124. сан̇гхапава̄ран̣а̄диппабхеда̄

215. тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа пан̃ча бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ пан̃н̃аттам̣ ‘сан̇гхена пава̄ретабба’нти. майан̃чамха̄ пан̃ча джана̄. катхам̣ ну кхо амхехи пава̄ретабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, пан̃чаннам̣ сан̇гхе пава̄ретунти.

216. тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа чатта̄ро бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ анун̃н̃а̄там̣ пан̃чаннам̣ сан̇гхе пава̄ретунти. майан̃чамха̄ чатта̄ро джана̄. катхам̣ ну кхо амхехи пава̄ретабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, чатуннам̣ ан̃н̃аман̃н̃ам̣ пава̄ретум̣. еван̃ча пана, бхиккхаве, пава̄ретаббам̣. бйаттена бхиккхуна̄ пат̣ибалена те бхиккхӯ н̃а̄петабба̄ –

‘‘сун̣анту ме а̄йасманто. аджджа пава̄ран̣а̄. йада̄йасманта̄нам̣ паттакаллам̣, майам̣ ан̃н̃аман̃н̃ам̣ пава̄реййа̄ма̄’’ти.

тхерена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ те бхиккхӯ евамассу вачанӣйа̄ – ‘‘ахам̣, а̄вусо, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманто анукампам̣ упа̄да̄йа. пассанто пат̣икарисса̄ми. дутийампи…пе… татийампи ахам̣, а̄вусо, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманто анукампам̣ упа̄да̄йа. пассанто пат̣икарисса̄мӣ’’ти.

навакена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ те бхиккхӯ евамассу вачанӣйа̄ – ‘‘ахам̣, бханте, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманто анукампам̣ упа̄да̄йа. пассанто пат̣икарисса̄ми. дутийампи…пе… татийампи ахам̣, бханте, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманто анукампам̣ упа̄да̄йа. пассанто пат̣икарисса̄мӣ’’ти.

тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа тайо бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ анун̃н̃а̄там̣ пан̃чаннам̣ сан̇гхе пава̄ретум̣, чатуннам̣ ан̃н̃аман̃н̃ам̣ пава̄ретум̣. майан̃чамха̄ тайо джана̄. катхам̣ ну кхо амхехи пава̄ретабба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, тин̣н̣ам̣ ан̃н̃аман̃н̃ам̣ пава̄ретум̣. еван̃ча пана, бхиккхаве, пава̄ретаббам̣. бйаттена бхиккхуна̄ пат̣ибалена те бхиккхӯ н̃а̄петабба̄ –

‘‘сун̣анту ме а̄йасманта̄. аджджа пава̄ран̣а̄. йада̄йасманта̄нам̣ паттакаллам̣, майам̣ ан̃н̃аман̃н̃ам̣ пава̄реййа̄ма̄’’ти.

тхерена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ те бхиккхӯ евамассу вачанӣйа̄ – ‘‘ахам̣, а̄вусо, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманта̄ анукампам̣ упа̄да̄йа. пассанто пат̣икарисса̄ми. дутийампи…пе… татийампи ахам̣, а̄вусо, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманта̄ анукампам̣ упа̄да̄йа. пассанто пат̣икарисса̄мӣ’’ти.

навакена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ те бхиккхӯ евамассу вачанӣйа̄ – ‘‘ахам̣, бханте, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманта̄ анукампам̣ упа̄да̄йа. пассанто пат̣икарисса̄ми. дутийампи…пе… татийампи ахам̣, бханте, а̄йасманте пава̄реми дит̣т̣хена ва̄ сутена ва̄ парисан̇ка̄йа ва̄. ваданту мам̣ а̄йасманта̄ анукампам̣ упа̄да̄йа. пассанто пат̣икарисса̄мӣ’’ти.

217. тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа две бхиккхӯ вихаранти. атха кхо тесам̣ бхиккхӯнам̣ етадахоси – ‘‘бхагавата̄ анун̃н̃а̄там̣ пан̃чаннам̣ сан̇гхе пава̄ретум̣, чатуннам̣ ан̃н̃аман̃н̃ам̣ пава̄ретум̣, тин̣н̣ам̣ ан̃н̃аман̃н̃ам̣ пава̄ретум̣. майан̃чамха̄ две джана̄. катхам̣ ну кхо амхехи пава̄ретабба’’нти. бхагавато етаматтхам̣ а̄рочесум̣. ануджа̄на̄ми, бхиккхаве, двиннам̣ ан̃н̃аман̃н̃ам̣ пава̄ретум̣. еван̃ча пана, бхиккхаве, пава̄ретаббам̣. тхерена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ наво бхиккху евамасса вачанӣйо – ‘‘ахам̣, а̄вусо, а̄йасмантам̣ пава̄реми дит̣т̣хена ва̄ сутена ва̄ парисан̇ка̄йа ва̄. вадату мам̣ а̄йасма̄ анукампам̣ упа̄да̄йа. пассанто пат̣икарисса̄ми. дутийампи…пе… татийампи ахам̣, а̄вусо, а̄йасмантам̣ пава̄реми дит̣т̣хена ва̄ сутена ва̄ парисан̇ка̄йа ва̄. вадату мам̣ а̄йасма̄ анукампам̣ упа̄да̄йа. пассанто пат̣икарисса̄мӣ’’ти.

