7. наха̄насиккха̄падам̣
357. тена самайена буддхо бхагава̄ ра̄джагахе вихарати вел̣уване каландаканива̄пе. тена кхо пана самайена бхиккхӯ таподе наха̄йанти. тена кхо пана самайена [атха кхо (сӣ. сйа̄.)] ра̄джа̄ ма̄гадхо сенийо бимбиса̄ро ‘‘сӣсам̣ наха̄йисса̄мӣ’’ти таподам̣ гантва̄ – ‘‘йа̄ва̄ййа̄ наха̄йантӣ’’ти екамантам̣ пат̣има̄неси. бхиккхӯ йа̄ва самандхака̄ра̄ наха̄йим̣су. атха кхо ра̄джа̄ ма̄гадхо сенийо бимбиса̄ро вика̄ле сӣсам̣ наха̄йитва̄, нагарадва̄ре тхаките бахинагаре васитва̄, ка̄лассева асамбхиннена вилепанена йена бхагава̄ тенупасан̇ками; упасан̇камитва̄ бхагавантам̣ абхива̄детва̄ екамантам̣ нисӣди. екамантам̣ нисиннам̣ кхо ра̄джа̄нам̣ ма̄гадхам̣ сенийам̣ бимбиса̄рам̣ бхагава̄ етадавоча – ‘‘кисса твам̣, маха̄ра̄джа, ка̄лассева а̄гато асамбхиннена вилепанена̄’’ти? атха кхо ра̄джа̄ ма̄гадхо сенийо бимбиса̄ро бхагавато етаматтхам̣ а̄рочеси. атха кхо бхагава̄ ра̄джа̄нам̣ ма̄гадхам̣ сенийам̣ бимбиса̄рам̣ дхаммийа̄ катха̄йа сандассеси сама̄дапеси самуттеджеси сампахам̣сеси. атха кхо ра̄джа̄ ма̄гадхо сенийо бимбиса̄ро бхагавата̄ дхаммийа̄ катха̄йа сандассито сама̄дапито самуттеджито сампахам̣сито ут̣т̣ха̄йа̄сана̄ бхагавантам̣ абхива̄детва̄ падаккхин̣ам̣ катва̄ пакка̄ми. атха кхо бхагава̄ етасмим̣ нида̄не етасмим̣ пакаран̣е бхиккхусан̇гхам̣ саннипа̄та̄петва̄ бхиккхӯ пат̣ипуччхи – ‘‘саччам̣ кира, бхиккхаве, бхиккхӯ ра̄джа̄нампи пасситва̄ на маттам̣ джа̄нитва̄ наха̄йантӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ ра̄джа̄нампи пасситва̄ на маттам̣ джа̄нитва̄ наха̄йиссанти! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –
‘‘йо пана бхиккху оренаддхама̄сам̣ наха̄йеййа, па̄читтийа’’нти.
еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.
358. тена кхо пана самайена бхиккхӯ ун̣хасамайе парил̣а̄хасамайе куккучча̄йанта̄ на наха̄йанти, седагатена гаттена сайанти. чӣварампи сена̄санампи дуссати. бхагавато етаматтхам̣ а̄рочесум̣…пе… ануджа̄на̄ми, бхиккхаве, ун̣хасамайе парил̣а̄хасамайе оренаддхама̄сам̣ наха̄йитум̣. еван̃ча пана, бхиккхаве, имам̣ сиккха̄падам̣ уддисеййа̄тха –
‘‘йо пана бхиккху оренаддхама̄сам̣ наха̄йеййа, ан̃н̃атра самайа̄, па̄читтийам̣. таттха̄йам̣ самайо. дийад̣д̣хо ма̄со сесо гимха̄нанти [гимха̄нам̣ (итипи)] васса̄насса пат̣хамо ма̄со иччете ад̣д̣хатеййама̄са̄ ун̣хасамайо парил̣а̄хасамайо – айам̣ таттха самайо’’ти.
еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.
359. тена кхо пана самайена бхиккхӯ гила̄на̄ хонти. гила̄напуччхака̄ бхиккхӯ гила̄не бхиккхӯ етадавочум̣ – ‘‘качча̄вусо, кхаманӣйам̣, каччи йа̄панӣйа’’нти? ‘‘пуббе майам̣, а̄вусо, оренаддхама̄сам̣ наха̄йа̄ма, тена но пха̄су хоти; ида̄ни пана ‘‘бхагавата̄ пат̣иккхитта’’нти куккучча̄йанта̄ на наха̄йа̄ма, тена но на пха̄су хотӣ’’ти. бхагавато етаматтхам̣ а̄рочесум̣…пе… ануджа̄на̄ми, бхиккхаве, гила̄нена бхиккхуна̄ оренаддхама̄сам̣ наха̄йитум̣. еван̃ча пана, бхиккхаве, имам̣ сиккха̄падам̣ уддисеййа̄тха –
‘‘йо пана бхиккху оренаддхама̄сам̣ наха̄йеййа, ан̃н̃атра самайа̄, па̄читтийам̣. таттха̄йам̣ самайо. дийад̣д̣хо ма̄со сесо гимха̄нанти [гимха̄нам̣ (итипи)] васса̄насса пат̣хамо ма̄со иччете ад̣д̣хатеййама̄са̄ ун̣хасамайо, парил̣а̄хасамайо, гила̄насамайо – айам̣ таттха самайо’’ти.
еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.
360. тена кхо пана самайена бхиккхӯ навакаммам̣ катва̄ куккучча̄йанта̄ на наха̄йанти. те седагатена гаттена сайанти. чӣварампи сена̄санампи дуссати. бхагавато етаматтхам̣ а̄рочесум̣…пе… ануджа̄на̄ми, бхиккхаве, каммасамайе оренаддхама̄сам̣ наха̄йитум̣. еван̃ча пана, бхиккхаве, имам̣ сиккха̄падам̣ уддисеййа̄тха –
‘‘йо пана бхиккху оренаддхама̄сам̣ наха̄йеййа, ан̃н̃атра самайа̄, па̄читтийам̣. таттха̄йам̣ самайо. дийад̣д̣хо ма̄со сесо гимха̄нанти васса̄насса пат̣хамо ма̄со иччете ад̣д̣хатеййама̄са̄ ун̣хасамайо, парил̣а̄хасамайо, гила̄насамайо, каммасамайо – айам̣ таттха самайо’’ти.
еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.
361. тена кхо пана самайена бхиккхӯ аддха̄нам̣ гантва̄ куккучча̄йанта̄ на наха̄йанти. те седагатена гаттена сайанти. чӣварампи сена̄санампи дуссати. бхагавато етаматтхам̣ а̄рочесум̣…пе… ануджа̄на̄ми, бхиккхаве, аддха̄нагаманасамайе оренаддхама̄сам̣ наха̄йитум̣. еван̃ча пана, бхиккхаве, имам̣ сиккха̄падам̣ уддисеййа̄тха –
‘‘йо пана бхиккху оренаддхама̄сам̣ наха̄йеййа, ан̃н̃атра самайа̄, па̄читтийам̣. таттха̄йам̣ самайо. дийад̣д̣хо ма̄со сесо гимха̄нанти васса̄насса пат̣хамо ма̄со иччете ад̣д̣хатеййама̄са̄ ун̣хасамайо, парил̣а̄хасамайо, гила̄насамайо, каммасамайо, аддха̄нагаманасамайо – айам̣ таттха самайо’’ти.
еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.
