10. дасамасиккха̄падам̣

879. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чан̣д̣ака̄л̣ӣ бхиккхунӣ бхиккхунӣхи саддхим̣ бхан̣д̣итва̄ атта̄нам̣ вадхитва̄ вадхитва̄ родати. йа̄ та̄ бхиккхунийо аппиччха̄…пе… та̄ уджджха̄йанти кхиййанти випа̄ченти – ‘‘катхан̃хи на̄ма аййа̄ чан̣д̣ака̄л̣ӣ атта̄нам̣ вадхитва̄ вадхитва̄ родиссатӣ’’ти…пе… саччам̣ кира, бхиккхаве, чан̣д̣ака̄л̣ӣ бхиккхунӣ атта̄нам̣ вадхитва̄ вадхитва̄ родатӣти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма, бхиккхаве, чан̣д̣ака̄л̣ӣ бхиккхунӣ атта̄нам̣ вадхитва̄ вадхитва̄ родиссати! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, бхиккхунийо имам̣ сиккха̄падам̣ уддисанту –

880. ‘‘йа̄ пана бхиккхунӣ атта̄нам̣ вадхитва̄ вадхитва̄ родеййа, па̄читтийа’’нти.

881. йа̄ пана̄ти йа̄ йа̄диса̄…пе… бхиккхунӣти…пе… айам̣ имасмим̣ аттхе адхиппета̄ бхиккхунӣти.

атта̄нанти паччаттам̣. вадхитва̄ вадхитва̄ родати, а̄патти па̄читтийасса. вадхати на родати, а̄патти дуккат̣асса. родати на вадхати, а̄патти дуккат̣асса.

882. ана̄патти н̃а̄тибйасанена ва̄ бхогабйасанена ва̄ рогабйасанена ва̄ пхут̣т̣ха̄ родати на вадхати, умматтика̄йа, а̄дикаммика̄йа̄ти.

дасамасиккха̄падам̣ нит̣т̣хитам̣.

андхака̄равагго дутийо.