4. пат̣хамасена̄санасиккха̄падам̣

108. тена самайена буддхо бхагава̄ са̄ваттхийам̣ вихарати джетаване ана̄тхапин̣д̣икасса а̄ра̄ме. тена кхо пана самайена бхиккхӯ хемантике ка̄ле аджджхока̄се сена̄санам̣ пан̃н̃апетва̄ ка̄йам̣ ота̄пента̄ ка̄ле а̄рочите там̣ паккаманта̄ нева уддхарим̣су на уддхара̄песум̣, ана̄пуччха̄ паккамим̣су. сена̄санам̣ оват̣т̣хам̣ хоти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхам̣ хи на̄ма бхиккхӯ аджджхока̄се сена̄санам̣ пан̃н̃апетва̄ там̣ паккаманта̄ нева уддхариссанти на уддхара̄пессанти, ана̄пуччха̄ паккамиссанти, сена̄санам̣ оват̣т̣ха’’нти! атха кхо те бхиккхӯ те анекапарийа̄йена вигарахитва̄ бхагавато етаматтхам̣ а̄рочесум̣…пе… саччам̣ кира, бхиккхаве, бхиккхӯ аджджхока̄се…пе… еван̃ча пана, бхиккхаве, имам̣ сиккха̄падам̣ уддисеййа̄тха –

109. ‘‘йо пана бхиккху сан̇гхикам̣ ман̃чам̣ ва̄ пӣт̣хам̣ ва̄ бхисим̣ ва̄ коччхам̣ ва̄ аджджхока̄се сантхаритва̄ ва̄ сантхара̄петва̄ ва̄ там̣ паккаманто нева уддхареййа на уддхара̄пеййа, ана̄пуччхам̣ ва̄ гаччхеййа, па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

110. тена кхо пана самайена бхиккхӯ аджджхока̄се васитва̄ ка̄лассева сена̄санам̣ абхихаранти. аддаса̄ кхо бхагава̄ те бхиккхӯ ка̄лассева сена̄санам̣ абхихаранте. дисва̄на етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, ат̣т̣ха ма̄се авассикасан̇кете [васитум̣ авассикасам̣кете (итипи)] ман̣д̣апе ва̄ руккхамӯле ва̄ йаттха ка̄ка̄ ва̄ кулала̄ ва̄ на ӯхаданти таттха сена̄санам̣ никкхипиту’’нти.

111. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

сан̇гхикам̣ на̄ма сан̇гхасса диннам̣ хоти париччаттам̣.

ман̃чо на̄ма чатта̄ро ман̃ча̄ – маса̄рако, бундика̄баддхо, кул̣ӣрапа̄дако, а̄хаччапа̄дако.

пӣт̣хам̣ на̄ма чатта̄ри пӣт̣ха̄ни – маса̄ракам̣, бундика̄баддхам̣, кул̣ӣрапа̄дакам̣, а̄хаччапа̄дакам̣.

бхиси на̄ма пан̃ча бхисийо – ун̣н̣абхиси, чол̣абхити, ва̄кабхиси, тин̣абхиси, пан̣н̣абхиси.

коччхам̣ на̄ма – ва̄камайам̣ ва̄ усӣрамайам̣ ва̄ мун̃джамайам̣ ва̄ паббаджамайам̣ [баббаджамайам̣ (сӣ.)] ва̄ анто сам̣вет̣хетва̄ баддхам̣ хоти.

сантхаритва̄ти сайам̣ сантхаритва̄.

сантхара̄петва̄ти ан̃н̃ам̣ сантхара̄петва̄. анупасампаннам̣ сантхара̄пети, тасса палибодхо. упасампаннам̣ сантхара̄пети, сантха̄ракасса [сантхатасса (итипи)] палибодхо.

там̣ паккаманто нева уддхареййа̄ти на сайам̣ уддхареййа.

на уддхара̄пеййа̄ти на ан̃н̃ам̣ уддхара̄пеййа.

ана̄пуччхам̣ ва̄ гаччхеййа̄ти бхиккхум̣ ва̄ са̄ман̣ерам̣ ва̄ а̄ра̄микам̣ ва̄ ана̄пуччха̄ маджджхимасса пурисасса лед̣д̣упа̄там̣ атиккамантасса а̄патти па̄читтийасса.

112. сан̇гхике сан̇гхикасан̃н̃ӣ аджджхока̄се сантхаритва̄ ва̄ сантхара̄петва̄ ва̄ там̣ паккаманто нева уддхареййа на уддхара̄пеййа ана̄пуччхам̣ ва̄ гаччхеййа, а̄патти па̄читтийасса. сан̇гхике вематико…пе… сан̇гхике пуггаликасан̃н̃ӣ аджджхока̄се сантхаритва̄ ва̄ сантхара̄петва̄ ва̄ там̣ паккаманто нева уддхареййа на уддхара̄пеййа, ана̄пуччхам̣ ва̄ гаччхеййа, а̄патти па̄читтийасса.

чимиликам̣ ва̄ уттараттхаран̣ам̣ ва̄ бхӯматтхаран̣ам̣ ва̄ тат̣т̣икам̣ ва̄ чаммакхан̣д̣ам̣ ва̄ па̄дапун̃чханим̣ ва̄ пхалакапӣт̣хам̣ ва̄ аджджхока̄се сантхаритва̄ ва̄ сантхара̄петва̄ ва̄ там̣ паккаманто нева уддхареййа на уддхара̄пеййа, ана̄пуччхам̣ ва̄ гаччхеййа, а̄патти дуккат̣асса. пуггалике сан̇гхикасан̃н̃ӣ, а̄патти дуккат̣асса. пуггалике вематико, а̄патти дуккат̣асса. пуггалике пуггаликасан̃н̃ӣ ан̃н̃асса пуггалике, а̄патти дуккат̣асса. аттано пуггалике ана̄патти.

113. ана̄патти уддхаритва̄ гаччхати, уддхара̄петва̄ гаччхати, а̄пуччхам̣ гаччхати, ота̄пенто гаччхати, кеначи палибуддхам̣ хоти, а̄пада̄су, умматтакасса, а̄дикаммикасса̄ти.

пат̣хамасена̄санасиккха̄падам̣ нит̣т̣хитам̣ чатуттхам̣.