140. двева̄чика̄дипава̄ран̣а̄

234. тена кхо пана самайена косалесу джанападе ан̃н̃атарасмим̣ а̄ва̄се тадаху пава̄ран̣а̄йа саварабхайам̣ ахоси. бхиккхӯ на̄саккхим̣су тева̄чикам̣ пава̄ретум̣. бхагавато етаматтхам̣ а̄рочесум̣. ануджа̄на̄ми, бхиккхаве, двева̄чикам̣ пава̄ретунти.

ба̄л̣хатарам̣ саварабхайам̣ ахоси. бхиккхӯ на̄саккхим̣су двева̄чикам̣ пава̄ретум̣. бхагавато етаматтхам̣ а̄рочесум̣. ануджа̄на̄ми, бхиккхаве, екава̄чикам̣ пава̄ретунти.

ба̄л̣хатарам̣ саварабхайам̣ ахоси. бхиккхӯ на̄саккхим̣су екава̄чикам̣ пава̄ретум̣. бхагавато етаматтхам̣ а̄рочесум̣. ануджа̄на̄ми, бхиккхаве, сама̄навассикам̣ пава̄ретунти.

тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа мануссехи да̄нам̣ дентехи йебхуййена ратти кхепита̄ хоти. атха кхо тесам̣ бхиккхӯнам̣ етадахоси – ‘‘мануссехи да̄нам̣ дентехи йебхуййена ратти кхепита̄. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ ратти вибха̄йиссати. катхам̣ ну кхо амхехи пат̣ипаджджитабба’’нти? бхагавато етаматтхам̣ а̄рочесум̣. идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа мануссехи да̄нам̣ дентехи йебхуййена ратти кхепита̄ хоти. татра че, бхиккхаве, бхиккхӯнам̣ евам̣ хоти – ‘‘мануссехи да̄нам̣ дентехи йебхуййена ратти кхепита̄. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ ратти вибха̄йиссатӣ’’ти, бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. мануссехи да̄нам̣ дентехи йебхуййена ратти кхепита̄. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ ратти вибха̄йиссати. йади сан̇гхасса паттакаллам̣, сан̇гхо двева̄чикам̣, екава̄чикам̣, сама̄навассикам̣ пава̄реййа̄’’ти.

идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа бхиккхӯхи дхаммам̣ бхан̣антехи…пе… суттантикехи суттантам̣ сан̇га̄йантехи… винайадхарехи винайам̣ виниччхинантехи… дхаммакатхикехи дхаммам̣ са̄каччхантехи… бхиккхӯхи калахам̣ каронтехи йебхуййена ратти кхепита̄ хоти. татра че бхиккхӯнам̣ евам̣ хоти – ‘‘бхиккхӯхи калахам̣ каронтехи йебхуййена ратти кхепита̄. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ ратти вибха̄йиссатӣ’’ти, бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. бхиккхӯхи калахам̣ каронтехи йебхуййена ратти кхепита̄. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ ратти вибха̄йиссати. йади сан̇гхасса паттакаллам̣, сан̇гхо двева̄чикам̣, екава̄чикам̣, сама̄навассикам̣ пава̄реййа̄’’ти.

тена кхо пана самайена косалесу джанападе ан̃н̃атарасмим̣ а̄ва̄се тадаху пава̄ран̣а̄йа маха̄бхиккхусан̇гхо саннипатито хоти, париттан̃ча ановассикам̣ [ановассакам̣ (ка.)] хоти, маха̄ ча мегхо уггато хоти. атха кхо тесам̣ бхиккхӯнам̣ етадахоси – ‘‘айам̣ кхо маха̄бхиккхусан̇гхо саннипатито, париттан̃ча ановассикам̣, маха̄ ча мегхо уггато. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ мегхо павассиссати. катхам̣ ну кхо амхехи пат̣ипаджджитабба’’нти? бхагавато етаматтхам̣ а̄рочесум̣. идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа маха̄бхиккхусан̇гхо саннипатито хоти, париттан̃ча ановассикам̣ хоти, маха̄ ча мегхо уггато хоти. татра че бхиккхӯнам̣ евам̣ хоти – ‘‘айам̣ кхо маха̄бхиккхусан̇гхо саннипатито, париттан̃ча ановассикам̣, маха̄ ча мегхо уггато. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ мегхо павассиссатӣ’’ти. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. айам̣ маха̄бхиккхусан̇гхо саннипатито, париттан̃ча ановассикам̣, маха̄ ча мегхо уггато. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ мегхо павассиссати. йади сан̇гхасса паттакаллам̣, сан̇гхо двева̄чикам̣, екава̄чикам̣, сама̄навассикам̣ пава̄реййа̄’’ти.

идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа ра̄джантара̄йо хоти…пе… чорантара̄йо хоти… агйантара̄йо хоти… удакантара̄йо хоти… мануссантара̄йо хоти… амануссантара̄йо хоти… ва̄л̣антара̄йо хоти… сарӣсапантара̄йо хоти… джӣвитантара̄йо хоти… брахмачарийантара̄йо хоти. татра че бхиккхӯнам̣ евам̣ хоти – ‘‘айам̣ кхо, брахмачарийантара̄йо. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ брахмачарийантара̄йо бхависсатӣ’’ти, бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. айам̣ брахмачарийантара̄йо. саче сан̇гхо тева̄чикам̣ пава̄рессати, аппава̄ритова сан̇гхо бхависсати, атха̄йам̣ брахмачарийантара̄йо бхависсати. йади сан̇гхасса паттакаллам̣, сан̇гхо двева̄чикам̣, екава̄чикам̣, сама̄навассикам̣ пава̄реййа̄’’ти.

двева̄чика̄дипава̄ран̣а̄ нит̣т̣хита̄.