9. каммапат̣иба̄ханасиккха̄падам̣

474. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ ана̄ча̄рам̣ а̄чаритва̄ екамекасса камме кайирама̄не пат̣иккосанти. тена кхо пана самайена сан̇гхо саннипатито хоти кеначидева каран̣ӣйена. чхаббаггийа̄ бхиккхӯ чӣваракаммам̣ каронта̄ екасса чхандам̣ адам̣су. атха кхо сан̇гхо – ‘‘айам̣, а̄вусо, чхаббаггийо бхиккху екако а̄гато, хандасса майам̣ каммам̣ карома̄’’ти тасса каммам̣ ака̄си. атха кхо со бхиккху йена чхаббаггийа̄ бхиккхӯ тенупасан̇ками. чхаббаггийа̄ бхиккхӯ там̣ бхиккхум̣ етадавочум̣ – ‘‘ким̣, а̄вусо, сан̇гхо ака̄сӣ’’ти? ‘‘сан̇гхо ме, а̄вусо, каммам̣ ака̄сӣ’’ти. ‘‘на майам̣, а̄вусо, етадаттха̄йа чхандам̣ адамха̄ – ‘‘туйхам̣ каммам̣ кариссатӣ’’ти. саче ча майам̣ джа̄неййа̄ма ‘‘туйхам̣ каммам̣ кариссатӣ’’ти, на майам̣ чхандам̣ дадеййа̄ма̄’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ дхаммика̄нам̣ камма̄нам̣ чхандам̣ датва̄ паччха̄ кхӣйанадхаммам̣ [кхиййадхаммам̣ (итипи)] а̄паджджиссантӣ’’ти…пе… саччам̣ кира тумхе, бхиккхаве, дхаммика̄нам̣ камма̄нам̣ чхандам̣ датва̄ паччха̄ кхӣйанадхаммам̣ [кхиййадхаммам̣ (итипи)] а̄паджджатха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, дхаммика̄нам̣ камма̄нам̣ чхандам̣ датва̄ паччха̄ кхӣйанадхаммам̣ [кхиййадхаммам̣ (итипи)] а̄паджджиссатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

475. ‘‘йо пана бхиккху дхаммика̄нам̣ камма̄нам̣ чхандам̣ датва̄ паччха̄ кхӣйанадхаммам̣ а̄паджджеййа, па̄читтийа’’нти.

476. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

дхаммикам̣ на̄ма каммам̣ апалоканакаммам̣ н̃аттикаммам̣ н̃аттидутийакаммам̣ н̃аттичатуттхакаммам̣ дхаммена винайена саттхуса̄санена катам̣, етам̣ дхаммикам̣ на̄ма каммам̣. чхандам̣ датва̄ кхиййати а̄патти па̄читтийасса.

477. дхаммакамме дхаммакаммасан̃н̃ӣ чхандам̣ датва̄ кхиййати, а̄патти па̄читтийасса. дхаммакамме вематико чхандам̣ датва̄ кхиййати, а̄патти дуккат̣асса. дхаммакамме адхаммакаммасан̃н̃ӣ чхандам̣ датва̄ кхиййати, ана̄патти. адхаммакамме дхаммакаммасан̃н̃ӣ, а̄патти дуккат̣асса. адхаммакамме вематико, а̄патти дуккат̣асса. адхаммакамме адхаммакаммасан̃н̃ӣ, ана̄патти.

478. ана̄патти – ‘‘адхаммена ва̄ ваггена ва̄ на камма̄рахасса ва̄ каммам̣ ката’’нти джа̄нанто кхиййати, умматтакасса, а̄дикаммикасса̄ти.

каммапат̣иба̄ханасиккха̄падам̣ нит̣т̣хитам̣ навамам̣.