51. питугха̄такаваттху

113. тена кхо пана самайена ан̃н̃атаро ма̄н̣авако питарам̣ джӣвита̄ воропеси. со тена па̄пакена каммена ат̣т̣ӣйати хара̄йати джигуччхати. атха кхо тасса ма̄н̣авакасса етадахоси ‘‘кена ну кхо ахам̣ упа̄йена имасса па̄пакасса каммасса никкхантим̣ кареййа’’нти. атха кхо тасса ма̄н̣авакасса етадахоси ‘‘име кхо саман̣а̄ сакйапуттийа̄ дхаммача̄рино самача̄рино брахмача̄рино саччава̄дино сӣлаванто калйа̄н̣адхамма̄, саче кхо ахам̣ саман̣есу сакйапуттийесу паббаджеййам̣, ева̄хам̣ имасса па̄пакасса каммасса никкхантим̣ кареййа’’нти. атха кхо со ма̄н̣авако бхиккхӯ упасан̇камитва̄ паббаджджам̣ йа̄чи. бхиккхӯ а̄йасмантам̣ упа̄лим̣ етадавочум̣ – ‘‘пуббепи кхо, а̄вусо упа̄ли, на̄го ма̄н̣авакаван̣н̣ена бхиккхӯсу паббаджито, ин̇гха̄вусо, упа̄ли, имам̣ ма̄н̣авакам̣ ануйун̃джа̄хӣ’’ти. атха кхо со ма̄н̣авако а̄йасмата̄ упа̄лина̄ ануйун̃джӣйама̄но етаматтхам̣ а̄рочеси. а̄йасма̄ упа̄ли бхиккхӯнам̣ етаматтхам̣ а̄рочеси. бхиккхӯ бхагавато етаматтхам̣ а̄рочесум̣. питугха̄тако, бхиккхаве, анупасампанно на упасампа̄детаббо, упасампанно на̄сетабботи.