12. саддхивиха̄рикаваттакатха̄

377. тена кхо пана самайена упаджджха̄йа̄ саддхивиха̄рикесу на самма̄ ваттанти. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма упаджджха̄йа̄ саддхивиха̄рикесу на самма̄ ваттиссантӣ’’ти! атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве, упаджджха̄йа̄ саддхивиха̄рикесу на самма̄ ваттантӣ’’ти? ‘‘саччам̣ бхагава̄’’ти…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси –

378. ‘‘тена хи, бхиккхаве, упаджджха̄йа̄нам̣ саддхивиха̄рикесу ваттам̣ пан̃н̃апесса̄ми йатха̄ упаджджха̄йехи саддхивиха̄рикесу самма̄ ваттитаббам̣. [маха̄ва. 67] упаджджха̄йена, бхиккхаве, саддхивиха̄рикамхи самма̄ ваттитаббам̣. татра̄йам̣ самма̄ваттана̄ –

‘‘упаджджха̄йена, бхиккхаве, саддхивиха̄рико сан̇гахетаббо ануггахетаббо уддесена парипуччха̄йа ова̄дена ануса̄санийа̄. саче упаджджха̄йасса патто хоти, саддхивиха̄рикасса патто на хоти, упаджджха̄йена саддхивиха̄рикасса патто да̄таббо, уссуккам̣ ва̄ ка̄таббам̣ – кинти ну кхо саддхивиха̄рикасса патто уппаджджийетха̄ти. саче упаджджха̄йасса чӣварам̣ хоти, саддхивиха̄рикасса чӣварам̣ на хоти, упаджджха̄йена саддхивиха̄рикасса чӣварам̣ да̄таббам̣, уссуккам̣ ва̄ ка̄таббам̣ – кинти ну кхо саддхивиха̄рикасса чӣварам̣ уппаджджийетха̄ти. саче упаджджха̄йасса париккха̄ро хоти, саддхивиха̄рикасса париккха̄ро на хоти, упаджджха̄йена саддхивиха̄рикасса париккха̄ро да̄таббо, уссуккам̣ ва̄ ка̄таббам̣ – кинти ну кхо саддхивиха̄рикасса париккха̄ро уппаджджийетха̄ти.

‘‘саче саддхивиха̄рико гила̄но хоти, ка̄лассева ут̣т̣ха̄йа дантакат̣т̣хам̣ да̄таббам̣, мукходакам̣ да̄таббам̣, а̄санам̣ пан̃н̃апетаббам̣. саче йа̄гу хоти, бха̄джанам̣ дховитва̄ йа̄гу упана̄метабба̄. йа̄гум̣ пӣтасса удакам̣ датва̄ бха̄джанам̣ пат̣иггахетва̄ нӣчам̣ катва̄ са̄дхукам̣ аппат̣игхам̣сантена дховитва̄ пат̣иса̄метаббам̣. саддхивиха̄рикамхи вут̣т̣хите а̄санам̣ уддхаритаббам̣. саче со десо укла̄по хоти, со десо саммаджджитаббо.

‘‘саче саддхивиха̄рико га̄мам̣ пависитука̄мо хоти, нива̄санам̣ да̄таббам̣, пат̣инива̄санам̣ пат̣иггахетаббам̣, ка̄йабандханам̣ да̄таббам̣, сагун̣ам̣ катва̄ сан̇гха̄т̣ийо да̄табба̄, дховитва̄ патто содако да̄таббо.

‘‘етта̄вата̄ ниваттиссатӣти а̄санам̣ пан̃н̃апетаббам̣, па̄додакам̣ па̄дапӣт̣хам̣ па̄дакатхаликам̣ упаниккхипитаббам̣, паччуггантва̄ паттачӣварам̣ пат̣иггахетаббам̣, пат̣инива̄санам̣ да̄таббам̣, нива̄санам̣ пат̣иггахетаббам̣. саче чӣварам̣ синнам̣ хоти, мухуттам̣ ун̣хе ота̄петаббам̣, на ча ун̣хе чӣварам̣ нидахитаббам̣. чӣварам̣ сан̇гхаритаббам̣. чӣварам̣ сан̇гхарантена чатуран̇гулам̣ кан̣н̣ам̣ усса̄ретва̄ чӣварам̣ сан̇гхаритаббам̣ – ма̄ маджджхе бхан̇го ахосӣти. обхоге ка̄йабандханам̣ ка̄таббам̣.