навакена бхиккхуна̄ екам̣сам̣ уттара̄сан̇гам̣ каритва̄ уккут̣икам̣ нисӣдитва̄ ан̃джалим̣ паггахетва̄ тхеро бхиккху евамасса вачанӣйо – ‘‘ахам̣, бханте, а̄йасмантам̣ пава̄реми дит̣т̣хена ва̄ сутена ва̄ парисан̇ка̄йа ва̄. вадату мам̣ а̄йасма̄ анукампам̣ упа̄да̄йа. пассанто пат̣икарисса̄ми. дутийампи…пе… татийампи ахам̣, бханте, а̄йасмантам̣ пава̄реми дит̣т̣хена ва̄ сутена ва̄ парисан̇ка̄йа ва̄. вадату мам̣ а̄йасма̄ анукампам̣ упа̄да̄йа. пассанто пат̣икарисса̄мӣ’’ти.

218. тена кхо пана самайена ан̃н̃атарасмим̣ а̄ва̄се тадаху пава̄ран̣а̄йа еко бхиккху вихарати. атха кхо тасса бхиккхуно етадахоси – ‘‘бхагавата̄ анун̃н̃а̄там̣ пан̃чаннам̣ сан̇гхе пава̄ретум̣, чатуннам̣ ан̃н̃аман̃н̃ам̣ пава̄ретум̣, тин̣н̣ам̣ ан̃н̃аман̃н̃ам̣ пава̄ретум̣, двиннам̣ ан̃н̃аман̃н̃ам̣ пава̄ретум̣. ахан̃чамхи екако. катхам̣ ну кхо майа̄ пава̄ретабба’’нти? бхагавато етаматтхам̣ а̄рочесум̣.

идха пана, бхиккхаве, ан̃н̃атарасмим̣ а̄ва̄се тадаху пава̄ран̣а̄йа еко бхиккху вихарати. тена, бхиккхаве, бхиккхуна̄ йаттха бхиккхӯ пат̣иккаманти упат̣т̣ха̄наса̄ла̄йа ва̄ ман̣д̣апе ва̄ руккхамӯле ва̄, со десо саммаджджитва̄ па̄нӣйам̣ парибходжанӣйам̣ упат̣т̣ха̄петва̄ а̄санам̣ пан̃н̃апетва̄ падӣпам̣ катва̄ нисӣдитаббам̣. саче ан̃н̃е бхиккхӯ а̄гаччханти, техи саддхим̣ пава̄ретаббам̣; но че а̄гаччханти, ‘аджджа ме пава̄ран̣а̄’ти адхит̣т̣ха̄таббам̣. но че адхит̣т̣хеййа, а̄патти дуккат̣асса.

татра, бхиккхаве, йаттха пан̃ча бхиккхӯ вихаранти, на екасса пава̄ран̣ам̣ а̄харитва̄

чатӯхи сан̇гхе пава̄ретаббам̣. пава̄реййум̣ че, а̄патти дуккат̣асса. татра, бхиккхаве, йаттха чатта̄ро бхиккхӯ вихаранти, на екасса пава̄ран̣ам̣ а̄харитва̄ тӣхи ан̃н̃аман̃н̃ам̣ пава̄ретаббам̣. пава̄реййум̣ че, а̄патти дуккат̣асса. татра, бхиккхаве, йаттха тайо бхиккхӯ вихаранти, на екасса пава̄ран̣ам̣ а̄харитва̄ двӣхи ан̃н̃аман̃н̃ам̣ пава̄ретаббам̣. пава̄реййум̣ че, а̄патти дуккат̣асса. татра, бхиккхаве, йаттха две бхиккхӯ вихаранти, на екасса пава̄ран̣ам̣ а̄харитва̄ екена адхит̣т̣ха̄таббам̣. адхит̣т̣хеййа че, а̄патти дуккат̣асса̄ти.

сан̇гхапава̄ран̣а̄диппабхеда̄ нит̣т̣хита̄.