. тасса там̣ чӣварам̣ кайирама̄нам̣ наппахоти. атха кхо со бхиккху там̣ чӣварам̣ усса̄петва̄ пунаппунам̣ вимаджджати. аддаса̄ кхо бхагава̄ сена̄санача̄рикам̣ а̄хин̣д̣анто там̣ бхиккхум̣ там̣ чӣварам̣ усса̄петва̄ пунаппунам̣ вимаджджантам̣. дисва̄на йена со бхиккху тенупасан̇ками; упасан̇камитва̄ там̣ бхиккхум̣ етадавоча – ‘‘кисса твам̣, бхиккху, имам̣ чӣварам̣ усса̄петва̄ пунаппунам̣ вимаджджасӣ’’ти? ‘‘идам̣ ме, бханте, ака̄лачӣварам̣ уппаннам̣. кайирама̄нам̣ наппахоти. тена̄хам̣ имам̣ чӣварам̣ усса̄петва̄ пунаппунам̣ вимаджджа̄мӣ’’ти. ‘‘аттхи пана те, бхиккху, чӣварапачча̄са̄’’ти? ‘‘аттхи, бхагава̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄, бхиккхӯ а̄мантеси – ‘‘ануджа̄на̄ми, бхиккхаве, ака̄лачӣварам̣ пат̣иггахетва̄ чӣварапачча̄са̄ никкхипиту’’нти.

498. тена кхо пана самайена бхиккхӯ – ‘‘бхагавата̄ анун̃н̃а̄там̣ ака̄лачӣварам̣ пат̣иггахетва̄ чӣварапачча̄са̄ никкхипиту’’нти ака̄лачӣвара̄ни пат̣иггахетва̄ атирекама̄сам̣ никкхипанти. та̄ни чӣвара̄ни чӣваравам̣се бхан̣д̣ика̄баддха̄ни тит̣т̣ханти. аддаса̄ кхо а̄йасма̄ а̄нандо сена̄санача̄рикам̣ а̄хин̣д̣анто та̄ни чӣвара̄ни чӣваравам̣се бхан̣д̣ика̄баддха̄ни тит̣т̣ханте. дисва̄на бхиккхӯ а̄мантеси – ‘‘кассима̄ни, а̄вусо, чӣвара̄ни чӣваравам̣се бхан̣д̣ика̄баддха̄ни тит̣т̣хантӣ’’ти? ‘‘амха̄кам̣, а̄вусо, ака̄лачӣвара̄ни чӣварапачча̄са̄ никкхитта̄нӣ’’ти. ‘‘кӣвачирам̣ пана̄вусо, има̄ни чӣвара̄ни никкхитта̄нӣ’’ти? ‘‘атирекама̄сам̣, а̄вусо’’ти. а̄йасма̄ а̄нандо уджджха̄йати кхиййати випа̄чети – ‘‘катхан̃хи на̄ма бхиккхӯ ака̄лачӣварам̣ пат̣иггахетва̄ атирекама̄сам̣ никкхиписсантӣ’’ти! атха кхо а̄йасма̄ а̄нандо те бхиккхӯ анекапарийа̄йена вигарахитва̄ бхагавато етаматтхам̣ а̄рочеси…пе… ‘‘саччам̣ кира, бхиккхаве, бхиккхӯ ака̄лачӣварам̣ пат̣иггахетва̄ атирекама̄сам̣ никкхипантӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ ака̄лачӣварам̣ пат̣иггахетва̄ атирекама̄сам̣ никкхиписсанти! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

499. ‘‘нит̣т̣хитачӣварасмим̣ бхиккхуна̄ уббхатасмим̣ катхине бхиккхуно панева ака̄лачӣварам̣ уппаджджеййа, а̄кан̇кхама̄нена бхиккхуна̄ пат̣иггахетаббам̣. пат̣иггахетва̄ кхиппамева ка̄ретаббам̣. ночасса па̄рипӯри, ма̄сапарамам̣ тена бхиккхуна̄ там̣ чӣварам̣ никкхипитаббам̣ ӯнасса па̄рипӯрийа̄ сатийа̄ пачча̄са̄йа. тато че уттари [уттарим̣ (сӣ. сйа̄.)] никкхипеййа, сатийа̄пи пачча̄са̄йа, ниссаггийам̣ па̄читтийа’’нти.

500. нит̣т̣хитачӣварасминти бхиккхуно чӣварам̣ катам̣ ва̄ хоти нат̣т̣хам̣ ва̄ винат̣т̣хам̣ ва̄ дад̣д̣хам̣ ва̄ чӣвара̄са̄ ва̄ упаччхинна̄.

уббхатасмим̣ катхинети ат̣т̣ханнам̣ ма̄тика̄нам̣ ан̃н̃атара̄йа ма̄тика̄йа уббхатам̣ хоти, сан̇гхена ва̄ антара̄ уббхатам̣ хоти.

ака̄лачӣварам̣ на̄ма анаттхате катхине ека̄дасама̄се уппаннам̣, аттхате катхине саттама̄се уппаннам̣, ка̄лепи а̄дисса диннам̣, етам̣ ака̄лачӣварам̣ на̄ма.

