3. вика̄лага̄маппависанасиккха̄падам̣

508. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ вика̄ле га̄мам̣ пависитва̄ сабха̄йам̣ нисӣдитва̄ анекавихитам̣ тираччха̄накатхам̣ катхенти, сеййатхидам̣ – [има̄ тираччха̄накатха̄йо дӣ. 1.17; ма. ни. 2.223; сам̣. ни.; а. ни. 10.69] ра̄джакатхам̣ чоракатхам̣ маха̄маттакатхам̣ сена̄катхам̣ бхайакатхам̣ йуддхакатхам̣ аннакатхам̣ па̄накатхам̣ ваттхакатхам̣ сайанакатхам̣ ма̄ла̄катхам̣ гандхакатхам̣ н̃а̄тикатхам̣ йа̄накатхам̣ га̄макатхам̣ нигамакатхам̣ нагаракатхам̣ джанападакатхам̣ иттхикатхам̣ [иттхикатхам̣ пурисакатхам̣ (ка.) маджджхимапан̣н̣а̄сат̣т̣хакатха̄ 156 пит̣т̣хе олокетабба̄] сӯракатхам̣ висикха̄катхам̣ кумбхат̣т̣ха̄накатхам̣ пуббапетакатхам̣ на̄наттакатхам̣ локаккха̄йикам̣ самуддаккха̄йикам̣ итибхава̄бхавакатхам̣ ити ва̄. манусса̄ уджджха̄йанти кхиййанти випа̄ченти – ‘‘катхан̃хи на̄ма саман̣а̄ сакйапуттийа̄ вика̄ле га̄мам̣ пависитва̄ сабха̄йам̣ нисӣдитва̄ анекавихитам̣ тираччха̄накатхам̣ катхессанти, сеййатхидам̣ – ра̄джакатхам̣ чоракатхам̣…пе… итибхава̄бхавакатхам̣ ити ва̄, сеййатха̄пи гихӣ ка̄мабхогино’’ти!

ассосум̣ кхо бхиккхӯ тесам̣ манусса̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ вика̄ле га̄мам̣ пависитва̄ сабха̄йам̣ нисӣдитва̄ анекавихитам̣ тираччха̄накатхам̣ катхессанти, сеййатхидам̣ – ра̄джакатхам̣ чоракатхам̣…пе… итибхава̄бхавакатхам̣ ити ва̄’’ти…пе… саччам̣ кира тумхе, бхиккхаве, вика̄ле га̄мам̣ пависитва̄ сабха̄йам̣ нисӣдитва̄ анекавихитам̣ тираччха̄накатхам̣ катхетха, сеййатхидам̣ – ра̄джакатхам̣ чоракатхам̣…пе… итибхава̄бхавакатхам̣ ити ва̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, вика̄ле га̄мам̣ пависитва̄ сабха̄йам̣ нисӣдитва̄ анекавихитам̣ тираччха̄накатхам̣ катхессатха, сеййатхидам̣ – ра̄джакатхам̣ чоракатхам̣…пе… итибхава̄бхавакатхам̣ ити ва̄! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

‘‘йо пана бхиккху вика̄ле га̄мам̣ пависеййа, па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

509. тена кхо пана самайена самбахула̄ бхиккхӯ косалесу джанападе са̄ваттхим̣ гаччханта̄ са̄йам̣ ан̃н̃атарам̣ га̄мам̣ упагаччхим̣су. манусса̄ те бхиккхӯ пасситва̄ етадавочум̣ – ‘‘пависатха, бханте’’ти. атха кхо те бхиккхӯ – ‘‘бхагавата̄ пат̣иккхиттам̣ вика̄ле га̄мам̣ пависиту’’нти куккучча̄йанта̄ на пависим̣су. чора̄ те бхиккхӯ аччхиндим̣су. атха кхо те бхиккхӯ са̄ваттхим̣ гантва̄ бхиккхӯнам̣ етаматтхам̣ а̄рочесум̣. бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, а̄пуччха̄ вика̄ле га̄мам̣ пависитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘йо пана бхиккху ана̄пуччха̄ вика̄ле га̄мам̣ пависеййа, па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

