5. чӣварааччхинданасиккха̄падам̣

631. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ упанандо сакйапутто бха̄туно саддхивиха̄рикам̣ бхиккхум̣ етадавоча – ‘‘еха̄вусо, джанападача̄рикам̣ паккамисса̄ма̄’’ти. ‘‘на̄хам̣, бханте, гамисса̄ми; дуббалачӣваромхӣ’’ти. ‘‘еха̄вусо, ахам̣ те чӣварам̣ дасса̄мӣ’’ти тасса чӣварам̣ ада̄си. ассоси кхо со бхиккху – ‘‘бхагава̄ кира джанападача̄рикам̣ паккамиссатӣ’’ти. атха кхо тасса бхиккхуно етадахоси – ‘‘на да̄на̄хам̣ а̄йасмата̄ упанандена сакйапуттена саддхим̣ джанападача̄рикам̣ паккамисса̄ми, бхагавата̄ саддхим̣ джанападача̄рикам̣ паккамисса̄мӣ’’ти. атха кхо а̄йасма̄ упанандо сакйапутто там̣ бхиккхум̣ етадавоча – ‘‘ехи да̄ни, а̄вусо, джанападача̄рикам̣ паккамисса̄ма̄’’ти. ‘‘на̄хам̣, бханте, тайа̄ саддхим̣ джанападача̄рикам̣ паккамисса̄ми, бхагавата̄ саддхим̣ джанападача̄рикам̣ паккамисса̄мӣ’’ти. ‘‘йампи тйа̄хам̣, а̄вусо, чӣварам̣ ада̄сим̣, майа̄ саддхим̣ джанападача̄рикам̣ паккамиссатӣ’’ти, купито анаттамано аччхинди.

атха кхо со бхиккху бхиккхӯнам̣ етаматтхам̣ а̄рочеси. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто бхиккхусса са̄мам̣ чӣварам̣ датва̄ купито анаттамано аччхиндиссатӣ’’ти! атха кхо те бхиккхӯ а̄йасмантам̣ упанандам̣ сакйапуттам̣ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира твам̣, упананда, бхиккхусса са̄мам̣ чӣварам̣ датва̄ купито анаттамано аччхиндӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, бхиккхусса са̄мам̣ чӣварам̣ датва̄ купито анаттамано аччхиндиссаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

632. ‘‘йо пана бхиккху бхиккхусса са̄мам̣ чӣварам̣ датва̄ купито анаттамано аччхиндеййа ва̄ аччхинда̄пеййа ва̄, ниссаггийам̣ па̄читтийа’’нти.

633. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

бхиккхусса̄ти ан̃н̃асса бхиккхусса.

са̄манти сайам̣ датва̄.

чӣварам̣ на̄ма чханнам̣ чӣвара̄нам̣ ан̃н̃атарам̣ чӣварам̣, викаппанупагам̣ паччхимам̣.

купито анаттаманоти анабхираддхо а̄хатачитто кхиладжа̄то.

аччхиндеййа̄ти сайам̣ аччхиндати, ниссаггийам̣ па̄читтийам̣ [ниссаггийам̣ хоти (сйа̄.)].

аччхинда̄пеййа̄ти ан̃н̃ам̣ а̄н̣а̄пети, а̄патти дуккат̣асса. саким̣ а̄н̣атто бахукампи аччхиндати, ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣…пе… идам̣ ме, бханте, чӣварам̣ бхиккхусса са̄мам̣ датва̄ аччхиннам̣ ниссаггийам̣ има̄хам̣ сан̇гхасса ниссаджджа̄мӣти…пе… дадеййа̄ти …пе… дадеййунти…пе… а̄йасмато даммӣти.

634. упасампанне упасампаннасан̃н̃ӣ чӣварам̣ датва̄ купито анаттамано аччхиндати ва̄ аччхинда̄пети ва̄, ниссаггийам̣ па̄читтийам̣. упасампанне вематико чӣварам̣ датва̄ купито анаттамано аччхиндати ва̄ аччхинда̄пети ва̄, ниссаггийам̣ па̄читтийам̣. упасампанне анупасампаннасан̃н̃ӣ чӣварам̣ датва̄ купито анаттамано аччхиндати ва̄ аччхинда̄пети ва̄, ниссаггийам̣ па̄читтийам̣.

ан̃н̃ам̣ париккха̄рам̣ датва̄ купито анаттамано аччхиндати ва̄ аччхинда̄пети ва̄, а̄патти дуккат̣асса. анупасампаннасса чӣварам̣ ва̄ ан̃н̃ам̣ ва̄ париккха̄рам̣ датва̄ купито анаттамано аччхиндати ва̄ аччхинда̄пети ва̄, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

635. ана̄патти – со ва̄ дети, тасса ва̄ виссасанто ган̣ха̄ти, умматтакасса а̄дикаммикасса̄ти.

чӣварааччхинданасиккха̄падам̣ нит̣т̣хитам̣ пан̃чамам̣.