‘‘саче пин̣д̣апа̄то хоти, саддхивиха̄рико ча бхун̃джитука̄мо хоти, удакам̣ датва̄ пин̣д̣апа̄то упана̄метаббо. саддхивиха̄рико па̄нӣйена пуччхитаббо. бхутта̄висса удакам̣ датва̄ паттам̣ пат̣иггахетва̄ нӣчам̣ катва̄ са̄дхукам̣ аппат̣игхам̣сантена дховитва̄ водакам̣ катва̄ мухуттам̣ ун̣хе ота̄петаббо, на ча ун̣хе патто нидахитаббо. паттачӣварам̣ никкхипитаббам̣. паттам̣ никкхипантена екена хаттхена паттам̣ гахетва̄ екена хаттхена хет̣т̣ха̄ман̃чам̣ ва̄ хет̣т̣ха̄пӣт̣хам̣ ва̄ пара̄маситва̄ патто никкхипитаббо. на ча анантарахита̄йа бхӯмийа̄ патто никкхипитаббо. чӣварам̣ никкхипантена екена хаттхена чӣварам̣ гахетва̄ екена хаттхена чӣваравам̣сам̣ ва̄ чӣварараджджум̣ ва̄ памаджджитва̄ па̄рато антам̣ орато бхогам̣ катва̄ чӣварам̣ никкхипитаббам̣. саддхивиха̄рикамхи вут̣т̣хите а̄санам̣ уддхаритаббам̣, па̄додакам̣ па̄дапӣт̣хам̣ па̄дакатхаликам̣ пат̣иса̄метаббам̣. саче со десо укла̄по хоти, со десо саммаджджитаббо.

‘‘саче саддхивиха̄рико наха̄йитука̄мо хоти, наха̄нам̣ пат̣ийа̄детаббам̣. саче сӣтена аттхо хоти, сӣтам̣ пат̣ийа̄детаббам̣. саче ун̣хена аттхо хоти, ун̣хам̣ пат̣ийа̄детаббам̣.

‘‘саче саддхивиха̄рико джанта̄гхарам̣ пависитука̄мо хоти, чун̣н̣ам̣ саннетаббам̣, маттика̄ теметабба̄, джанта̄гхарапӣт̣хам̣ а̄да̄йа [а̄да̄йа саддхивиха̄рикасса пит̣т̣хито пит̣т̣хито (ка.)] гантва̄ джанта̄гхарапӣт̣хам̣ датва̄ чӣварам̣ пат̣иггахетва̄ екамантам̣ никкхипитаббам̣, чун̣н̣ам̣ да̄таббам̣, маттика̄ да̄табба̄. саче уссахати джанта̄гхарам̣ пависитаббам̣. джанта̄гхарам̣ пависантена маттика̄йа мукхам̣ маккхетва̄ пурато ча паччхато ча пат̣иччха̄детва̄ джанта̄гхарам̣ пависитаббам̣. на тхере бхиккхӯ анупакхаджджа нисӣдитаббам̣, на нава̄ бхиккхӯ а̄санена пат̣иба̄хитабба̄. джанта̄гхаре саддхивиха̄рикасса парикаммам̣ ка̄таббам̣. джанта̄гхара̄ никкхамантена джанта̄гхарапӣт̣хам̣ а̄да̄йа пурато ча паччхато ча пат̣иччха̄детва̄ джанта̄гхара̄ никкхамитаббам̣.

‘‘удакепи саддхивиха̄рикасса парикаммам̣ ка̄таббам̣. наха̄тена пат̣хаматарам̣ уттаритва̄ аттано гаттам̣ водакам̣ катва̄ нива̄сетва̄ саддхивиха̄рикасса гаттато удакам̣ памаджджитаббам̣, нива̄санам̣ да̄таббам̣, сан̇гха̄т̣и да̄табба̄, джанта̄гхарапӣт̣хам̣ а̄да̄йа пат̣хаматарам̣ а̄гантва̄ а̄санам̣ пан̃н̃апетаббам̣, па̄додакам̣ па̄дапӣт̣хам̣ па̄дакатхаликам̣ упаниккхипитаббам̣. саддхивиха̄рико па̄нӣйена пуччхитаббо.

‘‘йасмим̣ виха̄ре саддхивиха̄рико вихарати, саче со виха̄ро укла̄по хоти, саче уссахати, содхетаббо. виха̄рам̣ содхентена пат̣хамам̣ паттачӣварам̣ нӣхаритва̄ екамантам̣ никкхипитаббам̣…пе… саче а̄чаманакумбхийа̄ удакам̣ на хоти, а̄чаманакумбхийа̄ удакам̣ а̄син̃читаббам̣.

