1. пат̣хамакатхинасиккха̄падам̣

име кхо пана̄йасманто тим̣са ниссаггийа̄ па̄читтийа̄

дхамма̄ уддесам̣ а̄гаччханти.

459. тене самайена буддхо бхагава̄ веса̄лийам̣ вихарати готамаке четийе. тена кхо пана самайена бхагавата̄ бхиккхӯнам̣ тичӣварам̣ анун̃н̃а̄там̣ хоти. чхаббаггийа̄ бхиккхӯ – ‘‘бхагавата̄ тичӣварам̣ анун̃н̃а̄та’’нти ан̃н̃енева тичӣварена га̄мам̣ пависанти, ан̃н̃ена тичӣварена а̄ра̄ме аччханти, ан̃н̃ена тичӣварена наха̄нам̣ отаранти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ атирекачӣварам̣ дха̄рессантӣ’’ти! атха кхо те бхиккхӯ чхаббаггийе бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира тумхе, бхиккхаве, атирекачӣварам̣ дха̄ретха̄’’ти? ‘‘саччам̣ бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, атирекачӣварам̣ дха̄рессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

460. ‘‘йо пана бхиккху атирекачӣварам̣ дха̄реййа, ниссаггийам̣ па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

461. [маха̄ва. 347] тена кхо пана самайена а̄йасмато а̄нандасса атирекачӣварам̣ уппаннам̣ хоти. а̄йасма̄ ча а̄нандо там̣ чӣварам̣ а̄йасмато са̄рипуттасса да̄тука̄мо хоти. а̄йасма̄ ча са̄рипутто са̄кете вихарати. атха кхо а̄йасмато а̄нандасса етадахоси – ‘‘бхагавата̄ сиккха̄падам̣ пан̃н̃аттам̣ – ‘на атирекачӣварам̣ дха̄ретабба’нти. идан̃ча ме атирекачӣварам̣ уппаннам̣. ахан̃чимам̣ чӣварам̣ а̄йасмато са̄рипуттасса да̄тука̄мо. а̄йасма̄ ча са̄рипутто са̄кете вихарати. катхам̣ ну кхо майа̄ пат̣ипаджджитабба’’нти? атха кхо а̄йасма̄ а̄нандо бхагавато етаматтхам̣ а̄рочеси. ‘‘кӣвачирам̣ пана̄нанда, са̄рипутто а̄гаччхиссатӣ’’ти? ‘‘навамам̣ ва̄, бхагава̄, дивасам̣ дасамам̣ ва̄’’ти. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, даса̄хапарамам̣ атирекачӣварам̣ дха̄ретум̣. еван̃ча пана, бхиккхаве, имам̣ сиккха̄падам̣ уддисеййа̄тха –

462. ‘‘нит̣т̣хитачӣварасмим̣ бхиккхуна̄ уббхатасмим̣ катхине даса̄хапарамам̣ атирекачӣварам̣ дха̄ретаббам̣. там̣ атикка̄майато ниссаггийам̣ па̄читтийа’’нти.

463. нит̣т̣хитачӣварасминти бхиккхуно чӣварам̣ катам̣ ва̄ хоти нат̣т̣хам̣ ва̄ винат̣т̣хам̣ ва̄ дад̣д̣хам̣ ва̄ чӣвара̄са̄ ва̄ упаччхинна̄.

уббхатасмим̣ катхинети ат̣т̣ханнам̣ ма̄тика̄нам̣ ан̃н̃атара̄йа ма̄тика̄йа уббхатам̣ хоти, сан̇гхена ва̄ антара̄ уббхатам̣ хоти.

даса̄хапараманти даса̄хапарамата̄ дха̄ретаббам̣.

атирекачӣварам̣ на̄ма анадхит̣т̣хитам̣ авикаппитам̣.

чӣварам̣ на̄ма чханнам̣ чӣвара̄нам̣ ан̃н̃атарам̣ чӣварам̣, викаппанупагам̣ паччхимам̣.

там̣ атикка̄майато ниссаггийам̣ хотӣ [хотӣти идам̣ падам̣ саббапоттхакесу аттхи, сиккха̄паде пана наттхи, евамупарипи] ти ека̄дасе арун̣уггамане ниссаггийам̣ хоти. ниссаджджитаббам̣ сан̇гхасса ва̄ ган̣асса ва̄ пуггаласса ва̄. еван̃ча пана, бхиккхаве, ниссаджджитаббам̣. тена бхиккхуна̄ сан̇гхам̣ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘идам̣ ме, бханте, чӣварам̣ даса̄ха̄тиккантам̣ ниссаггийам̣, има̄хам̣ сан̇гхасса ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. ниссат̣т̣хачӣварам̣ да̄таббам̣.

