64. чатта̄ро ниссайа̄

128. та̄вадева чха̄йа̄ метабба̄, утуппама̄н̣ам̣ а̄чиккхитаббам̣, дивасабха̄го а̄чиккхитаббо, сан̇гӣти а̄чиккхитабба̄, чатта̄ро ниссайа̄ а̄чиккхитабба̄ [а̄чиккхитабба̄, чатта̄ри акаран̣ӣйа̄ни а̄чиккхитабба̄ни. (ка.)] –

‘‘пин̣д̣ийа̄лопабходжанам̣ нисса̄йа паббаджджа̄. таттха те йа̄ваджӣвам̣ усса̄хо каран̣ӣйо. атирекала̄бхо – сан̇гхабхаттам̣, уддесабхаттам̣, нимантанам̣, сала̄кабхаттам̣, паккхикам̣, упосатхикам̣, па̄т̣ипадикам̣.

‘‘пам̣сукӯлачӣварам̣ нисса̄йа паббаджджа̄. таттха те йа̄ваджӣвам̣ усса̄хо каран̣ӣйо. атирекала̄бхо – кхомам̣, каппа̄сикам̣, косеййам̣, камбалам̣, са̄н̣ам̣, бхан̇гам̣.

‘‘руккхамӯласена̄санам̣ нисса̄йа паббаджджа̄. таттха те йа̄ваджӣвам̣ усса̄хо каран̣ӣйо. атирекала̄бхо – виха̄ро, ад̣д̣хайого, па̄са̄до, хаммийам̣, гуха̄.

‘‘пӯтимуттабхесаджджам̣ нисса̄йа паббаджджа̄. таттха те йа̄ваджӣвам̣ усса̄хо каран̣ӣйо. атирекала̄бхо – саппи, наванӣтам̣, телам̣, мадху, пха̄н̣ита’’нти.

чатта̄ро ниссайа̄ нит̣т̣хита̄.