510. тена кхо пана самайена ан̃н̃атаро бхиккху косалесу джанападе са̄ваттхим̣ гаччханто са̄йам̣ ан̃н̃атарам̣ га̄мам̣ упагаччхи. манусса̄ там̣ бхиккхум̣ пасситва̄ етадавочум̣ – ‘‘пависатха, бханте’’ти. атха кхо со бхиккху – ‘‘бхагавата̄ пат̣иккхиттам̣ ана̄пуччха̄ вика̄ле га̄мам̣ пависиту’’нти куккучча̄йанто на па̄виси. чора̄ там̣ бхиккхум̣ аччхиндим̣су. атха кхо со бхиккху са̄ваттхим̣ гантва̄ бхиккхӯнам̣ етаматтхам̣ а̄рочеси. бхиккхӯ бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, сантам̣ бхиккхум̣ а̄пуччха̄ вика̄ле га̄мам̣ пависитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

‘‘йо пана бхиккху сантам̣ бхиккхум̣ ана̄пуччха̄ вика̄ле га̄мам̣ пависеййа, па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

511. тена кхо пана самайена ан̃н̃атаро бхиккху ахина̄ дат̣т̣хо хоти. ан̃н̃атаро бхиккху ‘‘аггим̣ а̄харисса̄мӣ’’ти га̄мам̣ гаччхати. атха кхо со бхиккху – ‘‘бхагавата̄ пат̣иккхиттам̣ сантам̣ бхиккхум̣ ана̄пуччха̄ вика̄ле га̄мам̣ пависиту’’нти куккучча̄йанто на па̄виси…пе… бхагавато етаматтхам̣ а̄рочесум̣. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, татха̄рӯпе ачча̄йике каран̣ӣйе сантам̣ бхиккхум̣ ана̄пуччха̄ вика̄ле га̄мам̣ пависитум̣. еван̃ча пана, бхиккхаве, имам̣ сиккха̄падам̣ уддисеййа̄тха –

512. ‘‘йо пана бхиккху сантам̣ бхиккхум̣ ана̄пуччха̄ вика̄ле га̄мам̣ пависеййа, ан̃н̃атра татха̄рӯпа̄ ачча̄йика̄ каран̣ӣйа̄, па̄читтийа’’нти.

513. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

санто на̄ма бхиккху сакка̄ хоти а̄пуччха̄ пависитум̣.

асанто на̄ма бхиккху на сакка̄ хоти а̄пуччха̄ пависитум̣.

вика̄ло на̄ма маджджханхике вӣтиватте йа̄ва арун̣уггамана̄.

га̄мам̣ пависеййа̄ти париккхиттасса га̄масса париккхепам̣ атиккамантасса а̄патти па̄читтийасса. апариккхиттасса га̄масса упача̄рам̣ оккамантасса а̄патти па̄читтийасса.

ан̃н̃атра татха̄рӯпа̄ ачча̄йика̄ каран̣ӣйа̄ти т̣хапетва̄ татха̄рӯпам̣ ачча̄йикам̣ каран̣ӣйам̣.

514. вика̄ле вика̄ласан̃н̃ӣ сантам̣ бхиккхум̣ ана̄пуччха̄ га̄мам̣ пависати, ан̃н̃атра татха̄рӯпа̄ ачча̄йика̄ каран̣ӣйа̄, а̄патти па̄читтийасса. вика̄ле вематико сантам̣ бхиккхум̣ ана̄пуччха̄ га̄мам̣ пависати, ан̃н̃атра татха̄рӯпа̄ ачча̄йика̄ каран̣ӣйа̄, а̄патти па̄читтийасса. вика̄ле ка̄ласан̃н̃ӣ сантам̣ бхиккхум̣ ана̄пуччха̄ га̄мам̣ пависати, ан̃н̃атра татха̄рӯпа̄ ачча̄йика̄ каран̣ӣйа̄, а̄патти па̄читтийасса.

ка̄ле вика̄ласан̃н̃ӣ, а̄патти дуккат̣асса. ка̄ле вематико, а̄патти дуккат̣асса. ка̄ле ка̄ласан̃н̃ӣ, ана̄патти.

515. ана̄патти татха̄рӯпе ачча̄йике каран̣ӣйе, сантам̣ бхиккхум̣ а̄пуччха̄ пависати, асантам̣ бхиккхум̣ ана̄пуччха̄ пависати, антара̄ра̄мам̣ гаччхати, бхиккхунупассайам̣ гаччхати, титтхийасеййам̣ гаччхати, пат̣иккаманам̣ гаччхати, га̄мена магго хоти, а̄пада̄су, умматтакасса, а̄дикаммикасса̄ти.

вика̄лага̄маппависанасиккха̄падам̣ нит̣т̣хитам̣ татийам̣.