362. тена кхо пана самайена самбахула̄ бхиккхӯ аджджхока̄се чӣваракаммам̣ каронта̄ сараджена ва̄тена окин̣н̣а̄ хонти. дево ча тхокам̣ тхокам̣ пхуса̄йати. бхиккхӯ куккучча̄йанта̄ на наха̄йанти, килиннена гаттена сайанти. чӣварампи сена̄санампи дуссати. бхагавато етаматтхам̣ а̄рочесум̣…пе… ануджа̄на̄ми, бхиккхаве, ва̄тавут̣т̣хисамайе оренаддхама̄сам̣ наха̄йитум̣. еван̃ча пана, бхиккхаве, имам̣ сиккха̄падам̣ уддисеййа̄тха –
363. ‘‘йо пана бхиккху оренаддхама̄сам̣ наха̄йеййа, ан̃н̃атра самайа̄, па̄читтийам̣. таттха̄йам̣ самайо. дийад̣д̣хо ма̄со сесо гимха̄нанти васса̄насса пат̣хамо ма̄со иччете ад̣д̣хатеййама̄са̄ ун̣хасамайо, парил̣а̄хасамайо, гила̄насамайо, каммасамайо, аддха̄нагаманасамайо, ва̄тавут̣т̣хисамайо – айам̣ таттха самайо’’ти.
364. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.
оренаддхама̄санти ӯнакаддхама̄сам̣.
наха̄йеййа̄ти чун̣н̣ена ва̄ маттика̄йа ва̄ наха̄йати, пайоге пайоге дуккат̣ам̣. наха̄напарийоса̄не, а̄патти па̄читтийасса.
ан̃н̃атра самайа̄ти т̣хапетва̄ самайам̣.
ун̣хасамайо на̄ма дийад̣д̣хо ма̄со сесо гимха̄нам̣. парил̣а̄хасамайо на̄ма васса̄насса пат̣хамо ма̄со ‘‘иччете ад̣д̣хатеййама̄са̄ ун̣хасамайо парил̣а̄хасамайо’’ти наха̄йитаббам̣.
гила̄насамайо на̄ма йасса вина̄ наха̄нена на пха̄су хоти. гила̄насамайоти наха̄йитаббам̣.
каммасамайо на̄ма антамасо паривен̣ампи саммат̣т̣хам̣ хоти. ‘‘каммасамайо’’ти наха̄йитаббам̣.
аддха̄нагаманасамайо на̄ма ‘‘аддхайоджанам̣ гаччхисса̄мӣ’’ти наха̄йитаббам̣, гаччхантена наха̄йитаббам̣, гатена наха̄йитаббам̣.
ва̄тавут̣т̣хисамайо на̄ма бхиккхӯ сараджена ва̄тена окин̣н̣а̄ хонти, две ва̄ тӣн̣и ва̄ удакапхусита̄ни ка̄йе патита̄ни хонти. ‘‘ва̄тавут̣т̣хисамайо’’ти наха̄йитаббам̣.
365. ӯнакаддхама̄се ӯнакасан̃н̃ӣ, ан̃н̃атра самайа̄, наха̄йати, а̄патти па̄читтийасса. ӯнакаддхама̄се вематико, ан̃н̃атра самайа̄, наха̄йати, а̄патти па̄читтийасса. ӯнакаддхама̄се атирекасан̃н̃ӣ, ан̃н̃атра самайа̄, наха̄йати, а̄патти па̄читтийасса.
атирекаддхама̄се ӯнакасан̃н̃ӣ, а̄патти дуккат̣асса. атирекаддхама̄се вематико, а̄патти дуккат̣асса. атирекаддхама̄се атирекасан̃н̃ӣ, ана̄патти.
366. ана̄патти самайе, аддхама̄сам̣ наха̄йати, атирекаддхама̄сам̣ наха̄йати, па̄рам̣ гаччханто наха̄йати, саббапаччантимесу джанападесу, а̄пада̄су, умматтакасса, а̄дикаммикасса̄ти.
наха̄насиккха̄падам̣ нит̣т̣хитам̣ саттамам̣.