5. сахасеййасиккха̄падам̣

49. тена самайена буддхо бхагава̄ а̄л̣авийам̣ вихарати агга̄л̣аве четийе. тена кхо пана самайена упа̄сака̄ а̄ра̄мам̣ а̄гаччханти дхаммассавана̄йа. дхамме бха̄сите тхера̄ бхиккхӯ йатха̄виха̄рам̣ гаччханти. навака̄ бхиккхӯ таттхева упат̣т̣ха̄наса̄ла̄йам̣ упа̄сакехи саддхим̣ мут̣т̣хассатӣ, асампаджа̄на̄, нагга̄, викӯджама̄на̄, ка̄каччхама̄на̄ сеййам̣ каппенти. упа̄сака̄ уджджха̄йанти кхиййанти випа̄ченти – ‘‘катхан̃хи на̄ма бхаданта̄ мут̣т̣хассатӣ асампаджа̄на̄ нагга̄ викӯджама̄на̄ ка̄каччхама̄на̄ сеййам̣ каппессантӣ’’ти! ассосум̣ кхо бхиккхӯ тесам̣ упа̄сака̄нам̣ уджджха̄йанта̄нам̣ кхиййанта̄нам̣ випа̄чента̄нам̣. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма бхиккхӯ анупасампаннена сахасеййам̣ каппессантӣ’’ти! атха кхо те бхиккхӯ те наваке бхиккхӯ анекапарийа̄йена вигарахитва̄ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, бхиккхӯ анупасампаннена сахасеййам̣ каппентӣ’’ти? ‘‘саччам̣, бхагава̄’’ти. вигарахи буддхо бхагава̄…пе… катхан̃хи на̄ма те, бхиккхаве, могхапуриса̄ анупасампаннена сахасеййам̣ каппессанти! нетам̣, бхиккхаве, аппасанна̄нам̣ ва̄ паса̄да̄йа…пе… еван̃ча пана, бхиккхаве, имам̣ сиккха̄падам̣ уддисеййа̄тха –

‘‘йо пана бхиккху анупасампаннена сахасеййам̣ каппеййа па̄читтийа’’нти.

еван̃чидам̣ бхагавата̄ бхиккхӯнам̣ сиккха̄падам̣ пан̃н̃аттам̣ хоти.

50. атха кхо бхагава̄ а̄л̣авийам̣ йатха̄бхирантам̣ вихаритва̄ йена косамбӣ тена ча̄рикам̣ пакка̄ми. анупуббена ча̄рикам̣ чарама̄но йена косамбӣ тадавасари. татра судам̣ бхагава̄ косамбийам̣ вихарати бадарика̄ра̄ме. бхиккхӯ а̄йасмантам̣ ра̄хулам̣ етадавочум̣ – ‘‘бхагавата̄, а̄вусо ра̄хула, сиккха̄падам̣ пан̃н̃аттам̣ – ‘на анупасампаннена сахасеййа̄ каппетабба̄’ти. сеййам̣, а̄вусо ра̄хула, джа̄на̄хӣ’’ти. атха кхо а̄йасма̄ ра̄хуло сеййам̣ алабхама̄но ваччакут̣ийа̄ сеййам̣ каппеси. атха кхо бхагава̄ раттийа̄ паччӯсасамайам̣ паччут̣т̣ха̄йа йена ваччакут̣и тенупасан̇ками; упасан̇камитва̄ укка̄си. а̄йасма̄пи ра̄хуло укка̄си. ‘‘ко еттха̄’’ти? ‘‘ахам̣, бхагава̄, ра̄хуло’’ти. ‘‘кисса твам̣, ра̄хула, идха нисинносӣ’’ти? атха кхо а̄йасма̄ ра̄хуло бхагавато етаматтхам̣ а̄рочеси. атха кхо бхагава̄ етасмим̣ нида̄не етасмим̣ пакаран̣е дхаммим̣ катхам̣ катва̄ бхиккхӯ а̄мантеси – ‘‘ануджа̄на̄ми, бхиккхаве, анупасампаннена дираттатираттам̣ сахасеййам̣ каппетум̣. еван̃ча пана, бхиккхаве, имам̣ сиккха̄падам̣ уддисеййа̄тха –

51. ‘‘йо пана бхиккху анупасампаннена уттаридираттатираттам̣ сахасеййам̣ каппеййа, па̄читтийа’’нти.

52. йо пана̄ти йо йа̄дисо…пе… бхиккхӯти…пе… айам̣ имасмим̣ аттхе адхиппето бхиккхӯти.

анупасампанно на̄ма бхиккхум̣ т̣хапетва̄ авасесо анупасампанно на̄ма.

уттаридираттатираттанти атирекадираттатираттам̣.

саха̄ти екато.

сеййа̄ на̄ма саббаччханна̄, саббапариччханна̄, йебхуййеначчханна̄, йебхуййена париччханна̄.

сеййам̣ каппеййа̄ти чатуттхе дивасе аттхан̇гате сӯрийе, анупасампанне нипанне, бхиккху нипаджджати, а̄патти па̄читтийасса. бхиккху нипанне, анупасампанно нипаджджати, а̄патти па̄читтийасса. убхо ва̄ нипаджджанти, а̄патти па̄читтийасса. ут̣т̣хахитва̄ пунаппунам̣ нипаджджанти, а̄патти па̄читтийасса.

53. анупасампанне анупасампаннасан̃н̃ӣ уттаридираттатираттам̣ сахасеййам̣ каппети, а̄патти па̄читтийасса. анупасампанне вематико уттаридираттатираттам̣ сахасеййам̣ каппети, а̄патти па̄читтийасса. анупасампанне упасампаннасан̃н̃ӣ уттаридираттатираттам̣ сахасеййам̣ каппети, а̄патти па̄читтийасса.

упад̣д̣хаччханне упад̣д̣хапариччханне, а̄патти дуккат̣асса. упасампанне анупасампаннасан̃н̃ӣ, а̄патти дуккат̣асса. упасампанне вематико, а̄патти дуккат̣асса. упасампанне упасампаннасан̃н̃ӣ, ана̄патти.

54. ана̄патти дветиссо раттийо васати, ӯнакадветиссо раттийо васати, две раттийо васитва̄ татийа̄йа раттийа̄ пура̄рун̣а̄ никкхамитва̄ пуна васати, саббаччханне, саббаапариччханне, саббапариччханне саббааччханне [васати, саббааччханне саббаапариччханне, (сӣ.)], йебхуййена аччханне, йебхуййена апариччханне, анупасампанне нипанне бхиккху нисӣдати, бхиккху нипанне анупасампанно нисӣдати, убхо ва̄ нисӣданти, умматтакасса, а̄дикаммикасса̄ти.

сахасеййасиккха̄падам̣ нит̣т̣хитам̣ пан̃чамам̣.