4. пат̣ин̃н̃а̄такаран̣ам̣

200. тена кхо пана самайена чхаббаггийа̄ бхиккхӯ аппат̣ин̃н̃а̄йа бхиккхӯнам̣ камма̄ни каронти – таджджанӣйампи, нийассампи, пабба̄джанӣйампи, пат̣иса̄ран̣ӣйампи, уккхепанӣйампи. йе те бхиккхӯ аппиччха̄…пе… те уджджха̄йанти кхиййанти випа̄ченти – ‘‘катхан̃хи на̄ма чхаббаггийа̄ бхиккхӯ аппат̣ин̃н̃а̄йа бхиккхӯнам̣ камма̄ни кариссанти – таджджанӣйампи, нийассампи, пабба̄джанӣйампи, пат̣иса̄ран̣ӣйампи, уккхепанӣйампӣ’’ти! атха кхо те бхиккхӯ бхагавато етаматтхам̣ а̄рочесум̣…пе… ‘‘саччам̣ кира, бхиккхаве…пе… ‘‘саччам̣ бхагава̄’’ти…пе… вигарахитва̄…пе… дхаммим̣ катхам̣ катва̄ бхиккхӯ а̄мантеси – ‘‘на, бхиккхаве, аппат̣ин̃н̃а̄йа бхиккхӯнам̣ каммам̣ ка̄таббам̣ – таджджанӣйам̣ ва̄, нийассам̣ ва̄, пабба̄джанӣйам̣ ва̄, пат̣иса̄ран̣ӣйам̣ ва̄, уккхепанӣйам̣ ва̄. йо кареййа, а̄патти дуккат̣асса.

201. ‘‘евам̣ кхо, бхиккхаве, адхаммикам̣ хоти пат̣ин̃н̃а̄такаран̣ам̣, евам̣ дхаммикам̣. катхан̃ча, бхиккхаве, адхаммикам̣ хоти пат̣ин̃н̃а̄такаран̣ам̣?

‘‘бхиккху па̄ра̄джикам̣ аджджха̄панно хоти. таменам̣ чодети сан̇гхо ва̄, самбахула̄ ва̄, екапуггало ва̄ – ‘па̄ра̄джикам̣ а̄йасма̄ аджджха̄панно’ти? со евам̣ вадети – ‘на кхо ахам̣, а̄вусо, па̄ра̄джикам̣ аджджха̄панно, сан̇гха̄дисесам̣ аджджха̄панно’ти. там̣ сан̇гхо сан̇гха̄дисесена ка̄рети. адхаммикам̣ пат̣ин̃н̃а̄такаран̣ам̣.

‘‘бхиккху па̄ра̄джикам̣ аджджха̄панно хоти. таменам̣ чодети сан̇гхо ва̄, самбахула̄ ва̄, екапуггало ва̄ – ‘па̄ра̄джикам̣ а̄йасма̄ аджджха̄панно’ти? со евам̣ вадети – ‘на кхо ахам̣, а̄вусо, па̄ра̄джикам̣ аджджха̄панно, тхуллаччайам̣…пе… па̄читтийам̣…пе… па̄т̣идесанӣйам̣…пе… дуккат̣ам̣…пе… дуббха̄ситам̣ аджджха̄панно’ти. там̣ сан̇гхо дуббха̄ситена ка̄рети. адхаммикам̣ пат̣ин̃н̃а̄такаран̣ам̣.

‘‘бхиккху сан̇гха̄дисесам̣…пе… тхуллаччайам̣…пе… па̄читтийам̣…пе… па̄т̣идесанӣйам̣…пе… дуккат̣ам̣…пе… дуббха̄ситам̣ аджджха̄панно хоти. таменам̣ чодети сан̇гхо ва̄, самбахула̄ ва̄, екапуггало ва̄ – ‘дуббха̄ситам̣ а̄йасма̄ аджджха̄панно’ти? со евам̣ вадети – ‘на кхо ахам̣, а̄вусо, дуббха̄ситам̣ аджджха̄панно, па̄ра̄джикам̣ аджджха̄панно’ти. там̣ сан̇гхо па̄ра̄джикена ка̄рети. адхаммикам̣ пат̣ин̃н̃а̄такаран̣ам̣.

‘‘бхиккху дуббха̄ситам̣ аджджха̄панно хоти. таменам̣ чодети сан̇гхо ва̄, самбахула̄ ва̄, екапуггало ва̄ – ‘дуббха̄ситам̣ а̄йасма̄ аджджха̄панно’ти? со евам̣ вадети – ‘на кхо ахам̣, а̄вусо, дуббха̄ситам̣ аджджха̄панно, сан̇гха̄дисесам̣…пе… тхуллаччайам̣…пе… па̄читтийам̣…пе… па̄т̣идесанӣйам̣…пе… дуккат̣ам̣ аджджха̄панно’ти. там̣ сан̇гхо дуккат̣ена ка̄рети. адхаммикам̣ пат̣ин̃н̃а̄такаран̣ам̣. ‘‘евам̣ кхо, бхиккхаве, адхаммикам̣ хоти пат̣ин̃н̃а̄такаран̣ам̣.

‘‘катхан̃ча, бхиккхаве, дхаммикам̣ хоти пат̣ин̃н̃а̄такаран̣ам̣? бхиккху па̄ра̄джикам̣ аджджха̄панно хоти. таменам̣ чодети сан̇гхо ва̄, самбахула̄ ва̄, екапуггало ва̄ – ‘па̄ра̄джикам̣ а̄йасма̄ аджджха̄панно’ти? со евам̣ вадети – ‘а̄ма, а̄вусо, па̄ра̄джикам̣ аджджха̄панно’ти. там̣ сан̇гхо па̄ра̄джикена ка̄рети. дхаммикам̣ пат̣ин̃н̃а̄такаран̣ам̣.

‘‘бхиккху сан̇гха̄дисесам̣…пе… тхуллаччайам̣…пе… па̄читтийам̣…пе… па̄т̣идесанӣйам̣…пе… дуккат̣ам̣…пе… дуббха̄ситам̣ аджджха̄панно хоти. таменам̣ чодети сан̇гхо ва̄, самбахула̄ ва̄, екапуггало ва̄ – ‘дуббха̄ситам̣ а̄йасма̄ аджджха̄панно’ти? со евам̣ вадети – ‘а̄ма, а̄вусо, дуббха̄ситам̣ аджджха̄панно’ти. там̣ сан̇гхо дуббха̄ситена ка̄рети. дхаммикам̣ пат̣ин̃н̃а̄такаран̣ам̣. евам̣ кхо, бхиккхаве, дхаммикам̣ хоти пат̣ин̃н̃а̄такаран̣а’’нти.