3. сабходжанасиккха̄падам̣

279. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена а̄йасма̄ упанандо сакйапутто саха̄йакасса гхарам̣ гантва̄ тасса паджа̄патийа̄ саддхим̣ сайанигхаре [сайанӣгхаре (сйа̄.)] нисаджджам̣ каппеси. атха кхо со пурисо йена̄йасма̄ упанандо сакйапутто тенупасан̇ками; упасан̇камитва̄ а̄йасмантам̣ упанандам̣ сакйапуттам̣ абхива̄детва̄ екамантам̣ нисӣди. екамантам̣ нисинно кхо со пурисо паджа̄патим̣ етадавоча – ‘‘дадеха̄ййасса бхиккха’’нти. атха кхо са̄ иттхӣ а̄йасмато упанандасса сакйапуттасса бхиккхам̣ ада̄си. атха кхо со пурисо а̄йасмантам̣ упанандам̣ сакйапуттам̣ етадавоча – ‘‘гаччхатха, бханте, йато аййасса бхиккха̄ динна̄’’ти. атха кхо са̄ иттхӣ саллаккхетва̄ – ‘‘парийут̣т̣хито айам̣ пурисо’’ти, а̄йасмантам̣ упанандам̣ сакйапуттам̣ етадавоча – ‘‘нисӣдатха, бханте, ма̄ агамиттха̄’’ти. дутийампи кхо со пурисо…пе… татийампи кхо со пурисо а̄йасмантам̣ упанандам̣ сакйапуттам̣ етадавоча – ‘‘гаччхатха, бханте, йато аййасса бхиккха̄ динна̄’’ти. татийампи кхо са̄ иттхӣ а̄йасмантам̣ упанандам̣ сакйапуттам̣ етадавоча – ‘‘нисӣдатха, бханте, ма̄ агамиттха̄’’ти.

атха кхо со пурисо никкхамитва̄ бхиккхӯ уджджха̄песи – ‘‘айам̣, бханте, аййо упанандо майхам̣ паджа̄патийа̄ саддхим̣ сайанигхаре нисинно. со майа̄ уййоджӣйама̄но на иччхати гантум̣. бахукичча̄ майам̣ бахукаран̣ӣйа̄’’ти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма а̄йасма̄ упанандо сакйапутто сабходжане куле анупакхаджджа нисаджджам̣ каппессатӣ’’ти…пе… саччам̣ кира твам̣, упананда, сабходжане куле анупакхаджджа нисаджджам̣ каппесӣти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма твам̣, могхапуриса, сабходжане куле анупакхаджджа нисаджджам̣ каппессаси! нетам̣, могхапуриса, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

280. ‘‘йо пана бхиккху сабходжане куле анупакхаджджа нисаджджам̣ каппеййа, па̄читтийа’’нти.

281. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

сабходжанам̣ на̄ма кулам̣ иттхӣ чева хоти пурисо ча, иттхӣ ча пурисо ча убхо аниккханта̄ хонти, убхо авӣтара̄га̄.

анупакхаджджа̄ти анупависитва̄.

нисаджджам̣ каппеййа̄ти махаллаке гхаре пит̣т̣хасан̇гха̄т̣асса [пит̣т̣хисан̇гха̄т̣асса (сйа̄.)] хаттхапа̄сам̣ виджахитва̄ нисӣдати, а̄патти па̄читтийасса. кхуддаке гхаре пит̣т̣хивам̣сам̣ атиккамитва̄ нисӣдати, а̄патти па̄читтийасса.

282. сайанигхаре сайанигхарасан̃н̃ӣ сабходжане куле анупакхаджджа нисаджджам̣ каппети, а̄патти па̄читтийасса. сайанигхаре вематико сабходжане куле анупакхаджджа нисаджджам̣ каппети, а̄патти па̄читтийасса. сайанигхаре насайанигхарасан̃н̃ӣ сабходжане куле анупакхаджджа нисаджджам̣ каппети, а̄патти па̄читтийасса.

насайанигхаре сайанигхарасан̃н̃ӣ, а̄патти дуккат̣асса. насайанигхаре вематико, а̄патти дуккат̣асса. насайанигхаре насайанигхарасан̃н̃ӣ, ана̄патти.

283. ана̄патти махаллаке гхаре пит̣т̣хасан̇гха̄т̣асса хаттхапа̄сам̣ авиджахитва̄ нисӣдати, кхуддаке гхаре пит̣т̣хивам̣сам̣ анатиккамитва̄ нисӣдати, бхиккху дутийо хоти, убхо никкханта̄ хонти, убхо вӣтара̄га̄, насайанигхаре, умматтакасса, а̄дикаммикасса̄ти.

сабходжанасиккха̄падам̣ нит̣т̣хитам̣ татийам̣.