56. апаттака̄диваттху

118. тена кхо пана самайена бхиккхӯ апаттакам̣ упасампа̄денти. хаттхесу пин̣д̣а̄йа чаранти. манусса̄ уджджха̄йанти кхиййанти випа̄ченти – сеййатха̄пи титтхийа̄ти. бхагавато етаматтхам̣ а̄рочесум̣. на, бхиккхаве, апаттако упасампа̄детаббо. йо упасампа̄деййа, а̄патти дуккат̣асса̄ти.

тена кхо пана самайена бхиккхӯ ачӣваракам̣ упасампа̄денти. нагга̄ пин̣д̣а̄йа чаранти. манусса̄ уджджха̄йанти кхиййанти випа̄ченти – сеййатха̄пи титтхийа̄ти. бхагавато етаматтхам̣ а̄рочесум̣. на, бхиккхаве, ачӣварако упасампа̄детаббо. йо упасампа̄деййа, а̄патти дуккат̣асса̄ти.

тена кхо пана самайена бхиккхӯ апаттачӣваракам̣ упасампа̄денти. нагга̄ хаттхесу пин̣д̣а̄йа чаранти. манусса̄ уджджха̄йанти кхиййанти випа̄ченти – сеййатха̄пи титтхийа̄ти. бхагавато етаматтхам̣ а̄рочесум̣. на, бхиккхаве, апаттачӣварако упасампа̄детаббо. йо упасампа̄деййа, а̄патти дуккат̣асса̄ти.

тена кхо пана самайена бхиккхӯ йа̄читакена паттена упасампа̄денти. упасампанне паттам̣ пат̣ихаранти. хаттхесу пин̣д̣а̄йа чаранти. манусса̄ уджджха̄йанти кхиййанти випа̄ченти – сеййатха̄пи титтхийа̄ти. бхагавато етаматтхам̣ а̄рочесум̣. на, бхиккхаве, йа̄читакена паттена упасампа̄детаббо. йо упасампа̄деййа, а̄патти дуккат̣асса̄ти.

тена кхо пана самайена бхиккхӯ йа̄читакена чӣварена упасампа̄денти. упасампанне чӣварам̣ пат̣ихаранти. нагга̄ пин̣д̣а̄йа чаранти. манусса̄ уджджха̄йанти кхиййанти випа̄ченти – сеййатха̄пи титтхийа̄ти. бхагавато етаматтхам̣ а̄рочесум̣. на, бхиккхаве, йа̄читакена чӣварена упасампа̄детаббо. йо упасампа̄деййа, а̄патти дуккат̣асса̄ти.

тена кхо пана самайена бхиккхӯ йа̄читакена паттачӣварена упасампа̄денти. упасампанне паттачӣварам̣ пат̣ихаранти. нагга̄ хаттхесу пин̣д̣а̄йа чаранти. манусса̄ уджджха̄йанти кхиййанти випа̄ченти – сеййатха̄пи титтхийа̄ти. бхагавато етаматтхам̣ а̄рочесум̣. на, бхиккхаве, йа̄читакена паттачӣварена упасампа̄детаббо. йо упасампа̄деййа, а̄патти дуккат̣асса̄ти.

наупасампа̄детаббекавӣсатива̄ро нит̣т̣хито.