43. дан̣д̣акаммаваттху

107. тена кхо пана самайена са̄ман̣ера̄ бхиккхӯсу ага̄рава̄ аппатисса̄ асабха̄гавуттика̄ вихаранти. бхиккхӯ уджджха̄йанти кхиййанти випа̄ченти – ‘‘катхан̃хи на̄ма са̄ман̣ера̄ бхиккхӯсу ага̄рава̄ аппатисса̄ асабха̄гавуттика̄ вихариссантӣ’’ти. бхагавато етаматтхам̣ а̄рочесум̣…пе… ануджа̄на̄ми, бхиккхаве, пан̃чахан̇гехи саманна̄гатасса са̄ман̣ерасса дан̣д̣акаммам̣ ка̄тум̣. бхиккхӯнам̣ ала̄бха̄йа парисаккати, бхиккхӯнам̣ анаттха̄йа парисаккати, бхиккхӯнам̣ ава̄са̄йа парисаккати, бхиккхӯ аккосати парибха̄сати, бхиккхӯ бхиккхӯхи бхедети – ануджа̄на̄ми, бхиккхаве, имехи пан̃чахан̇гехи саманна̄гатасса са̄ман̣ерасса дан̣д̣акаммам̣ ка̄тунти.

атха кхо бхиккхӯнам̣ етадахоси – ‘‘ким̣ ну кхо дан̣д̣акаммам̣ ка̄табба’’нти? бхагавато етаматтхам̣ а̄рочесум̣. ануджа̄на̄ми, бхиккхаве, а̄варан̣ам̣ ка̄тунти.

тена кхо пана самайена бхиккхӯ са̄ман̣ера̄нам̣ саббам̣ сан̇гха̄ра̄мам̣ а̄варан̣ам̣ каронти. са̄ман̣ера̄ а̄ра̄мам̣ пависитум̣ алабхама̄на̄ паккамантипи, виббхамантипи, титтхийесупи сан̇каманти. бхагавато етаматтхам̣ а̄рочесум̣. на, бхиккхаве, саббо сан̇гха̄ра̄мо а̄варан̣ам̣ ка̄таббо. йо кареййа, а̄патти дуккат̣асса. ануджа̄на̄ми, бхиккхаве, йаттха ва̄ васати, йаттха ва̄ пат̣иккамати, таттха а̄варан̣ам̣ ка̄тунти.

тена кхо пана самайена бхиккхӯ са̄ман̣ера̄нам̣ мукхадва̄рикам̣ а̄ха̄рам̣ а̄варан̣ам̣ каронти. манусса̄ йа̄гупа̄нампи сан̇гхабхаттампи каронта̄ са̄ман̣ере евам̣ ваденти – ‘‘етха, бханте, йа̄гум̣ пиватха; етха, бханте, бхаттам̣ бхун̃джатха̄’’ти. са̄ман̣ера̄ евам̣ ваденти – ‘‘на̄вусо, лаббха̄. бхиккхӯхи а̄варан̣ам̣ ката’’нти. манусса̄ уджджха̄йанти кхиййанти випа̄ченти – ‘‘катхан̃хи на̄ма бхаданта̄ са̄ман̣ера̄нам̣ мукхадва̄рикам̣ а̄ха̄рам̣ а̄варан̣ам̣ кариссантӣ’’ти. бхагавато етаматтхам̣ а̄рочесум̣. на, бхиккхаве, мукхадва̄рико а̄ха̄ро а̄варан̣ам̣ ка̄таббо. йо кареййа, а̄патти дуккат̣асса̄ти.

дан̣д̣акаммаваттху нит̣т̣хитам̣.