3. уккот̣анасиккха̄падам̣

392. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ джа̄нам̣ йатха̄дхаммам̣ нихата̄дхикаран̣ам̣ пунакамма̄йа уккот̣енти – ‘‘акатам̣ каммам̣ дуккат̣ам̣ каммам̣ пуна ка̄таббам̣ каммам̣ анихатам̣ дуннихатам̣ пуна ниханитабба’’нти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ джа̄нам̣ йатха̄дхаммам̣ нихата̄дхикаран̣ам̣ пунакамма̄йа уккот̣ессантӣ’’ти …пе… саччам̣ кира тумхе, бхиккхаве, джа̄нам̣ йатха̄дхаммам̣ нихата̄дхикаран̣ам̣ пунакамма̄йа уккот̣етха̄’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, джа̄нам̣ йатха̄дхаммам̣ нихата̄дхикаран̣ам̣ пунакамма̄йа уккот̣ессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

393. ‘‘йо пана бхиккху джа̄нам̣ йатха̄дхаммам̣ нихата̄дхикаран̣ам̣ пунакамма̄йа уккот̣еййа, па̄читтийа’’нти.

394. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

джа̄на̄ти на̄ма са̄мам̣ ва̄ джа̄на̄ти, ан̃н̃е ва̄ тасса а̄роченти, со ва̄ а̄рочети.

йатха̄дхаммам̣ на̄ма дхаммена винайена саттхуса̄санена катам̣, етам̣ йатха̄дхаммам̣ на̄ма.

адхикаран̣ам̣ на̄ма чатта̄ри адхикаран̣а̄ни – вива̄да̄дхикаран̣ам̣, анува̄да̄дхикаран̣ам̣, а̄патта̄дхикаран̣ам̣, кичча̄дхикаран̣ам̣.

пунакамма̄йа уккот̣еййа̄ти ‘‘акатам̣ каммам̣ дуккат̣ам̣ каммам̣ пунака̄таббам̣ каммам̣ анихатам̣ дуннихатам̣ пуна ниханитаббам̣’’ти уккот̣ети, а̄патти па̄читтийасса.

395. дхаммакамме дхаммакаммасан̃н̃ӣ уккот̣ети, а̄патти па̄читтийасса. дхаммакамме вематико уккот̣ети, а̄патти дуккат̣асса. дхаммакамме адхаммакаммасан̃н̃ӣ уккот̣ети, ана̄патти. адхаммакамме дхаммакаммасан̃н̃ӣ, а̄патти дуккат̣асса. адхаммакамме вематико, а̄патти дуккат̣асса. адхаммакамме адхаммакаммасан̃н̃ӣ, ана̄патти.

396. ана̄патти ‘‘адхаммена ва̄ ваггена ва̄ на камма̄рахасса ва̄ каммам̣ ката’’нти джа̄нанто уккот̣ети, умматтакасса, а̄дикаммикасса̄ти.

уккот̣анасиккха̄падам̣ нит̣т̣хитам̣ татийам̣.