127. сабха̄га̄паттипат̣икаммавидхи

221. тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа саббо сан̇гхо сабха̄гам̣ а̄паттим̣ а̄панно хоти. атха кхо тесам̣ бхиккхӯнам̣ етадахоси – ‘‘бхагавата̄ пан̃н̃аттам̣ ‘на сабха̄га̄ а̄патти десетабба̄, на сабха̄га̄ а̄патти пат̣иггахетабба̄’ти. айан̃ча саббо сан̇гхо сабха̄гам̣ а̄паттим̣ а̄панно. катхам̣ ну кхо амхехи пат̣ипаджджитабба’’нти? бхагавато етаматтхам̣ а̄рочесум̣.

идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа саббо сан̇гхо сабха̄гам̣ а̄паттим̣ а̄панно хоти. техи, бхиккхаве, бхиккхӯхи еко бхиккху са̄манта̄ а̄ва̄са̄ саджджукам̣ па̄хетаббо – гаччха̄вусо, там̣ а̄паттим̣ пат̣икаритва̄ а̄гаччха, майам̣ те сантике там̣ а̄паттим̣ пат̣икарисса̄ма̄ти. еван̃четам̣ лабхетха, иччетам̣ кусалам̣. но че лабхетха, бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. айам̣ саббо сан̇гхо сабха̄гам̣ а̄паттим̣ а̄панно. йада̄ ан̃н̃ам̣ бхиккхум̣ суддхам̣ ана̄паттикам̣ пассиссати тада̄ тасса сантике там̣ а̄паттим̣ пат̣икариссатӣ’’ти ватва̄ пава̄ретаббам̣; на твева таппаччайа̄ пава̄ран̣а̄йа антара̄йо ка̄таббо.

идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа саббо сан̇гхо сабха̄га̄йа а̄паттийа̄ вематико хоти. бйаттена бхиккхуна̄ пат̣ибалена сан̇гхо н̃а̄петаббо –

‘‘сун̣а̄ту ме, бханте, сан̇гхо. айам̣ саббо сан̇гхо сабха̄га̄йа а̄паттийа̄ вематико. йада̄ ниббематико бхависсати тада̄ там̣ а̄паттим̣ пат̣икариссатӣ’’ти ватва̄, пава̄ретаббам̣, на твева таппаччайа̄ пава̄ран̣а̄йа антара̄йо ка̄табботи.

сабха̄га̄паттипат̣икаммавидхи нит̣т̣хита̄.

пат̣хамабха̄н̣ава̄ро нит̣т̣хито.