4. ра̄джа̄йатанакатха̄

6. атха кхо бхагава̄ сатта̄хасса аччайена тамха̄ сама̄дхимха̄ вут̣т̣хахитва̄ мучалиндамӯла̄ йена ра̄джа̄йатанам̣ тенупасан̇ками, упасан̇камитва̄ ра̄джа̄йатанамӯле сатта̄хам̣ екапаллан̇кена нисӣди вимуттисукхапат̣исам̣ведӣ. тена кхо пана самайена тапусса [тапассу (сӣ.)] бхаллика̄ ва̄н̣иджа̄ уккала̄ там̣ десам̣ аддха̄намаггаппат̣ипанна̄ хонти. атха кхо тапуссабхаллика̄нам̣ ва̄н̣иджа̄нам̣ н̃а̄тиса̄лохита̄ девата̄ тапуссабхаллике ва̄н̣идже етадавоча – ‘‘айам̣, ма̄риса̄, бхагава̄ ра̄джа̄йатанамӯле вихарати пат̣хама̄бхисамбуддхо; гаччхатха там̣ бхагавантам̣ мантхена ча мадхупин̣д̣ика̄йа ча патима̄нетха; там̣ во бхависсати дӣгхараттам̣ хита̄йа сукха̄йа̄’’ти. атха кхо тапуссабхаллика̄ ва̄н̣иджа̄ мантхан̃ча мадхупин̣д̣икан̃ча а̄да̄йа йена бхагава̄ тенупасан̇камим̣су, упасан̇камитва̄ бхагавантам̣ абхива̄детва̄ екамантам̣ ат̣т̣хам̣су. екамантам̣ т̣хита̄ кхо тапуссабхаллика̄ ва̄н̣иджа̄ бхагавантам̣ етадавочум̣ – ‘‘пат̣игган̣ха̄ту но, бханте, бхагава̄ мантхан̃ча мадхупин̣д̣икан̃ча, йам̣ амха̄кам̣ асса дӣгхараттам̣ хита̄йа сукха̄йа̄’’ти. атха кхо бхагавато етадахоси – ‘‘на кхо татха̄гата̄ хаттхесу пат̣игган̣ханти. кимхи ну кхо ахам̣ пат̣игган̣хеййам̣ мантхан̃ча мадхупин̣д̣икан̃ча̄’’ти? атха кхо чатта̄ро маха̄ра̄джа̄но бхагавато четаса̄ четопаривитаккаман̃н̃а̄йа чатуддиса̄ чатта̄ро селамайе патте бхагавато упана̄месум̣ – ‘‘идха, бханте, бхагава̄ пат̣игган̣ха̄ту мантхан̃ча мадхупин̣д̣икан̃ча̄’’ти. пат̣иггахеси бхагава̄ паччаггхе селамайе патте мантхан̃ча мадхупин̣д̣икан̃ча, пат̣иггахетва̄ парибхун̃джи. атха кхо тапуссабхаллика̄ ва̄н̣иджа̄ бхагавантам̣ онӣтапаттапа̄н̣им̣ видитва̄ бхагавато па̄десу сираса̄ нипатитва̄ бхагавантам̣ (онӣтапаттапа̄н̣им̣ видитва̄ бхагавато па̄десу сираса̄ нипатитва̄ бхагавантам̣) [( ) сӣ. сйа̄. поттхакесу наттхи] етадавочум̣ – ‘‘ете майам̣, бханте, бхагавантам̣ саран̣ам̣ гаччха̄ма дхамман̃ча, упа̄саке но бхагава̄ дха̄рету аджджатагге па̄н̣упете саран̣ам̣ гате’’ти. те ча локе пат̣хамам̣ упа̄сака̄ ахесум̣ двева̄чика̄.

ра̄джа̄йатанакатха̄ нит̣т̣хита̄.