уппаджджеййа̄ти уппаджджеййа сан̇гхато ва̄ ган̣ато ва̄ н̃а̄тито ва̄ миттато ва̄ пам̣сукӯлам̣ ва̄ аттано ва̄ дханена.

а̄кан̇кхама̄нена̄ти иччхама̄нена пат̣иггахетаббам̣.

пат̣иггахетва̄ кхиппамева ка̄ретаббанти даса̄ха̄ ка̄ретаббам̣.

но часса па̄рипӯрӣти кайирама̄нам̣ наппахоти.

ма̄сапарамам̣ тена бхиккхуна̄ там̣ чӣварам̣ никкхипитаббанти ма̄сапарамата̄ никкхипитаббам̣.

ӯнасса па̄рипӯрийа̄ти ӯнасса па̄рипӯраттха̄йа.

сатийа̄ пачча̄са̄йа̄ти пачча̄са̄ хоти сан̇гхато ва̄ ган̣ато ва̄ н̃а̄тито ва̄ миттато ва̄ пам̣сукӯлам̣ ва̄ аттано ва̄ дханена.

тато че уттари никкхипеййа сатийа̄пи пачча̄са̄йа̄ти тадахуппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. двӣхуппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. тӣхуппанне мӯлачӣваре…пе… чатӯхуппанне… пан̃ча̄хуппанне… чха̄хуппанне… сатта̄хуппанне… ат̣т̣ха̄хуппанне … нава̄хуппанне… даса̄хуппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. ека̄дасе уппанне…пе… два̄дасе уппанне… терасе уппанне… чуддасе уппанне… паннарасе уппанне… сол̣асе уппанне… саттарасе уппанне… ат̣т̣ха̄расе уппанне… екӯнавӣсе уппанне… вӣсе уппанне мӯлачӣваре пачча̄са̄чӣварам̣ уппаджджати, даса̄ха̄ ка̄ретаббам̣. екавӣсе уппанне мӯлачӣваре пачча̄са̄чӣварам̣ уппаджджати, нава̄ха̄ ка̄ретаббам̣. два̄вӣсе уппанне…пе… тевӣсе уппанне… чатувӣсе уппанне… пан̃чавӣсе уппанне… чхаббӣсе уппанне… саттавӣсе уппанне… ат̣т̣хавӣсе уппанне… екӯнатим̣се уппанне мӯлачӣваре пачча̄са̄чӣварам̣ уппаджджати, ека̄хам̣ ка̄ретаббам̣… тим̣се уппанне мӯлачӣваре пачча̄са̄чӣварам̣ уппаджджати, тадахева адхит̣т̣ха̄таббам̣ викаппетаббам̣ виссаджджетаббам̣. но че адхит̣т̣хеййа ва̄ викаппеййа ва̄ виссаджджеййа ва̄, екатим̣се арун̣уггамане ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, ака̄лачӣварам̣ ма̄са̄тиккантам̣ ниссаггийам̣, има̄хам̣ сан̇гхасса ниссаджджа̄мӣти…пе… дадеййа̄ти…пе… дадеййунти…пе… а̄йасмато даммӣти.

висабха̄ге уппанне мӯлачӣваре пачча̄са̄чӣварам̣ уппаджджати, раттийо ча сеса̄ хонти, на ака̄ма̄ ка̄ретаббам̣.

501. ма̄са̄тикканте атиккантасан̃н̃ӣ, ниссаггийам̣ па̄читтийам̣. ма̄са̄тикканте вематико ниссаггийам̣ па̄читтийам̣. ма̄са̄тикканте анатиккантасан̃н̃ӣ ниссаггийам̣ па̄читтийам̣. анадхит̣т̣хите адхит̣т̣хитасан̃н̃ӣ…пе… авикаппите викаппитасан̃н̃ӣ… ависсаджджите виссаджджитасан̃н̃ӣ… анат̣т̣хе нат̣т̣хасан̃н̃ӣ… авинат̣т̣хе винат̣т̣хасан̃н̃ӣ… адад̣д̣хе дад̣д̣хасан̃н̃ӣ… авилутте вилуттасан̃н̃ӣ, ниссаггийам̣ па̄читтийам̣.

ниссаггийам̣ чӣварам̣ аниссаджджитва̄ парибхун̃джати, а̄патти дуккат̣асса. ма̄са̄натикканте атиккантасан̃н̃ӣ, а̄патти дуккат̣асса. ма̄са̄натикканте вематико, а̄патти дуккат̣асса. ма̄са̄натикканте анатиккантасан̃н̃ӣ, ана̄патти.

502. ана̄патти антома̄се адхит̣т̣хети, викаппети, виссаджджети, нассати, винассати, д̣айхати, аччхиндитва̄ ган̣ханти, висса̄сам̣ ган̣ханти, умматтакасса, а̄дикаммикасса̄ти.

татийакатхинасиккха̄падам̣ нит̣т̣хитам̣.