4. паха̄расиккха̄падам̣

449. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ купита̄ анаттамана̄ саттарасаваггийа̄нам̣ бхиккхӯнам̣ паха̄рам̣ денти. те роданти. бхиккхӯ евама̄хам̣су – ‘‘кисса тумхе, а̄вусо, родатха̄’’ти? ‘‘име, а̄вусо, чхаббаггийа̄ бхиккхӯ купита̄ анаттамана̄ амха̄кам̣ паха̄рам̣ дентӣ’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ купита̄ анаттамана̄ бхиккхӯнам̣ паха̄рам̣ дассантӣ’’ти…пе… саччам̣ кира тумхе, бхиккхаве, купита̄ анаттамана̄ бхиккхӯнам̣ паха̄рам̣ детха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, купита̄ анаттамана̄ бхиккхӯнам̣ паха̄рам̣ дассатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

450. ‘‘йо пана бхиккху бхиккхусса купито анаттамано паха̄рам̣ дадеййа, па̄читтийа’’нти.

451. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

бхиккхусса̄ти ан̃н̃асса бхиккхусса.

купито анаттаманоти анабхираддхо а̄хатачитто кхиладжа̄то.

паха̄рам̣ дадеййа̄ти ка̄йена ва̄ ка̄йапат̣ибаддхена ва̄ ниссаггийена ва̄ антамасо уппалапаттенапи паха̄рам̣ дети, а̄патти па̄читтийасса.

452. упасампанне упасампаннасан̃н̃ӣ купито анаттамано паха̄рам̣ дети, а̄патти па̄читтийасса. упасампанне вематико купито анаттамано паха̄рам̣ дети, а̄патти па̄читтийасса. упасампанне анупасампаннасан̃н̃ӣ купито анаттамано паха̄рам̣ дети, а̄патти па̄читтийасса.

анупасампаннасса купито анаттамано паха̄рам̣ дети, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

453. ана̄патти кеначи вихет̣хӣйама̄но моккха̄дхиппа̄йо паха̄рам̣ дети, умматтакасса, а̄дикаммикасса̄ти.

паха̄расиккха̄падам̣ нит̣т̣хитам̣ чатуттхам̣.