464. ‘‘сун̣а̄ту ме, бханте, сан̇гхо. идам̣ чӣварам̣ иттханна̄масса бхиккхуно ниссаггийам̣ сан̇гхасса ниссат̣т̣хам̣. йади сан̇гхасса паттакаллам̣, сан̇гхо имам̣ чӣварам̣ иттханна̄масса бхиккхуно дадеййа̄’’ти.

465. тена бхиккхуна̄ самбахуле бхиккхӯ упасан̇камитва̄ екам̣сам̣ уттара̄сан̇гам̣ каритва̄ вуд̣д̣ха̄нам̣ бхиккхӯнам̣ па̄де вандитва̄ уккут̣икам̣ нисӣдитва̄ ан̃джалим̣ паггахетва̄ евамассу вачанӣйа̄ – ‘‘идам̣ ме, бханте, чӣварам̣ даса̄ха̄тиккантам̣ ниссаггийам̣. има̄хам̣ а̄йасманта̄нам̣ ниссаджджа̄мӣ’’ти. ниссаджджитва̄ а̄патти десетабба̄. бйаттена бхиккхуна̄ пат̣ибалена а̄патти пат̣иггахетабба̄. ниссат̣т̣хачӣварам̣ да̄таббам̣.

466. ‘‘сун̣анту ме а̄йасманта̄. идам̣ чӣварам̣ иттханна̄масса бхиккхуно ниссаггийам̣ а̄йасманта̄нам̣ ниссат̣т̣хам̣. йада̄йасманта̄нам̣ паттакаллам̣, а̄йасманта̄ имам̣ чӣварам̣ иттханна̄масса бхиккхуно дадеййу’’нти.

467. тена бхиккхуна̄ екам̣ бхиккхум̣ упасан̇камитва̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ евамасса вачанӣйо – ‘‘идам̣ ме, а̄вусо, чӣварам̣ даса̄ха̄тиккантам̣ ниссаггийам̣. има̄хам̣ а̄йасмато ниссаджджа̄мӣ’’ти. ниссаджджитва̄ а̄патти десетабба̄. тена бхиккхуна̄ а̄патти пат̣иггахетабба̄. ниссат̣т̣хачӣварам̣ да̄таббам̣ – ‘‘имам̣ чӣварам̣ а̄йасмато даммӣ’’ти.

468. даса̄ха̄тикканте атиккантасан̃н̃ӣ, ниссаггийам̣ па̄читтийам̣. даса̄ха̄тикканте вематико, ниссаггийам̣ па̄читтийам̣. даса̄ха̄тикканте анатиккантасан̃н̃ӣ, ниссаггийам̣ па̄читтийам̣. анадхит̣т̣хите адхит̣т̣хитасан̃н̃ӣ, ниссаггийам̣ па̄читтийам̣. авикаппите викаппитасан̃н̃ӣ, ниссаггийам̣ па̄читтийам̣. ависсаджджите виссаджджитасан̃н̃ӣ, ниссаггийам̣ па̄читтийам̣. анат̣т̣хе нат̣т̣хасан̃н̃ӣ, ниссаггийам̣ па̄читтийам̣. авинат̣т̣хе винат̣т̣хасан̃н̃ӣ, ниссаггийам̣ па̄читтийам̣. адад̣д̣хе дад̣д̣хасан̃н̃ӣ, ниссаггийам̣ па̄читтийам̣. авилутте вилуттасан̃н̃ӣ, ниссаггийам̣ па̄читтийам̣.

ниссаггийам̣ чӣварам̣ аниссаджджитва̄ парибхун̃джати, а̄патти дуккат̣асса. даса̄ха̄натикканте атиккантасан̃н̃ӣ, а̄патти дуккат̣асса. даса̄ха̄натикканте вематико, а̄патти дуккат̣асса. даса̄ха̄натикканте анатиккантасан̃н̃ӣ, ана̄патти.

469. ана̄патти антодаса̄хам̣ адхит̣т̣хети, викаппети, виссаджджети, нассати, винассати, д̣айхати, аччхиндитва̄ ган̣ханти, висса̄сам̣ ган̣ханти, умматтакасса, а̄дикаммикасса̄ти.

470. тена кхо пана самайена чхаббаггийа̄ бхиккхӯ ниссат̣т̣хачӣварам̣ на денти. бхагавато етаматтхам̣ а̄рочесум̣. ‘‘на, бхиккхаве, ниссат̣т̣хачӣварам̣ на да̄таббам̣. йо на дадеййа, а̄патти дуккат̣асса̄’’ти.

катхинасиккха̄падам̣ нит̣т̣хитам̣ пат̣хамам̣.