‘‘саче саддхивиха̄рикасса анабхирати уппанна̄ хоти, упаджджха̄йена вӯпака̄сетаббо, вӯпака̄са̄петаббо, дхаммакатха̄ ва̄сса ка̄табба̄. саче саддхивиха̄рикасса куккуччам̣ уппаннам̣ хоти, упаджджха̄йена винодетаббам̣, винода̄петаббам̣, дхаммакатха̄ ва̄сса ка̄табба̄. саче саддхивиха̄рикасса дит̣т̣хигатам̣ уппаннам̣ хоти, упаджджха̄йена вивечетаббам̣, вивеча̄петаббам̣, дхаммакатха̄ ва̄сса ка̄табба̄. саче саддхивиха̄рико гарудхаммам̣ аджджха̄панно хоти парива̄са̄рахо, упаджджха̄йена уссуккам̣ ка̄таббам̣ – кинти ну кхо сан̇гхо саддхивиха̄рикасса парива̄сам̣ дадеййа̄ти. саче саддхивиха̄рико мӯла̄йапат̣икассана̄рахо хоти, упаджджха̄йена уссуккам̣ ка̄таббам̣ – кинти ну кхо сан̇гхо саддхивиха̄рикам̣ мӯла̄йа пат̣икассеййа̄ти. саче саддхивиха̄рико ма̄натта̄рахо хоти, упаджджха̄йена уссуккам̣ ка̄таббам̣ – кинти ну кхо сан̇гхо саддхивиха̄рикасса ма̄наттам̣ дадеййа̄ти. саче саддхивиха̄рико аббха̄на̄рахо хоти, упаджджха̄йена уссуккам̣ ка̄таббам̣ – кинти ну кхо сан̇гхо саддхивиха̄рикам̣ аббхеййа̄ти. саче сан̇гхо саддхивиха̄рикасса каммам̣ каттука̄мо хоти, таджджанӣйам̣ ва̄ нийассам̣ ва̄ пабба̄джанӣйам̣ ва̄ пат̣иса̄ран̣ӣйам̣ ва̄ уккхепанӣйам̣ ва̄, упаджджха̄йена уссуккам̣ ка̄таббам̣ – кинти ну кхо сан̇гхо саддхивиха̄рикасса каммам̣ на кареййа, лахука̄йа ва̄ парин̣а̄меййа̄ти. катам̣ ва̄ панасса хоти сан̇гхена каммам̣, таджджанӣйам̣ ва̄ нийассам̣ ва̄ пабба̄джанӣйам̣ ва̄ пат̣иса̄ран̣ӣйам̣ ва̄, уккхепанӣйам̣ ва̄, упаджджха̄йена уссуккам̣ ка̄таббам̣ – кинти ну кхо саддхивиха̄рико самма̄ ваттеййа ломам̣ па̄теййа, неттха̄рам̣ ваттеййа, сан̇гхо там̣ каммам̣ пат̣иппассамбхеййа̄ти.

‘‘саче саддхивиха̄рикасса чӣварам̣ дховитаббам̣ хоти, упаджджха̄йена а̄чиккхитаббам̣ – евам̣ дховеййа̄сӣти, уссуккам̣ ва̄ ка̄таббам̣ – кинти ну кхо саддхивиха̄рикасса чӣварам̣ дховийетха̄ти. саче саддхивиха̄рикасса чӣварам̣ ка̄таббам̣ хоти, упаджджха̄йена а̄чиккхитаббам̣ – евам̣ кареййа̄сӣти, уссуккам̣ ва̄ ка̄таббам̣ – кинти ну кхо саддхивиха̄рикасса чӣварам̣ карийетха̄ти. саче саддхивиха̄рикасса раджанам̣ пачитаббам̣ хоти, упаджджха̄йена а̄чиккхитаббам̣ – евам̣ пачеййа̄сӣти, уссуккам̣ ва̄ ка̄таббам̣ – кинти ну кхо саддхивиха̄рикасса раджанам̣ пачийетха̄ти. саче саддхивиха̄рикасса чӣварам̣ раджитаббам̣ хоти, упаджджха̄йена а̄чиккхитаббам̣ – евам̣ раджеййа̄сӣти, уссуккам̣ ва̄ ка̄таббам̣ – кинти ну кхо саддхивиха̄рикасса чӣварам̣ раджийетха̄ти. чӣварам̣ раджантена са̄дхукам̣ сампариваттакам̣ сампариваттакам̣ раджитаббам̣, на ча аччхинне тхеве паккамитаббам̣. саче саддхивиха̄рико гила̄но хоти, йа̄ваджӣвам̣ упат̣т̣ха̄таббо, вут̣т̣ха̄намасса а̄гаметаббам̣. идам̣ кхо, бхиккхаве, упаджджха̄йа̄нам̣ саддхивиха̄рикесу ваттам̣ йатха̄ упаджджха̄йехи саддхивиха̄рикесу самма̄ ваттитабба’’нти.

дутийабха̄н̣ава̄ро нит̣т̣хито.