5. бхим̣са̄панасиккха̄падам̣

345. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена чхаббаггийа̄ бхиккхӯ саттарасаваггийе бхиккхӯ бхим̣са̄пенти. те бхим̣са̄пӣйама̄на̄ роданти. бхиккхӯ евама̄хам̣су – ‘‘кисса тумхе, а̄вусо, родатха̄’’ти? ‘‘име, а̄вусо, чхаббаггийа̄ бхиккхӯ амхе бхим̣са̄пентӣ’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ бхиккхум̣ бхим̣са̄пессантӣ’’ти…пе… саччам̣ кира тумхе, бхиккхаве, бхиккхум̣ бхим̣са̄петха̄ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма тумхе, могхапуриса̄, бхиккхум̣ бхим̣са̄пессатха! нетам̣, могхапуриса̄, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

346. ‘‘йо пана бхиккху бхиккхум̣ бхим̣са̄пеййа, па̄читтийа’’нти.

347. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

бхиккхунти ан̃н̃ам̣ бхиккхум̣.

бхим̣са̄пеййа̄ти упасампанно упасампаннам̣ бхим̣са̄петука̄мо рӯпам̣ ва̄ саддам̣ ва̄ гандхам̣ ва̄ расам̣ ва̄ пхот̣т̣хаббам̣ ва̄ упасам̣харати. бха̄йеййа ва̄ со на ва̄ бха̄йеййа, а̄патти па̄читтийасса. чораканта̄рам̣ ва̄ ва̄л̣аканта̄рам̣ ва̄ писа̄чаканта̄рам̣ ва̄ а̄чиккхати. бха̄йеййа ва̄ со на ва̄ бха̄йеййа, а̄патти па̄читтийасса.

348. упасампанне упасампаннасан̃н̃ӣ бхим̣са̄пети, а̄патти па̄читтийасса. упасампанне вематико бхим̣са̄пети, а̄патти па̄читтийасса. ‘упасампанне анупасампаннасан̃н̃ӣ бхим̣са̄пети, а̄патти па̄читтийасса.

анупасампаннам̣ бхим̣са̄петука̄мо рӯпам̣ ва̄ саддам̣ ва̄ гандхам̣ ва̄ расам̣ ва̄ пхот̣т̣хаббам̣ ва̄ упасам̣харати. бха̄йеййа ва̄ со на ва̄ бха̄йеййа, а̄патти дуккат̣асса. чораканта̄рам̣ ва̄ ва̄л̣аканта̄рам̣ ва̄ писа̄чаканта̄рам̣ ва̄ а̄чиккхати. бха̄йеййа ва̄ со на ва̄ бха̄йеййа, а̄патти дуккат̣асса. анупасампанне упасампаннасан̃н̃ӣ, а̄патти дуккат̣асса. анупасампанне вематико, а̄патти дуккат̣асса. анупасампанне анупасампаннасан̃н̃ӣ, а̄патти дуккат̣асса.

349. ана̄патти на бхим̣са̄петука̄мо рӯпам̣ ва̄ саддам̣ ва̄ гандхам̣ ва̄ расам̣ ва̄ пхот̣т̣хаббам̣ ва̄ упасам̣харати, чораканта̄рам̣ ва̄ ва̄л̣аканта̄рам̣ ва̄ писа̄чаканта̄рам̣ ва̄ а̄чиккхати, умматтакасса, а̄дикаммикасса̄ти.

бхим̣са̄панасиккха̄падам̣ нит̣т̣хитам̣ пан̃чамам̣.